ناکۆکی ئەو بارودۆخە یێ نە ئارام یان فشارا دەروونی ئەوا دروست دبیت ژ ئەگەرێ نە رێککەفتنێ دناڤبەرا دوو لایەنان یان ژی زێدەتر، ژبەر پێدڤیێن تاکە کەسی و گروپ و پارتان. ناکۆکی دھێتە ھژمارتن ئێک ژ وان دیاردەیان یێن کو ل دەمێن کەڤنار دا ل دەڤ تاکە کەسان ھەبوویە و یا بەردەوامە ل سەر دەستھەلاتێ یانژی ھەر کارەکێ ئارمانجا وان دناڤ دا ھەبیت. ناکۆکیا سیاسی ھەڤرکیەکا تایبەتە دناڤبەرا مرۆڤان دا بۆ ب دەستڤەئینانا دەستھەلاتێ یان وەرگرتنا ھندەک پاداشتان. ئەو لایەنێن ئەڤێ ھەڤرکیێ دکەن خواندنەکا دوور بۆ دکەن. ئەگەر بۆ وان دیار بوو کو ل پاشەرۆژێ دێ رویدان ھێنە پێش نەچار دبیت بەرەڤ وەرگرتنا ھەلویستان دچیت ب پێچەوانەی لایەنێ بەرامبەر. قەبارێ ئەڤێ ھەڤرکیێ گرێدایە ب قەبارێ ئەوێ ئارمانجێ ڤە. ئارمانج چەند مەزنتربیت ھەڤرکی دێ رژد و دژوارتر بیت، ھندەک سیستەمێن سیاسی شیان ھەنە خۆ ل بەر ئەڤان ھەڤرکیان بگرن و ھندەک سیستەم نەشێن خۆ ل بەر بگرن. لەورا بەرەڤ لاواز بوون و نەمانێ ڤە دچن. پێکڤە گرێدانەکا موکم دناڤبەرا ھەڤرکیێن ئابووری و سیاسی و رەوشەنبیری ھەیە، لەورا جڤاک ھەمی ب ئەڤان ھەڤرکیا ڤە یێ گرێدایە.
پشتی کو ھەلبژارتنێن پەرلەمانێ ھەرێما کوردستانێ ھاتینە ئەنجام دان ل ٣٠ ئەیلولا سالا ٢٠١٨ و پاش راگەھاندنا ئەنجامان، ھندەک لایەنێن سیاسی پێکۆلا ئەوێ چەندێ دابوون کو زێدەتر ژ پێگەە و دەنگێن خۆ پلە و پۆستەیێن زێدەتر ب دەست ڤە بینن، سەرەرای ھندێ کو ئەو پارت خوە ب دیموکراسی ژی بناڤ ددانن!. ڤێرێ ھەڤرکیا سیاسی دناڤبەرا دوو پارتێن سەرەکی یێن ھەرێما کوردستانێ روویدا کو پارتی دیموکراتی کوردستان و ئێکەتیا نیشتیمانی یا کوردستانی نە. سەرەرای چەندین دانوستاندێن ئاشتیانە و دبلۆماسی یێن بەردەوامێن پارتی دیموکراتی کوردستان و ئیمزاکرنا رێکەفتنامێن دوو قۆلی دناڤبەرا پارتێن سیاسی دا ژ پێخەمەت زوی دەست ب کارکرنا کابینەی نوی یا حکومەتا ھەرێما کوردستانێ. لێ دەما پارتەک یان لایەنەک ھەست ب کێم بوونا پێگەھێ خۆ دکەت ئێدی دەست ب وەرگرتنا ھندەک رەفتارێن نە رەوا دکەت و ھەڤرکیا سیاسی ل سەر دەستڤەئینانا ھندەک ئارمانجێن پارتایەتی یێن دوور ژ نەتەوەی و نیشتیمانی دکەت. ئێکەتیا نیشتیمانی یا کوردستانی کار ژ بۆ گیروکرنا پرۆسەیا سیاسی یا نوی ل ھەرێما کوردستانێ کر. سەرەرای پێشێلکرنا وان رێکەفتنامێن دناڤبەرا پارتی دیموکراتی کوردستان و ئێکەتیا نیشتیمانی یا کوردستانی.
پشتی کۆمبوونا پەرلەمانێ کوردستانێ ل رێکەفتی ٢٨ گولانا سالا ٢٠١٩ ل دور ھەلبژارتنا سەرۆکێ نوی یێ ھەرێما کوردستانێ، سەرەرای ھندێ کو ھندەک لایەنێن سیاسی ھەڤرکیێن سیاسی ب پەکخستنا ھەلبژارتنا سەرۆکێ نوی یێ ھەرێما کوردستانێ ڤە گرێدان. زێدەباری لاوازیا رۆلێ وان، پەرلەمانێ ھەرێما کوردستانێ شیان ب زۆریەنەیا دەنگان دووەمین سەرۆکێ ھەرێما کوردستانێ (نێچیرڤان بارزانی) ب ھەلبژێرن، ل رێکەفتی ١١ خزیرانا سالا ٢٠١٩ ل رێورەسمێن سویند خارنا سەرۆکێ نوی یێ ھەرێما کوردستانێ (نێچیرڤان بارزانی) کو ئەڤ رێورەسمە ژ کۆمبوونەکا ھەرە مەزنا دبلۆماسی یا دەڤەرا رۆژھەلاتا ناڤەراست دھێتە ھژمارتن کو ب ئامادەبوونا ژمارەکا ئێکجارا مەزن ژ نوینەرێن وەلات و پارت و لایەنێن سیاسی یێن ھەمەجۆر ھاتە برێڤەبرن. د گووتارا سەرۆکێ نوی ھەرێما کوردستانێ دا ئاماژە ب خالەکا گەلەک گرنگ دا، ئەو ژی دا دیارکرن کو ھەڤرکیێن سیاسی دێ ھەر ھەبن و تشتەکێ ئاسایی یە، لێ بلا ھزرکرنا مە ناکۆک نەبیت. دیسان ئاماژە دا کو ل شوینا ئەم کار ل سەر بنپێکرنا پێگەھێن ئێک دوو بکەین، بلا کار ل سەر بنیاتەکێ نوی بکەین بۆ ڤەدیتنا چارەسەریێن ھەڤپشک بۆ ئایندەکێ گەش ژ بۆ ھەرێما کوردستانێ. ل ڤێرێ بۆ مە دیار دبیت کو کارێ داھاتیێ سەرۆکێ ھەرێما کوردستانێ دێ گرنگیەکا مەزن ب کێمکرنا ھەڤرکیێن سیاسی ل سەر ئاستێ ھەرێما کوردستانێ کەتن و بزاڤا ئێکرێزکرنەکا سەرتاسەری کەت ل سەر ئاستێ پارتێن سیاسی یێن ھەرێما کوردستانێ ژ پێخەمەت دەستڤەئینانا ھیڤیێن مەزن یێن نیشیتیمانی و دویر ژ بەرژەوەندیێن بەرتەنگێن پارتایەتی.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
