يا خويايه ل عێراق و هه‌رێمێ ده‌ما كه‌سه‌ك خوه به‌ربژار دكت بۆ په‌رله‌مانتاريێ، ل پێشيیا هه‌ر تشتى وى چاڤ يێ ل به‌رژه‌وه‌نديێن خوه و پارتا خوه. ژ جۆرێن هه‌مى ئيمتيازاتان، مووچێ زه‌به‌لاح، كرينا ترۆمبێلان، ناڤمالى، ئيفاد، حه‌سانه و بازرگانیكرنێ و… هتد. راسته وان بۆ خوه كرينه د قالبه‌كێ قانوونیدا و ب مافه‌كێ ره‌وا يێ خوه دزانن. لێ ئه‌ز گه‌له‌ك حێبه‌تى دبم ده‌ما په‌رله‌مانتاره‌كى دبينم ب هه‌مى وێره‌كى و هێشتا قانوونه‌ك ژى ژبۆ به‌رژه‌وه‌ندیا گه‌ل و وه‌لاتى په‌سه‌ند نه‌كرى، بێى شه‌رم ژ خوينا شه‌هيدان بكت يێن کو هێشتا ئاخا سه‌ر گۆرا وان هشك نه‌بى، ژ رۆندكێن مالباتێن وان کو هنده‌كان هێشتا كه‌له‌خێن وان نه د ديار، ژ ره‌نج و خه‌باتا پێشمه‌رگێن قاره‌مان کو هێشتا برينێن وان ساخ نه‌بين و ده‌نگێ گوله، تۆپ و هاونێن دۆژمنى و هه‌وارێن برايێن وان يێن شه‌هيد ل به‌رۆكێن شه‌رى ژ گوهێن وان ده‌رنه‌كه‌تين. هەروەسا ژ مانديبوونا مامۆستا و فه‌رمانبه‌ران کو ل رۆژێن قه‌يرانان د سه‌ر هه‌مى حالان را نه‌هێلان پرۆسێسا خواندنێ براوه‌ستت و دام و ده‌زگايێن حكوومه‌تێ په‌ك ببن، ب چارێك و نيڤ مووچه و 40 بۆ 50 رۆژان جاره‌كێ و هێشتا چاره‌نڤيسێ پاشكه‌وتێ وان ژلايێ جه‌نابێ په‌رله‌مانتارانڤه نه‌هاتى يه قانوونى و دياركرن.
رووى ره‌شى يه ده‌ما تۆ بێى وه‌لاتێ خوه بەراورد کەی دگەل عێراقا هه‌رفتى و هه‌تا حه‌فكێ فه‌تسى ژ گه‌نده‌ليێ، یان په‌رله‌مانێ وێ يێ فاشلترين ل سه‌ر ئاستێ جيهانێ کو خه‌ما وان ب تنێ دزين و تالانكرنا مالێ گشتى و خوه‌شگۆزه‌رانیيا مالباتێن وانە! لێ وه دياره هوين ژى بهه‌مان شێوه‌نه. پا وه نه‌دگووت دێ كوردستانه‌كا بهێز ئاڤاكین و چاكسازيان كین؟!، مانه ئێكه‌م جار پێدڤى يه ئه‌ڤ ئيمتيازاته حه‌ده‌ك بۆ بێته دانان، بنديوار، دز، گه‌نده‌ڵ، مافيا، بازرگانێن ده‌رمانێن سه‌خته، مادەیێن بێهۆشكه‌ر و خوارنێن بسه‌رڤه‌چوویی نه‌هێلن؟!
تۆ دبێژى مافێ مه‌يه مينا يێن جيهانێ و د ده‌مه‌كى دا نزانى ب تنێ ل عێراق و كوردستانێ ئه‌ڤ ئيمتيازاتێن نه به‌رمێشك هه‌نه؟. خوه‌زى وه‌ژى وه‌ك يێن جيهانێ خزمه‌ت كربا بلا وە سێ جاران هنده وه‌رگرتبان. هه‌ر بۆ زانينا كه‌كێ په‌رله‌مانتار ل زۆربه‌يا په‌رله‌مانێن جيهانێ کارێ په‌رله‌مانتارى تنێ خزمه‌تكرنا گه‌ل و وه‌لاتى يه، بێى ترۆمبێل، مووچێ زه‌به‌لاح، ڤيلا و پاسه‌وانێن كه‌سايه‌تى ده‌واما خوه به‌رده‌وام دكن! به‌لكو گه‌له‌ك ژ وان ب پاسێ و نه‌فه‌رى د چنه ده‌وامێ و يێن د شوقێن بچوويك ڤه و ئاكنجى نه و قستێن وێ ژى هه‌يڤانه ژێ دئێنه بڕين و جاران هه‌تا دره‌نگ ل ده‌وامێ دمينن و كاردكن بێى ده‌مژمێرێن ئيزافى، به‌لكو ب ئه‌ركێ خوه دزانن !.
رووى ره‌شى يه تۆ هه‌مى مافێن وه‌لاتيان ژبير بكى و وان هه‌مى پرۆژه قانوونێن گرنگێن تۆزگرتى بهێلى و به‌حسا ئيمتيازاتێن خوه بكى. لێ نه بناسێن وه‌‌نه، به‌لكو يێن وانن يێن ده‌نگێ خوه ددنه وه و ل شوينا سزادانێ هه‌ر جار وه پاداشت دكن.
ئه‌ڤجا لێ سياربه و پاژۆۆۆۆۆ ده‌شته، كه‌كێ په‌رله‌مانتار!
· مافپه‌روه‌ر
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)