هەرێما کوردستانێ دهێتە هژمارتن نموونەیا بەرچاڤ یا پێکڤە ژیانا سەرجەم ئۆل و ئاین و نەتەوەیێن جودا جودا، و شیایە هەتا نوکە ب بەردەوامى پارێزگاریێ ل ئەڤى پرەنسیپێ جوان و شارستانى بکەت. هەر دەم سەرجەم ئاین و ئول و نەتەوە ل هەرێما کوردستانێ ب ئێک هەست و سۆز پێکڤە ژیاینە و بووینە سونبولا پێکڤە ژیانێ ل سەر ئاستێ وەلاتێ عیراقێ ب گشتى و هەرێما کوردستانێ ب تایبەتى پشتى هاتنا رێکخراوا تیرۆرستى یا دەولەتا ئیسلامى ل عیراق و شام (داعش) بۆ وەلاتێ عیراقێ ل سالا 2014 پشتى هێرشا رێکخراوا تیرۆرستى یا داعش ئاراستەیێ خۆ بەرەڤ وارێن ئاکنجینشینێن کوردێن ئێزدى ئاراستەکرى کارەساتێن مەزن ل دویڤ خوە ڤە هێلان. ئەڤێ رێکخراوا تیرۆرستى ب ئالاڤێن درندانە کۆمەلکوژیێن مەزن ئەنجام دان، زێدەبارى رەڤاندنا کچێن کوردێن ئێزدى و تالانکرنا مال و سەروەت و جهێن وان. د ئەڤێ کارەسات و جینۆسایدا ب سەرێ کوردێن ئێزدى هاتى هەر زوى حکومەتا هەرێما کوردستانێ پێشوازى ل ئاوارەیێن کوردێن ئێزدى کر و ل گشت مال و قوتابخانە و جهێن گشتى پێشوازى لێ هاتەکرن و رێزەکا تایبەت پێ هاتە دان. سەرجەم هاولاتیێن هەرێما کوردستانێ ب هاریکارى کرن و ڤەحەواندنا ل مالێن خۆ خزمەتا برایێن خوە یێن ئێزدى کر.
لەورا د ئەڤێ هێرشا رێکخراوا تیرۆرستى یا داعش دا کوردێن ئێزدى زیان لێکەفتیێن هەرە مەزن بوینە، رۆلێ حکومەتا هەرێما کوردستانێ رۆلەکێ هەرە باش بوویە د خزمەتکرتا هژمارەیا هەرە مەزنا ئاوارەیان دگەل دابینکرنا سەرجەم پێدڤێن ژیانێ. زێدەبارى رزگارکرنا هزارەهان کوردێن ئێزدى یێن ل ژێر دەستێ رێکخراوا تیرۆرستى یا داعش و دووبارە ڤەگەراندن بۆ باوەشا ئاخا پیرۆزا هەرێما کوردستانێ، پشتى مرنا (میر تەحسین بەگ) و پاش دانانا (میر حازم تحسین بەگ) سەروکێ هەرێما کوردستانێ ب مەرەما پیرۆزباهیکرنێ ل میرێ نوى سەرەدانا مالا میرى کر و دووپاتیا پشتەڤانیێ بۆ سەرجەم ئێزدیان دیارکر. لەوران رۆلێ بەرێز (نێچیرڤان بارزانى) هەر ددەما سەرۆک وەزیران و هەتا نوکە وەک سەرۆکێ هەرێما کوردستانێ رۆلەکێ ئێکجار مەزن گێرایە د پاراستنا مافێن سەرجەم ئۆل و ئاین و نەتەوەیێن جودا جودا ل سەر ئاستێ هەرێما کوردستانێ.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)