هەبوونا رەوشەنبیریا سیاسی دناڤا هەر چینەکا جڤاکیدا گرنگیا خۆ هەیە، و ئەگەر ئەم بەحسا چینا گەنجان بکەین دێ بینین کو تا رادەیەکێ بلند لاوازی د سیاسەتێ دا هەیە. هەڵبەت ڤێ ژی ئەگەرێن خۆ هەنە؛ ژ وان ئەگەران کو چ لایەن خۆ بەرپرس نابینن کو حەزەکێ بو گەنجی دروست بکەن دا زانیاریان دەربارەی سیاسەتێ وەربگرن. ئەڤچا چ خێزان بیت یان هەڤالێن رەوشەنبیر بن یان لایەنێن سیاسی بخۆ. هەروەسا هەبوونا چالاکیێن رۆژانە یێن تۆرێن جڤاکی کو گەنج بەرەڤ جیهانەکا دی بریە ژ ئەگەرانە, دیسان بێسەروبەریا برێڤەبرنا لایەنێن سیاسی بۆ دەستهەلاتێ گەنج بێ هیڤی کریە کو رۆژەکێ ژ رۆژان وی حەز ل سەر بینەریا دەنگوباسان ژی بیت.
ل ڤێرە پێویستە گەنج ب چ رەنگ خۆ تێکەلی سیاسەتێ بکەت؟ یان چاوا بریارێ بدەت کیژان لایەنی یان حزبێ بهەلبژێریت کو دێ د بەرژەوەندیا ژیانا وی یا سیاسی دا بیت؟ پتریا گەنجێن مە ل سەر بنیاتێ داب و نەریت کو ژ مەزنێن وان ماینە لایەنێ خۆ یێ تایبەتێ سیاسی هەلدبژێرن یان ژی ل دەمێ کو بینەریا هندەك کەنالێن راگەهاندنێ دکەت و بینەریا وێ گەنگەشەیا نە دروست دکەت، مێشکێ خۆ بۆ وی لایەنی دبەت یێ کو د وان خولەکان دا باوەریا خۆ پێ ئینای. ئەڤجا هەتتا ئەگەر ئەوی لایەنی راستی نەگوتبیت و خەلەتی د کردارێن خۆ دا کربیت و بەرامبەر خەلکی یێ کێمتر خەم ژی بیت، ئەو گەنجە ل سەر پشتەڤانیا خۆ بۆ وان لێڤەنابیت و ئەو ژی راستیێ دیارناکەت. ل ڤێرە چ رامان بۆ رستەیا “رەوشەنبیریا سیاسی” نامینن, ژبەرکو ئەوان رێکەکا خەلەت ژبۆ پەروەردەکرنا مێشکێ خۆ بەرامبەر تێگەهێ سیاسەتێ بکارئینا, گوهورینا نەوەی د بورینا سالان دا گوهرین د هزر و بیران دا ژی پەیداکریە. هەلبەت ئەڤێ چەندێ پێدڤی ب هندێ یە کو ل سەر هزر وبیرێن وان رازیبوون ل دیڤدا پەیداببیت، لێ ل ڤێرە ژبەرکو مەیدانا سیاسی هەڤرکان ژناڤدبەن و گەلەک یا تەنگە داکو جهێ رەوشەنبیرا بکەت, ژ بلی کو پێدڤیە جیاوازی د بیرو بۆچوونان دا هەبیت داکو رەخنە پەیداببیت و دەما رەخنە پەیدابوو کێماسی دیاردبن و ب ڤی ئاوایی رێك ڤەدبیت کێماسی بهێن چارەسەرکرن کو ئەڤەژی ژ وان خالایە کو پێدڤیە گەنج ل سەر بهێن پەروەردەکرن. نەبوونا گەنجێ سیاسی بۆ دەستهەلاتێ ژی دزڤریت ژبەرکو هندی خودان ریھ سپی زێدە ببن بێ کو کێم ببن و دەلیڤێ نەدەنە گەنجان و هندی کو بروانامێن گەنجان تنێ ب کادرەك ل بارەگاھ و دامەزراوێن سیاسی بهێنە قەلەمدان نە گەنجێن سیاسی دمینن نە ژی رەوشەنبیریا سیاسی.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)