هەبوونا ئافرەتێ د ناڤەندا سیاسی و دەولەتێدا هێزەکە بۆ چەسپاندنا ماف، ئەرک و کارێن ئافرەتێ بۆ هندێ ئافرەت ل دويڤ هەبوونا خۆ بگەريت و كاربكەت بۆ پێشخستنا جڤاكى. ل کوردستانێ ژی هەمی گاڤا گازندەیا وێ یەکێ دهێتە کرن کو ‘بۆچی ئافرەت نەيا ديارە دگۆرەپانێدا!’ ئەم ژی دبێژین مخابن کو ئەو ئافرەتێن کورد یێن دناڤەندێن بڕیار و دەستهەڵاتێدا کارەکێ وەسا نەکرینە کو ببنە هاندەر بۆ ژنان و خورتکرنا پێگەهێ وان. بۆ نموونە خاتوو (هيرۆ ئیبراهيم ئەحمەد) کو خەباتکەر، سیاسەتمەدار و سەرکردەیەکا ناڤدار و هەڤژینا رێبەر و سەركردەيەکێ ناڤدارێ کوردستانێ یە، خودان هێزا دووەمينە ل كوردستانێ و تەمەنەكێ درێژ دناڤ شۆرەش و رێڤەبەریێدا هەیە. لێ ب باوەرییا من تا نوكە هيچ كارەك وەسا نەکرییە بۆ پێشڤەچووبرن، پاراستن و بهێزکرنا پێگەهێ ئافرەتا كورد و نابینم کو خزمەتەكا بەرچاڤ ژی بۆ ژنا كورد کربیت کو هەژی ئاماژە پێدانێ بیت.
ئەو خانما سەرکردە دنووترین ئاخفتنا خۆدا دبێژیت “ئەز دەولەمەند نينم و گرنگى ب پارەى نادەم”. لێ من تێبینی ل سەر ڤێ ئاخفتنا خانما مەزن هەیە و دبینم کو وێ گەلەک گرنگی پارە و پۆستان دایە و ل گۆر زانیاریێن کو دهێنە بەڵاڤکرن ب تایبەتی داراییا پارتییا وێ ددەستێن وێ دایە. ب راستی مخابنە کو خانمەكا سەرکردە و ئازا و ئازاد دناڤ حزبەكا مەزن یا کوردستانیدا هەبيت کو دەستهەلاتێن وێ ژ یێن گەلەک سەرکردە و رێبەرێن کورد زێدەتر و کاریگەرتربن و کارەک نەکربیت و تنێ یەک ژن ژی نەئینابیتە پێش و دەستێ وێ نەگرتبیت کو رۆلێ خۆ بگێریت. گەلۆ پا كى دێ پشتەڤانیا ژنان کەت؟! ب دەهان ساڵان ئەم چاڤەرێ بووین و نوکە تەمەنێ وێ ژى ب سەرچوویە و دبیت ئێدی ئەو تاکە ژنا سەرکردە ژی ژ گۆرەپانێ دەرکەڤیت، بێی کو رۆژەکێ هەلویستەکێ جدی ژی وەرگرتبیت ل سەر رویدانێن کوشتن، دەستدرێژیکرن، شویدانا ب زۆری، بێبارکرنا کچان ژ خاندنێ و گەلەک کارێن دی یێن دژی کچان و ژنان دهێنە کرن، کو ئەو هەلویستە ددیرۆکا وێدا هاتبانە تۆمارکرن و وەکو شانازی بۆ وێ مابا و درێکا وێدا بۆ هەمی ژن و ئافرەتێن کوردستانێ.
لەوما ئەم دبێژین ئەگەر سەرکردەیەک و خێزانا سەركردەكێ مەزن بەحسا مافێن ئافرەتا کورد نەكەت كو شۆرەشگێر، خەباتكەر، دەيكێن شەهيدان و ئەگەرێ هەبوونا نفشێ كورد بووينە. ب سەدان رێكخراو و سەنتەرێن دیژی بهێنە دامەزراندن و بەحس ل مافێ ئافرەتێ بكەن بێ سوودە.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)