هه‌روه‌كو په‌كه‌كه یا بوویه رێكه‌كا نێزیك بۆ گه‌هاندنا ئارمانج و مه‌ره‌م و نیازێن خراب یێن گه‌له‌ك لایه‌ن و ده‌وله‌تێن کو خه‌فكا بۆ هه‌رێما كوردستانا ئارام دادنن. ئه‌و ژی پشتی چه‌ندین هه‌ولێن تێكدانا سه‌روه‌ری و سه‌ربۆرا سه‌ركه‌فتی یا هه‌رێمێ، نه‌خاسمه پشتی هه‌رێم ب حوكومه‌ت و سه‌رۆكاتی ڤه كه‌فتیه د ده‌ستێن دوو گه‌نجێن دلسۆز دا بۆ دۆزا خوه یا ره‌وا ب راسپاردێن مه‌رجه‌عێ كوردستانێ مەسعوود بارزانی و سه‌رۆكێ ژیر یێ كو گه‌له‌ك مه‌ترسی ژ هنداڤ سه‌رێ ڤی ملله‌تێ هه‌ژار راكرین ب سیاسه‌ت و زانینا خۆ یا دیپلۆماسی و سیاسی و ئه‌و رۆلێ بهێز یێ په‌یوه‌ندیان هه‌یی د گه‌ل گه‌له‌ك وه‌لاتێن مه‌زن ل جیهانێ. ئه‌ڤجا ب گه‌له‌ك رێكا هاتن چ ب پیلانا 16 ئۆكتۆبه‌رێ و ئه‌و ئیفرازاتێن پاش وێ یان ب رێكا حه‌شدا شه‌عبی و گه‌له‌ك پرسێن دیتر، ئه‌ڤرۆ ژی په‌كه‌كه یا بوویه رێكه‌كا ب ساناهی كو وه‌لاته‌كێ وه‌كو توركیا بهێت مایێ خوه د هه‌رێمێ دا بكه‌ت. باشترین به‌هانه‌یه ب دوو ئاراسته‌یان باندۆرا خوه ل سه‌ر كوردێن هه‌رێمی و د ئه‌نجامدا ژی هه‌ر كورده‌كی بسه‌پنن، و بوویه‌را ترابزۆنێ ژی به‌لگه و نموونا ئاخفتنا مه‌یه، كو ل ده‌ف وان هه‌می كورد ئێكن. به‌لێ حزبه‌كا وه‌كو په‌كه‌كی كو نوونه‌راتیا هه‌می كوردان ناكه‌ت نه ل توركیا و نه ل هه‌می پارچێن كوردستانێ، یا د به‌رژه‌وه‌ندیا توركیا و ئیرانێ و خوه عیراقا به‌ری ڤێ كابینێ ژی دا كار دكه‌ت. وه‌كو وێ كریارا تیرۆرستانه یا ل هه‌ولێرێ به‌ری چه‌نده‌كێ هاتیه روودان، ئه‌گه‌ر نه چما ل وه‌لاته‌كێ دی ناكه‌ت، یان هه‌ما ل توركیا بخۆ هه‌گه‌ر ئه‌و بن ئارمانجا وێ، هه‌می ژی بۆ هندێ یه كو ناڤێ هه‌ولێرا ئارام ب ناڤدارترین چووی ل سه‌رانسه‌ری جیهانێ ب ره‌وشا وێ یا سه‌قامگیر و ته‌ناهی، كو ناڤوده‌نگێن وێ ب خرابی ببه‌ن.
هه‌ر چه‌نده نه‌شیان ب كاره‌كێ مه‌زنتر بكه‌ن وه‌كو ده‌ربازكرنا كه‌لوپه‌لێن ته‌قاندنێ یێن تیرۆرستان. چونكو ده‌زگه‌هێ ئه‌وله‌هیێ ل هه‌رێمێ یێ موكمه و قاهیمتره ژ هه‌می عیراقێ و ده‌ڤه‌رێ، رابوون ب چه‌كێن سڤك هێرش كرنه سه‌ر جێگرێ كونسلێ تورك، هه‌كه خوه ئه‌و ژی لێ دابری بان، دوور نه‌بوو ب كێرا فێقی هێرش كربایێ! ژ لایه‌كی دی ژی ڤه یێ له‌شكری، په‌كه‌كێ لڤینێن خوه كاراتر و چالاكتر لێ كرن ل ناڤا ئاخا هه‌رێمێ دا و یا ژ سنۆرێن گوندو ناڤچێن سنۆری خوه پتر نێزیكی باژێری دكه‌ت، دا كو ببنه ئارمانجێن له‌شكرێ توركی یێن ئه‌سمانی و ئه‌ردی ژی. ژلایه‌كێ دی ڤه ژی گه‌له‌ك ب دهۆلا نه‌ته‌وه‌بوونێ و كوردستانیبوونێ سروودا دسترن. باشه ماده‌م هۆسا د هشكباوه‌ر و رژدن ل سه‌ر رێبازا خوه، بۆچی هه‌تا نهو چو جه و گوند ل وێ ده‌ڤه‌را ئه‌و خه‌باتێ لێ دكه‌ن نه‌ستاندینه، یان هه‌ما شه‌ڤه‌كێ ژی گرت بن؟! یێن هاتین هه‌رێمه‌كا رزگاركری و ئارام رزگار دكه‌ن، به‌لێ ژ ده‌ستێ كێ؟ ژ ده‌ستێن توركیا یان هه‌ر ده‌ستێن خودانێن وی ئه‌ردی ب خوه؟! مه هیڤیی یه ئه‌وا مه هه‌ی دده‌ست دا بۆ مه بهێلن و به‌لكو بۆ خوه ب خوه ژی ئه‌گه‌ر هوون ب ئاشتی بهێنه هۆلێ.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)