ژن یەک ژدوو پێکهاتەیێن مرۆڤایەتیێ یە. تمامکەرا نیڤا ژیانێ یە. نەمەزنتر ژ قەبارەیێ وێ نەژی بچووکتر ژ ئافراندنا وێ مرۆڤە. ژن قوربانیا نەپەنی یا تێگەهەکە کەڤنارە. ژبەرکو کورد ددیرۆکا خوە یا رەش دە ب گەلەک رەنگان هاتنە خوینڕێژکرن، مالتالان کرن، ژیان بنبڕکرن و جەرگهەڕاکرن و نەشیاینە مینا مللەتێن د گەردون دە هەولێن پێشخستنا هزری و رۆناکبیریێ بکن. هەر مژویلی دووبارە و سێبارە ئاڤاکرنا هێلینا خوە یا خواری بوونە. ژ لەو دەم ژ دەست کرنە و مەزنترین قوربانی ژی ژن بوویە. هەر ژ سەردەمێ کو رەگەزێ نێر خوە سەپاندن کریە ل سەر ژنێ و ل ژێر تێگەهێ کو ژیان ژبۆی مێرانە و ژن ژی ژبۆی خوەشیا وان ل دونیایێنە، شیاینە هزرگەها ژنێ رەزیل بکن و وان وسا تێبگەهینن کو ژبۆ خوە ناز و جوانکرنێ هاتنە هەبوونێ و زیرەکیا وان دراکێشانا سەرنجا رێژا هەرە زۆرا مێران دەیە. حەیا وی رادەیی کو ئەو ب خوە سامانێ مێرانە و مینا ئامیرەیەکێ یە ژبۆ ئینانا زارۆکان و گەر زارۆک نەبن هەست ب کێماتیا ژنبوونێ بکت. شیان گەلەک پرسێن دبەرژەوەندیا خوەدە دژیاندنێ دە بکن تیلال و ل ژێر دروشمێ ئاین و تیتالان وەسا ب ژنێ بدن تێگەهاندن کو ژن شەرەف و کەرامەتا وانە پتر وێ چەندێ کو هزر د کەسایەتی و کەرامەتا خوە دە بکن.
ئەڤ کارتێکرن یێن سەردەمەکێ بوری یێ جیهانێ بوویە، نە ب تنێ کوردان لێ رێژەیەکا هەری زۆر دناف جڤاکێ کوردان دە خوەجهبوویە و مایە. ژوی سەردەمی بۆ ڤی چەرخی هێژی پرانیا کچان پەنایێ دبنە بەر بڕیاردانەکا خەلەت، ئەو ژی قاسی هزر د رازیبوونا هەڤژین و بابێ خوەدە دکن، نکارن ئەو قاس هزر بکن کو ئەو بخوە بڕیارێ ل سەر پرسەکێ بدن کو ئەو بخوە خوە تێدە ببین. ئەڤە ژی دبت ئەگەر کو بێ رێزی ل هەمبەر مرۆڤبوونێ بئێتە کرن هەم دژیانا رۆژانەدە هەم ژی دتۆرێن جڤاکی دە. نەبوونا ئازادیێ و هەبوونا رێژەکا زێدە یا ترسێ دژیانا رۆژانەیا ژنا دجڤاکا مەدە دبتە ئەگەر کو رەفتارێن نەجوان بئێنە کرن بۆ نموونە سەرشۆرکرنا کچێ بەرامبەر کوری ب بەهانەیا شەرمێ کو بۆ ئاینان دزڤرینن و ب ڤێ پیرۆزییێن ئاینی ژی قوربانی تێگەهەکە تەڤنگرتی و تاوانبار دکن. دیسان دتۆرێن جڤاکی دە ببن قوربانی کچبوونەکە بندەست. بکارنەئینانا کەسایەتیا خوە یا راستەقینە و پەنابرن بۆ بکارئینانا وێنەیێن پارچەیێن لەشێ کچە ئەکتەرێن بیانیان ل سەر رووپەلێن خوە یێن تایبەت، و یا هەری زێدە دجڤاکا مەدە تێ دیتن دکە کو هەرەشەیێن ترسنۆکترین کور ل سەر کچێن بوێر هەبن!
ژن دناڤا جڤاکەکە ژنکوژدە دڤێ شۆڕەشەکە ئازادیێ دناف خوە دە پاشان دناف خێزان و جڤاک دە لداربخن بواتەیا شۆڕەشگەریێ. ژبەرکو ئەوا تێ دان نەئازادیە بەلکو ئازادیخواز ئازادیێ وەردگرن. ژبۆی وان ئارمانجێن ل جهێ پەیدابوونا خوەدە ماینە حەیف کوشتیێن کو دژین حەیف بکوشتیێن مری بێ.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
