دامەزاندن و پێکئینانا هەر پارتەکا سیاسى هەر ژ دەستپێکێ بەرنامە و ئارمانجێن خوە هەنە، ژبەرکو ب هەبوونا بەرنامە و کارێن رێکخستى ئەو پارتە ئاسوویا وێ رۆهن دبیت و بۆ هەر لایەکێ خوەیا دبیت کو مەرەم ژ دامەزراندنا وێ پارتێ چیە. ئەگەر ئەم بەحسى دیرۆکا حزبا کارکەرێن کوردستانێ (پەکەکە) و دەستپێکا دامەزراندنا وێ بکەین ل سالا 1978ێ وەک حزبەکا سیاسى خوە ناسکریە. لێ ب تنێ ئەڤە ناڤەک بوویە و ناڤەرۆکا کار و چالاکیێن وێ بەروڤاژى ڤێ چەندێ بوویە. هەر ژ سالا 1984ێ دەست ب کارێ چەکدارى کریە ل دژى دەولەتا تورکیا و تا نها ژى بەردەوامە. ئەگەر پەکەکێ سیاسەتا پارتى جێبەجێ کربا نها خوەدى پێگەهەک سیاسى یێ بهێز بوو ل دەڤەرێ. لێ بدرێژاهیا دیرۆکێ و پشتى مە کار و چالاکیێن وان دیتى کو دویر ژ بەرژەوەندیێن دۆزا گەلێ کورد بووینە و هەردەم زمانێ هەرەشە و رەفتارێن توند و دویر ژ فەلسەفە و ئارمانجێن پاراستنا گیان و ئاخا کوردان بوویە، بو هەر لایەکى دیاربوو کو ئەڤە حزبەکا چەکدارە نەک سیاسى. یا خویایە کو د سیاسەتێ چ دوستێن بەردەوام و چ دوژمنێن بەردەوام نینە، لێ بدرێژاهیا دیرۆکێ دۆست و دوژمنێن پەکەکێ نەهاتینە گهورین و پەیاما وێ یا توند نەهاتە گهورین کو ڤێ چەندێ ژى زیان ب حزبێ بخوە و کوردان ژى گەهاندیە. جوداهیا پارتا دیموکراتا کوردستانێ دگەل پەکەکێ ئەوە کو پارتى حزبەکا واقع بینە و ل دویڤ بەرژەوەندیان دکەڤیت و کارێ سیاسى دکەت ب رێکا بهێزکرنا پەیوەندیان دگەل وەلاتێن دەڤەرێ و جیهانێ ب گشتى و بەرهەمێ سیاسەتا پارتى رۆهن و ئاشکەرایە کو نە بتنێ بۆ جارەکێ ئانکو بۆ چەندین جاران کیانێ هەرێما کوردستانێ پاراستى یە و بهێزى راگرتى یە، بەروڤاژى پەکەکێ کو کار و چالاکیێن وێ تنێ زیانێن گیانى و مادى لێ بەرهەم هاتیە و هەردەم سیاسەتا وێ ب نەرێنى ل سەر گەلێ کورد ب گشتى زڤریە و بوویە ئەگەر کو چەندین قوربانیان بدەین.
د نها دا ئێک ژ مەترسیترین هێزان بۆ سەر هەرێما کوردستانێ چەکدارێن پەکەکێ نە، ژبەرکو ژلایەکێ ڤە ب سەدان گوند داگیرکرینە و زیانەکا زۆر ب جوتیار و کاسبکارێن وان گوندان گەهاندیە و ژلایەکێ دى ڤە بەهانەکە بۆ وەلاتێن دەردوور مینا تورکیا و ئیران کو هێرشێن خوە بۆ سەر ئاخا کوردستانێ زێدەتر بکەن و دەستدرێژیێ ل سەر ئاخا هەرێما کوردستانێ بکەن. د دەمەکێ دا کو یا پێتڤى بوو کارێ خوە یێ حزبایەتى و چەکدارى ل باکوورێ کوردستانێ بکەت کو ئەڤە چەندین سالە ب ئەگەرێ رەفتارێن پەکەکێ یێن توند مللەتێ کورد باجا وان شاشیان ددەت و چەندین گەنجێن کورد ل وێ دەڤەرێ بووینە قوربانى و هاتینە دەستەسەرکرن ژ لایێ دەولەتا تورکیا ڤە، زێدەبارى داگیرکرنا گوند و باژێرێن کوردنشین. لێرەدا پرسەکا گرنگ دهێتە پێش ئەوژى ئەوە کو بۆچى پەکەکە ئاخا هەرێما کوردستانێ هەلبژارتیە بۆ ئەنجامدانا کار و چالاکیێن خوە؟ ژبەرکو کیانێ هەرێما کوردستانێ ئێک ژ ئارامترین جهانە ل رۆژهەلاتا ناڤین بێگومان ئەڤ چەندەژى ب دلێ پەکەکێ نینە، لەورا ب رێکا هند کارێن تێکدەرانە دڤێت ئارامیا هەرێمێ تێک بدەت و زێدەتر ئارمانجێن دوژمنێن کوردان بهێنە بجهـ ئینان. دیماهیک بوویەر ژى تیرۆرکرنا دیپلوماتکارەکێ تورک بوو ل هەولێرا پایتەخت کو مەرەم ژ ڤێ چەندێ ئەوبوو بەرپرسێن تورک هانبدەت هەلویستێن توند بەرامبەر حکومرانیا هەرێمێ بگرنەبەر، لێ ب هەبوونا سەرۆک نێچیرڤان بارزانى و رۆلێ حکومەتا هەرێمێ چارەسەریەکا بلەز بۆ وێ ئاریشێ هاتە دیتن کو دیار نەبوو ب وى کارێ تیرۆرستى ئەزموونا هەرێما کوردستانێ بەرەف ئاقارەکێ نەدیار بچیت. ل دوماهیێ دبێژین ئەگەر پەکەکە و سەرکردێن وێ ل خوە نەزڤرن و بەردەوام بن ل سەر ڤان کریارێن خوە دێ دوماهیکا وان ل سەر دەستێ گەلێ کورد بخوە بیت. چونکى رۆژ بۆ رۆژێ بەرهەمێ شاشیێن وان بۆ هەر لایەکێ دیاردبیت و هەموو گەلێ کورد ل هەر چار پارچێن کوردستانێ لێ زەرەرمەندن. لەورا باشترین بژاردە بۆ پەکەکێ ئەوە بزڤریتە باکوورێ کوردستانێ و دەست ژ کارێ چەکداریێ بەردەت و وەک حزبەکا سیاسى کارێن خوە برێڤەببەت و دەست ب ئاساییکرنا پەیوەندیێن سیاسى دگەل حزبێن دی یێن کوردى بکەت.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)