پاشڤەچوونا بەربەڵاڤ ل ھەرێما كوردستانێ نە گرێدایە ب پترۆل و كێشێن ھەرێمێ دگەل بەغدا، لێ یا گرێدایە ب كەسێن دەستھەڵاتدارڤە ل ھەرێمێ كو پلانێن خۆ داناینە و جڤاكێ ھەڤگرتی كرییە جڤاكەكێ ژ بەرێكچووی و دابەشكری بۆ تەخ و چینان ب مەرەما دەستان ژ دەستھەڵاتێ بەرنەدەن. جڤاك بوویە پێكھاتەك ژ تەخا دەستھەڵاتدار و تەخا بەرپرسان و پاشی تەخا مللەتی، تەخا دەستھەڵاتدار دسەر تەخا بەرپرساندا دھێت و ئەڤ ھەردوو تەخە ژی دسەر تەخا گشتیدا دھێن كو تەخا مللەتیە. ئەڤە ئەگەرێ پاشڤەچوونا جڤاكیە ل ھەرێمێ، ئەڤ چەندە ژی نە یەكسانییە دناڤبەرا تەخاندا د ماف و ئەركاندا، ئەز دێ ئاخفتنا خۆ تنێ كورتكەم ل سەر سیستەمێ فێركرنێ ل ھەرێمێ كو چەند جوداھی ھاتییەكرن دناڤبەرا وان تەخاندا، كوڕێن تەخا بەرپرسان نەدیەكسانن دگەل كوڕێن تەخا گشتیدا. ئانكو كوڕێن زەنگینان نەدیەكسانن دگەل كوڕێن ھەژاران ئانكو كوڕێ بەرپرسی نەیێ یەكسانە دگەل كوڕێ مامۆستای و فەرمانبەری و كەسبكاری.
ئەڤەژی بۆ ئەگەرێ پەیدابوونا سیستەمەكێ فێركرنا تایبەت (ئەھلی) و سیستەمەكێ فێركرنا گشتی و ئەڤەژی بۆ ئەگەرێ ژێكجوداكرنا كوڕێن مللەتی ژ ھەڤدوو. كوڕێن بەرپرسان ل قوتابخانێن تایبەت دخونن و ل سەر ھەمان كورسیكان دگەل كوڕێن تەخا گشتی نارینن كو ل وێرێ ھەموو كوڕێن مللەتی یەكسان دبن. كوڕێن دەستھەڵادار دچنە قوتابخانە و زانكۆیێن دەرڤەی ھەرێمێ و دگەل كوڕێن بەرپرس و كوڕێن تەخا گشتی نارینن. ئەڤ كارگێریا شاش تاوانەكە و دڤێت لێپرسین دگەل بھێتەكرن ب ئەگەرێ نەبەرھەمئینانا ھێزێن كوڕێن مللەتی ب یەكسانی كو ئەو پاشەڕۆژا ھەرێمێنە، ل دووڤ دیتنا من پاشڤەچوونا ھەرێمێ ئەنجامێ ژێكجوداكرنا كوڕێن ئێكجڤاكییە و، نەدابینكرنا ماف و ئەركانە ب یەكسانی و ئەڤە بۆ ئەگەرێ پەیدابوونا تەخان د جڤاكییدا و، پەیدابوونا كەسێن نە خودان شیان كو خۆ دسەپینن ل سەر كەسێن خودان شیان ب ھێز و ھەژمۆنێ كو دبیتە ئەگەرێ پاشڤەچوونا سیستەمێ فێركرنێ و تەندروستی و كەرتێ كشتوكالی و پیشەسازی و پاشی پاشڤەچوون ل ھەرێمێ.
