دوو رۆژە راگەهاندنا دروستبوونا “هێزا پاراستنا جەوهەری” ل باشوورێ کوردستانێ بوویە رۆژەڤەکا گەرم بۆ گەلەك کەس و لایەنان، ب تایبەتی ل دەڤەرا مە و ب تایبەتیتر دناڤ رێزا کادر، ئەندام و لایەنگرێن پارتی دیمۆکراتی کوردستاندا کو ب باوەریا من پتریا وان پەیاما ڤیدیۆیی یا دامەزراندنا ڤێ هێزی نەدیتیە و چ ژ ناڤەرۆکا وێ ژی نزانن. هەمی پێکڤە پەنجا تۆمەتێ بۆ پەکەکێ درێژ دکەن و رەخنەیێن توند ل دروستبوونا ڤێ هێزێ دگرن و وەکو پلانا دوژمنان دبینن کو مەبەست ژێ تێکدانا رەوش و دەستکەفتێن باشوورێ کوردستانێ یە!
هەڵبەت هەر کەسەک ئازادە بۆچوونا خوە دەرببڕیت و ئەز رێزێ ژی لێ دگرم. لێ ل ڤێرە من دڤێت ئاماژە ب دوو خالان بدەم دەربارەی ڤی بابەتی؛ خالا یەکەم کو د پەیاما گرووپا “هێزا پاراستنا جەوهەری”دا هاتییە و ئاماژە ب وێ یەکێ ددەن کو حکوومەتا کوردستانێ نەشیایە ئارامیێ بۆ خاک و خەلکێ هەرێما کوردستانێ دابین بکەت و دروستبوونا ڤێ هێزێ ژی دەرئەنجامێ ڤێ ڤالەهیێ بوویە. هەڵبەت ئەڤە راستییە و حکوومەتا کوردستانێ دماوەیێ ٢٨ ساڵاندا نەشیایە کۆنترۆڵا گەلەک دەڤەران بکەت. بۆ نموونە ل پارێزگەها دهۆکێ ب سەدان گوندێن قەزایێن ئامێدی، شێخان، ئاکرێ، زاخۆ و تەنانەت دهۆکێ ژی هاتینە چۆلکرن و ژلایێ فرۆکەیێن تورکیاڤە دهێنە بۆمبەبارانکرن و خەلکێ وان دهێتە شەهیدکرن و دەرامەت و دارستانێن وان دهێنە سۆتن و حکوومەت نەشیایە چارەیەکێ بۆ ببینیت.
خالا دوویێ یا من دڤێت بەحس بکەم ئەوە کو دبێژن ئەڤ گرووپە سەر ب پەکەکێ یە کو پارتییەکا مەزنا کوردییە و د هندەك دەلیڤەیێن تەنگاڤدا هەلویستێن نەژبیرکری هەبووینە بەرامبەر باشوورێ کوردستانێ. هەری داوی ژی چوونا پەکەکێ بوو دهەوارا شنگالێ کو شیایی رێکێ بۆ ب دەهان هزاران خەلکێ وێ دەڤەرێ خوەشکەت دا بگەهنە رۆژئاڤایێ کوردستانێ و ژ کۆمکوژییەکا مسۆگەر رزگارببن! لەوما پێویستە لەزێ نەکەین بۆ بڕیاردانا ل سەر ڤێ هێزێ و ب گومان بین ژێ و ب پلانا دوژمنان ل قەلەم بدەین. دهەمان دەمدا نابیت دوژمنێن خوە یێن سەرەکی ژبیربکەین یێن کو هەتا نوکە ژی پشتەڤانیا داعش دکەن و دژایەتیا هەر تشتەکێ گرێدای کورد و کوردستانێ دکەن! واتە ب کورتی پێویستە بزانین کو گەف و هەڕەشەیا هەرە مەزن ل سەر مرۆڤ، خاک، دەستهەڵات و دەستکەفتیێن هەر پارچەیەکا کوردستانێ دەولەتێن داگیرکەرن.
