هەرێما کوردستانا عیراقێ پاش سەرهلدانا سالا 1991 و ئازادکرنا سەرجەم ناوچەیێن کوردى یێن ژێر دەستهەلاتا حکومەتا عیراقێ یا ژناڤچووى، ل سالا 1992 خەلکێ هەرێما کوردستانێ شیان ب رێکا هەلبژارتنان پەرلەمانێ هەرێما کوردستانێ دامەزرینن. هەروەسان ئێکەم کابینەیا حکومەتا هەرێما کوردستانێ دەست بکاربکەن، ئێدى گەلێ کورد ل هەرێما کوردستانێ بوو خوەدى حکومەتەکا کوردى. پشتى سالا 2003 و رووخاندنا حکومەتا دکتاتۆریا عیراقێ، ئێدى کوردان ب ئاوایەکێ باشتر دەست ب کار و پرۆژەیێن مەزن کرن ژ پێخەمەت ئاڤاکرنا هەرێما کوردستانێ ژ سەرجەم کەرتێن جۆراوجۆر ب مەرەما زێدەتر خزمەتکرنا هاولاتیان. وەبەرهێنانا گەشتوگۆزارى یان پیشەسازیا گەشتوگۆزارى ئێک ژ جۆرێن گرنگێن چالاکیێن بازرگانى و وەبەرهێنانى یە یێ کو دهێتە هژمارتن ژ قازانجێن گەلەک بلند ل گەلەک وەلاتان. لەورا حکومەتا هەرێما کوردستانێ هێدى هێدى پویتەدان ب ئەڤى کەرتێ گرنگ دا. ژ دەستپێکا کارێ حکومەتا هەرێما کوردستانێ ژ دانانا پلانێن ستراتیژى یێن ب رێک و پێک هەر ژ دابینکرنا ئێمناهى و ئارامیێ ل سەر ئاستێ هەرێما کوردستانێ و پویتەدان ب کەرتێن تایبەت ژ پێخەمەت گەشەپێدانا کەرتێ گەشتوگۆزارى ل نافخۆی، دابینکرنا پێدڤیێن مرۆڤایەتى یێن تایبەت ب کەرتێ گەشتوگۆزارى ڤە و چەوانیا بەرەڤ پێشڤەچوونا ئەڤى کەرتێ ناڤبرى، بکارئینانا گەشتوگۆزاریا ئەلکترۆنى د ڤەگوهاستن و نیشاندانا گەشتوگۆزاریا ل هەرێما کوردستانێ هەبوون هەى و دیارکرنا جهێن گەشتوگۆزاری ب رێکێن ئەلکترۆنى کو ئەڤە ژى دبیتە ئالاڤەک ژ پێخەمەت بەرەڤ پێشڤەبرنا کەرتێ گەشتوگۆزارى ب تێچوویەکا کێم.
د سالانێن دەربازبووى دا ئەگەر بکەینە پیڤەر و جوداکرنێ بکەین دێ بینین گوهورینێن گەلەک مەزن پەیدابوینە ژ زێدەبوونا جهێن گەشتوگۆزارى و زێدەبوونا خارنگەه و هۆتێل و مۆتێلان و گوندێن گۆزارى و زێدەبارى فیستەڤالێن گەشتوگۆزارى کو ئەڤە هەمى بووینە ئەگەر سەرنجا گەشتیاران بۆ لایێ خۆ راکێشن. سەروک وەزیرێن هەرێما کوردستانێ یێ خولا دەربازبووى (نێچیرڤان بارزانى) ل 17 ى ئادارا سالا 2019 د رێورەسمێن ڤەکرنا پێشانگەها رۆژهەلاتا ناڤەراست یا گەشتوگۆزارى ل هەولێرا پایتەخت ئاماژە ب گەلەک پرۆژەیێن ستراتیژى یێن گەشتوگۆزارى کرن کو ئێک ژ وان پرۆژەیان داهاتێ سەرەکى یێ هەرێما کوردستانێ پشتبەستنێ ل سەر گەشتوگۆزازێ بکەن نەک بتنێ ل سەر سامانێن سروشتى. هەروەسان دەستەیا گشتى یا گەشتوگۆزارى ل هەرێما کوردستانێ د پلانا خوە یا ستراتیژى دا ئاماژە کریە کو هەتا سالا 2025 هەرێما کوردستانێ دێ سالانە پێشوازیێ ل 7 ملیۆن گەشتیاران کەت. لەوران ئەڤە مزگینیەکا گەلەک مەزنە د پیشڤەچوونا کەرتێ گەشتوگۆزارى ل هەرێما کوردستانێ. حکومەتا هەرێما کوردستانێ ل کابینەیێن دەربازبووى دا پویتەدانەکا مەزن ب ئەڤى کەرتێ گرنگ دایە تایبەتى ژى رۆلێ سەرۆک وەزیرێن هەرێما کوردستانێ یێ خولا دەرباز بووى (نێچیرڤان بارزانى) کو د نوکە دا هەرێما کوردستانێ خوەدى گەلەک جهێن گەشتوگۆزارى یە. لەوران بۆ مە ئاشکەرا دبیت کو کەرتێ گەشتوگۆزارى گرنگەیەکا مەزن هەیە د پێشڤەبرنا وەلاتان دا و هەردیسان داهاتەکێ مەزنە ژبۆ خەزینەیا دەولەتێ کو حکومەت دشێت ل داهاتى دا پشتبەستنێ ل سەر ئەڤى کەرتێ گرنگ بکەت.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)