ئه‌و شه‌ڤا جیرانا مه چوویه به‌ر دلۆڤیانیا خودێ, ده‌نگوباسێ مرنا وێ كه‌سێ باوه‌رنه‌كر. چونكو به‌رده‌وام ئه‌و ل به‌ر ده‌رگه‌هی یا روینشتی بوو و هه‌ر كه‌سه‌كێ د كۆلانێ را ده‌ربازببا دا گازی دكه‌تێ و هنده‌ك پسیارا ژێ دكه‌ت (تۆ ژكیڤه دهێی, دێ چ كه‌ی و…هتد؟) یان ژی دا بێژیتێ وه‌ره بێهنه‌كێ ده‌ف من روینه خار. ئه‌و یا ب ناڤسالڤه‌چویی بوو. ب ڤێ رێكێ دا هنده‌ك ژ خه‌م و ئازارێن خۆ كێم كه‌ت و بێهنه‌كێ سه‌برا خۆ ئینیت و هنده‌ك ژ سه‌رهاتیێن خۆ ڤه‌گێریت. به‌لێ ئه‌ڤ شه‌ڤا چوویه به‌ر دلۆڤانیا خودێ هه‌ر كه‌سه‌كی گووت كا به‌ری چه‌ند رۆژا یان ده‌مژمێرا من دیتیه. هنده‌كا دگووت: چاوا مر؟! دوهی من دیتبوو، هنده‌كا دگووت سپێدی بربوو خه‌ستێ یا باشبوو. به‌لێ هه‌میا ژبیركربوو كو مرن گه‌له‌ك ژ رۆژ و ده‌مژمێران نێزیكتره، مرن ب چه‌ند چركه‌كێن گه‌له‌ك كێمن كو مرۆڤ باوه‌رناكه‌ت. هه‌میا گووت خۆزی ئه‌م هه‌رده‌م ل ده‌ڤ روینشتباینه خار و مه نه‌گووتبا بۆچی گازی مه دكه‌ت.
مرن یا هۆسایه د وان چركان دا مرۆڤ ددلێ هه‌میان دا خۆشتڤی لێ دهێت. مرن مرۆڤی دكه‌ته بیرهاتنه‌كا بچویك د هزرا هه‌ر كه‌سه‌كی دا هزره‌كا بچویك كو مرۆڤی دڤێت به‌رده‌وام وان بیرهاتنا دهزرا خۆدا دووباره‌كه‌ت. پشتی مرنا مرۆڤی هه‌می حه‌ژێكرنا خۆ بۆ مرۆڤی ده‌ردبرن. هه‌می په‌شێمانی و لێبۆرینا خ بۆ مرۆڤی ده‌ردبرن. به‌لێ د وی ده‌می دا ڤان په‌یڤان چ بهایێ خۆ نینه، چونكو مه دڤێت ڤان په‌یڤان گولێ بین ده‌مێ ئه‌م ساخ و دژیانێ دا. مرن یا ته‌حله به‌لێ مرۆڤی شرین دكه‌ت. بلا ئه‌م كه‌رب و كینێ پاڤێژین به‌ری مرن مرۆڤی بكه‌ته بیرهاتن، بلا ئه‌م حه‌ژ ئێك و دوو بكه‌ین. به‌ری مرن مه ژێكڤه‌كه‌ت. مرن گه‌شته‌كا بێ زڤرینه. ده‌لیڤێ ناده‌ته‌مه ته تۆ بێژیه وی كه‌سی كا چه‌ند بۆ مرنا وی خه‌مگین بووی. هۆسا حه‌ژ كه‌سێن ده‌وروبه‌ری خۆ بكه كا چاوا دێ حه‌ژێ كه‌ی ده‌مێ ئه‌و دمرن.
· مامۆستا
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)