دسیاسەتکرنێ دا هەر کەس و لایەنەکێ ئامانجەک دیارى کرى هەیە. هەر لایەنەک سیاسەتەک تایبەت ب خۆ هەیە بۆ سەرخستنا بەرنامە و پرۆگرامێ دارێتى. لێ گرنگە ئەنجام و بەرهەمێ ڤێ سیاسەتێ گرنگى بهێت وەرگرتن، هەلسنگاندنەکا لۆژیکى بۆ بهێت کرن نەک عاتفى. هەردەما بەرهەم و دەسکەفتیێن باش هەبوون کە خزمەت مرۆڤایەتى بکەت، دیارە سیاسەتەک سەرکەفتیە. بەروڤاژى هەردەما زوورترین زەرەر هەبوو دیارە سیاسەتەک فاشلە و پێتڤى پێداچوونە. یا مەبەست ئەوە ئەگەر بەرێخودانێ بۆ سیاسەتا (پەکەکە و هەدەپە) باکوورێ کوردستانێ بکەین دێ بینین دەمەکێ دا پێشڤەچوون بخۆڤە دیتیە و تا ئاستەکێ باش دەسکەفتى هەبوونە. نموونە پشتى دەستووردانا حکومەتا تورکیا ب بەشداریا هێزێن کوردى دهەلبژارتنان دا ڤێرە هەدەپە ب رێکێن مەدەنى شیا بەشدارى هەلبژارتن بکەت، ب رێکێن هەلبژارتنان شیا وەکێ هێزەکا باندۆر تا ئاستەکێ باش رۆلێ خوە بگێریت و دەسکەفتى هەبوون. شیا ناڤا جەرگێ پەرلەمانى ئەنقەرە خەباتێ بێ ترس بکەت، چەندین پلەیێن بلندێن ئیداریی ناڤا حکومەتێ وەرگرتن. هەر دیسان بگرە پرۆسا ئاشتى کە زۆر مافێن کوردان تێدا دیارى کربوون کە بەرێ هێلا سوور بوون، ژ بلى ڤێ مفا بۆ پارچێن دیێن کوردستانێ هەبوو. بەروڤاژى چەک هەلگرتن ژ لایێ پەکەکە کە جارەکا دى ڤەگەریان بۆ ناڤا چیایێن هەرێما کوردستانێ و زەرە کریە. راستە لایەنێ دەسەڵاتدار تورکیا تووشى کێشە و شەپرزەى کریە تەنانەت زەرەر کریە وەکى چەوا ئاکپارتى هەلبژارتنا چووى باژێرێ ئەستمبۆل ژ دەست دا.
پرسیار ئەوە نەمانا پارتا ئاکپارتى چارەسەرە بۆ کێشا کوردى؟ بەروڤاژى هەتا نوکە سەر بیت چ بەدیلەکێ باشتر د ساحێ دا نییە. دیارترین وان زەرەو زیانێن شەڕى ژی ئەڤەنە: 1- ب هزاران کەس بینە قوربانى، دەهان هزار کەس ل باکوورێ کوردستانێ دەربەدەر بوون. 2- هەر باژێر و گوندێن کوردان وێران بوون. 3- پەکەکە ژ خەلکێ باکوورێ کوردستانێ دیر کەفت. 4- تیرۆر ناساندنا پەکەکە ناڤا تورکیا و دەرڤە. 5- کێمبوونا دەنگێن هەدەپە و دیسان دەستەسەرکرنا سەرۆک و ئەندامێن وان. گومان تێدا نییە ئەڤ سیاسەتا نها یا تورکیا جهێ قەبیل کرنێ نییە. یا ژ هەمیێ خرابتر هەر رۆژ سنورێن هەرێما کوردستان ب هەبوونا گەریلایا بۆمبەباران دکەت کە تێدا خەلکێ مەدەنى دبیت قوربانى. ژلایەکێ دى هێرشێن وان بۆ سەر رۆژئاڤایێ کوردستانێ و داگیرکرنا عەفرینێ جهێ شەرمزاریە. ئەڤە هەمى ژ ئەنجامێ ڤێ شەرى ناڤبەرا پەکەکە دگەل تورکیا کە ئازراندیە کە دەستپێکێ وان شەر دەستپێکر ب کوشتنا دوو پۆلیسێن حکومەتێ. گرنگە بێژین ئەگەر نەشێى دوژمنى خوە دڤێت دوژمناتى لێ نەکەى! یا باشتر ئەوە بکەى هەڤاڵى خوە دا پتر زەرەێ نەکەى و بشێى مفایی لێ بینى. دەمێ پرۆسا ئاشتیێ ل باکوورێ کوردستانێ کە رۆژەک مێژووى و زێرین دهات دیتن کە مام جەلال و مەسعود بارزانى تایبەت رۆلەکێ دیار تێدا هەبوو، پرۆسا ئاشتیێ ژ بلى کە شەڕ و خوینرێتن هات راوستاندن، کە بەرێ سەدان هزار کەس بینە قوربانى، هەر ڤێ پرۆسێ وەکر کە حکومەتا تورکیا هێدى هێدى دانپێدانێ ب مافێن کوردان بکەت. هەرچەندە ئاستەنگى مەزن دهاتن دروست کرن ژ لایێ بەشەک ژ تورکێن نەتەوە پەرست. ئەڤە دبیە واقعەک یا ڤێ پتر دسەلمینت ئالایێ کوردستانێ ئاشکرایی دهات بلندکرن هەتا کۆچکا کەمال ئەتاتورکى ئالایێ کوردستانێ ژ بۆى سەرەدانێن بەرپرسێن هەرێمێ دهات دانان.
ئەڤە پێنگاڤەک گرنگ بوو وى دەمى دا لێ ئەڤە بەس نییە. پرسیار ئەوە بوو دەهان ساڵێن شەرى هەدارێ دکێشین بەس دانوستاندن و رێکێن ئاشتیێ هەدارێ ناکەین؟ کە دەمێ بورى شەرى دا خراب و خرابتر ئەنجامێ وێ بوو چ دى لێ زێدە نەبوو. بەس رازى نابین هەلبژارتنا باش کە تێدا چاڤەرێ بکەین، بەلکى داهاتى باشتر ببیت. ئەگەر بێژین دەمەکێ کورت هەمى داخازیێن کوردا بهێن جهـ و وەڵاتەکێ وەکى تورکیا کە تژى مینن، ئەڤە خەونە. چونکى وەڵاتەکێ وەکى عێراقا لاواز باشوورێ کوردستانێ نەشیایە ڤێ بکەت. جهێ پەکەکە نە ئامێدى یە بەلکى ئامەدە، ژبەر هندێ گرنگە سیاسەتا خوەدا بچیتەڤە، لایەنێ سیێ هەبیت کە رۆلێ ناڤبژیوانى رابیت بۆ ڤەگەراندنا رەوشێ بۆ بەرێ، ئەویش حکومەتا هەرێم وەکى لایەنەکێ نزیک و بەرژوەندى هەڤبەش. گرنگە بزانى تە چ ب دەست خستیە دەسکەفتیان بژمێرى، نە ب تنێ مژولى ژمارتنا زەرەر و زیانێن خوە و بەرامبەر بى کە دئەنجام دا چ بەرهەم نەبیت. پرسیار ژ پەکەکە و هەدپە ئەوەیە؛ ئایا هوین ل ساڵا 2013 ل کیڤە بوون و دساڵا 2019دا ل کیڤەنە؟
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)