ھەلبژارتن ل كوردستانێ برێڤەدچن ل دووڤ پیڤەرێن بنەمالێن حوكومدار، پاش ئەو بنەماڵ حكومەتێ ل دووڤ وان پیڤەران پێكدئینن و، كەسێن دووبارە پلەیێن حكومی یێن سیادی ل ھەڤدوو بەلاڤە دكەن د ھەر حكومەتەكێدا و ھەڤدوو دگوھوڕن دناڤبەرا وان پلەیاندا و ئەڤ بنەماڵا حكومدار قانوونەكێ دروستدكەت ل دووڤ پیڤەرێن خۆ و رادەستی پەرلەمانی دكەت و ئەو كەسێن بوونە پەرلەمانتار د ڤی پەرلەمانیدا ل دووڤ پیڤەرێن بنەماڵا حكومدارن. لەورا ھەر وان كەسێن دووبارە دھەر حكومەتەكێدا دبینین و سووند دخۆن بۆ وەرگرتنا پلەیێن خۆ. بەری چەند رۆژان مە بەڕێز نێچیرڤان بارزانی دیت یێ سووند دخۆت بۆ پاراستنا مافێ ھەڤوەڵاتیان و یەكسانیێ دناڤبەرا واندا ل رێورەسمێن وەرگرتنا پایەیێ سەرۆكایەتیا ھەرێمێ و ئەڤە پترە ژ (25) ساڵان ئەڤ كەسە یێ سووند دخۆت بێی کو تێبگەھیت رامانا پەیڤا ماف چییە. چونكو دەستھەڵاتێ ل دووڤ رێسایا ھۆزەكییا بنەماڵا خۆ برێڤەدبەت و دان ب دەستووری و قانوونێ ناكەت و پێگیریێ پێ ناكەت. تنێ ھەڤوەڵاتی پێگیریێ پێدكەت، ژبەر ڤێ چەندێ ھەتا نوكە كوردستانێ دەستوورەكێ پەسەندكری نینە مافێن ھەڤوەڵاتیان ب پارێزیت و یەكسانیێ دناڤبەرا واندا بكەت.
ئەڤ كەسە بەحسێ دیموكراتیێ و ئازادیێ دكەن ل ھەرێما كوردستانێ و ھنەك سەركردەیێن دەولەتێن عەرەبی ناڤێن وان ب دكتاتۆریەتی دبەن و نابێژنە خۆ بۆچی د نەھ حكومەتاندا ل ھەرێمێ ھەر ئەو كەسێت دووبارە ژ دوو بنەماڵان (بارزانی و تەلەبانی) دووبارە حوكمی دكەن؟ ئەڤ دیموكراتی و ئازادی ل دووڤ پیڤەرێن وان ھاتییە دانان نەیا دروستە، چونكو مە ھەموویان دیت وان نەھێلا مامۆستا خۆپێشاندانان بكەن و داخازیا مووچەیێن خۆ بكەن و رێ ل وان خۆپێشاندەران ھاتە گرتن و چەند مامۆستا ھاتنە قوتان و چەند رۆژنامەڤان و دەزگایێن راگەھاندنێ ھاتنە گرتن و راستاندن، ئەڤەیە ئازادی؟ یان ئەڤە ئەو ئازادیە ئەوا ل دووڤ پیڤەرێن ھەردوو بنەماڵان بۆ ھەڤوەڵاتیان ھاتیە دروستكرن؟ بنەماڵێن حكومدار دەستدرێژیێ ل مافێ یەكسانیێ دكەن و بەڵگە ل سەر ڤێ چەندێ بەری کو بەڕێز مەسرور بارزانی بهێتە دەسنیشانکرن بۆ وەرگرتنا پۆستێ سەرۆكاتیا حکومەتێ ب دوو رۆژان سەرا دھۆكێ دا و ھاتوچوو قەدەغەكر دا ئەو و ترۆمبێلێن وی بچن. ھەڤوەڵاتی پتر ژ دەھ خولەكان ل بەر گەرمێ راوستیان، ئەڤ كارە دەستدرێژیە ل سەر قانوونا ھاتوچوویێ و مافێ یەكسانیێ، ئەرێ چەوا دێ كەسەك بیتە سەرۆك حكومەت و وی بەری ھنگی ب دوو رۆژان دەستدرێژی گریە ل سەر قانوونێ و مافێ ھەڤوەڵاتیان؟ ئەڤ چەندە دیاردكەت كو ئەڤانە دگەل ھەڤوەڵاتیان یەكسان نینن. حكومەتا نوو وەكی یێن بەرێ ژ وان و كوڕێن وانە پێكدئێت ئەوا ل بەرێ ھەی دێ نھۆ ژی ھەبیت د حكومەتا نوودا. ئەوان كەسان د حكومەتێن بەرێدا دەستوور ژ كارئێخستیە و بێ رێز كرییە ل ھەرێمێ و، دەستوور دانایە ل بن پێیێن خۆ داكو بەردەوامیێ بدەنە دەستھەڵاتێ. ل سەر دەمێ حوكمێ وان ئەو د خۆشیاندا مان و ھەڤوەڵاتی دنەخۆشیێن ژیانێدا مان و، وان ماف نەما ژیانەكا باش بژین كو زێدەكرنا دەمژمێرەكا كارەبێ بوو مزگینی ل سەر دەمێ وان.
ئەو تشتێ ژ سەردەمێ بەعسیان مای ئەو ژی ھاتنە خرابكرن وەك نەخۆشخانەیێن حكومی ل ھەر سێ پارێزگەھان كو نە دەرمان و چارەسەریا تەندروستی لێ ماینە و ھەڤوەڵاتیێپێ چێدبیت نەچار دبیت بەرێ خۆ بدەتە وەڵاتێن دیتر وەك توركی و ئیرانێ. لێ ھەڤوەڵاتیێ دیتر دگەل نەساخیا خۆ دمینیت ھەتا دمریت و بنەماڵێن حكومدار نەساخێن خۆ فرێدكەنە ئەمریكا یان ئەورۆپا بۆ چارەسەریێ، ھەروەسا كارگەھا مەعجوونێ تەماتێ ل دھۆكێ ل سەر دەمێ بەعسیان، بوویە پرۆژێ شوقان ل سەردەمێ حوكمێ وان پێخەمەت یەك كەس بتنێ مفای ژێ دكەت. ھیچ پرۆژەكێ بەرھەمێن كشتوكالی نەبوویە كو بەروبومێن كشتوكالی بكەتە بەرھەمێن پێشەسازی ل بازارێن ھەرێمێ بھێنە فرۆشتن. لێ وان ھەرێم كریە بازاڕەك بۆ فرۆشتنا بەرھەمێن توركی و ئیرانی. ئەوانا گەلەك كەسێن نەھەژی فرێكرینە زانكۆیان ب ڕێیا بڕیارێن خۆ نەك ب قانوونێ. ئەوانا فیلمێ قەیرانا دارایی دروستكر دا ژیان ل سەر ھەڤوەڵاتی قورس ببیت و ئەو بەردەوامیێ بدەنە حوكمێ خۆ. ئەوانا دوڤچوونا ئێك گەندەڵ و كوژەك نەكریە، لێ پلەیێن بلنتر داینە وان. ئەڤە ھەموو بەڵگەنە كو ئەڤ بنەماڵە نەدسەركەفتی بوون درێڤەبرنا حكومەتێدا و ل سەر دەستێن وان ھەرێم پاشكەفتیە. ل دوماھیێ دێ بێژم دیموكراتیەك دگەل برسایەتیێ نینە، دادوەری ژی دگەل نەبوونا یەكسانیێ نینە و ئاڤادانكرن ژی دگەل ھەژاری نینە. لێ نەبوونا دەستووری و قانوونێ و نەبوونا رۆشەنبیریا ھەڤوەڵاتی كاك نێچیرڤان بارزانی دكەتە سەرۆك ھەرێم و پسمامێ وی کاک مەسرور بارزانی دكەتە سەرۆك حكومەت.