هەر وەکى دیار دنوکە دا بارودۆخێ هەرێما کوردستانێ د قوناغەکا نازک و هەستیار دایە، کو دووبارە د پێکۆلا بهێزکرنا پێگەهێ خوە دایە ل ناوچەیێ و جیهانا نیڤدەولەتى. د ئەڤى بارودۆخێ نوکە دا راگەهاندنا هێزا پاراستنا جەوهەرێ باشوورێ کوردستانێ ل 27 گولانا سالا 2019 ل هەرێما کوردستانێ ئاماژە دانە ب مەترسیەکا مەزن ل سەر ئەمن و ئاسایشا هەرێما کوردستانێ. خویایە کو ئەڤ گروپێ چەکدار گرێداى پارتا کرێکارێن کوردستانێ نە، ژبەرکو ل دەما راگەهاندنا پەیاما وان ئاماژە ب چالاکیا خوە دکەن یا بەرى چەند رۆژان ل دەما هێرش کریە سەر بنگەهێ لەشکەرێ تورکیا ل دەڤەرا زاخۆ. لەورا ئاراستەیەکێ راستە راستە ب هێزێن چەکدارێن پارتا کرێکارێن کوردستانێ، پشتى شکەستنێن چالاکیێن پارتا کرێکارێن کوردستانێ و تالانکرنا باژارێن باکوورێ کوردستانێ د سالێن دەربازبوى دا کو نەشیاین یەک مەتر ژ ئاخا باکورێ کوردستانێ رزگاربکەن. د نها دا ب پیلان و نەخشەیێن هندەک لایەنێن دیتر د پێکۆلا تێکدانا ئارامى و سەقامگیریا هەرێما کوردستانێ دانە.
د راگەهاندنا هێزا چەکدارێن پاراستنا جەوهەرێ باشوورێ کوردستانێ ب هەر دوو زمانێن کوردى و عەرەبى ئاماژە ب تەعریب و تالانکرنێ ل ناوچەیێن هەرێما کوردستانێ دکەن، کو یا سەیر ئەوە بزاڤا تەعریبکرنا ناوچەیێن کوردى دەمەکێ درێژە ژ هێزا پارتا کرێکارێن کوردستانێ دەست پێکرى کو ب سەدەهان گوندێن هەرێما کوردستانێ ل ژێر دەستێ ئەڤان چەکدارێن پارتا کرێکارێن کوردستانێ دانە، کو ناهێلن خەلکێن ئەڤان گوندان ل ناڤ مال و مولک و عەردێن خوە دا ئاکنجى ببن. هەروەسان د خالەکا دیتر دا ئاماژێ ب پاراستنا دەستکەفتێن هەنوکەیى یێن هەرێما کوردستانێ دکەن، کو ددەمەکى دا ئەو بخوە مەزنترین گەفن ل سەر ئەمن و ئاسایش و سەقامگیرى و دەستکەفتێن نوکە یێن هەرێما کوردستانێ. لەورا پێدڤیە حکومەتا هەرێما کوردستانێ رۆلەکێ کاریگەر د ئەڤى بابەتى دا بگێریت و ب زویترین دەم رێگربن ل هەمبەر ئەڤان گروپ و هێزێن چەکدار یێن ل ناڤ ئاخا هەرێما کوردستانێ دا، نەهێلن ئەڤ هێز و چەکدارێن کرێگرتى یێن هندەک لایەنان ب ئارمانج و هیڤیێن خوە ئاشنا ببن ل ناڤ خاکا هەرێما کوردستانێ دا.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)