بالانسا سیاسى د سیستەمێ دیمۆکراسىدا پێدڤى ب هەبوونا دوو ئاراستەیانە. ئاراستەک وەک دەستهەلات کار بکەت و ئاراستەک وەک ئۆپۆزسیۆن کاربکەت. هەلگرێن ناسناڤێ ئۆپۆزسیۆنێ پێدڤى ب ئەجندایەکێ رێک و پێک هەیە کو دشیان دا بیت ڤالاتى و کێماسیێن د سیستەمێ سیاسى دا دەست نیشان بکەت، پاشان رادبیت ب ڤەدیتنا چارەسەریان بۆ ئەوان ئاریشەیان ب ئامرازێن جۆراوجۆرێن ئاشتیانە گڤاشتنێ ل لایەنێ دەستهەلاتدار بکەت ژ پێخەمەت چارەسەرکرنا ئاریشەیان. زورینەیا شارەزا و ئەکادمیێن زانستێ سیاسى تەکەزێ ل سەر هەبوونا ئۆپۆزسیۆنەکا ب هێز دکەن ل ناڤا سیستەمێ دیمۆکراسى دا. کەواتە سیتسەمێ دیموۆراسى بێ هەبوونا ئۆپۆزسیۆنێ چ رامان نینە. مەرج نینە هەر لایەنەکێ سیاسى پشکداریێ د حکومەتێ دا بکەت سەرکەفتنێ بینیت. جاران پارتێن سیاسى یێن ل دەرڤەى حکومەتێ شیاینە رۆلێ خۆ زێدەتر ژ پارتا دەستهەلاتدار بگێریت.
پشتى راگەهاندنا ئەنجامێن هەلبژارتنێن پەرلەمانێ کوردستانێ ل 30 ى ئەیلولا سالا 2018 و پەسەندکرنا ئەنجامان ژلایێ دەستهەلاتا دادوەرى ل 20 چریا ئێکێ یا سالا 2018، ئێدى دەرگەهێن پارتێن سیاسى چاڤەرێ هاتنا شاندێ پارتى دیموکراتى کوردستان کر ژ پێخەمەت گفتوگۆکرن ل سەر بەشداریکرن دکابینەیا حکومەتا نوى دا. زۆرینەیا پارتێن سیاسى یێن کوردستانى د خازن پشکداریێ د پلە و پۆستێن حکومى دا بکەن ژ پێخەمەت جێبەجێکرنا هندەک ئارمانجێن پارتایەتى و دبیت هندەک ئارمانجێن گشتى بن. لێ پرانیا وان دچارچۆڤێ پارتایەتى یا بەرتەنگ دانە. ئێک ژ ئاریشەیێن سەرەکى یێن کۆمەلگەها کوردى نەبوونا ئۆپۆزسیۆنا سیاسى یە کو ئەرکێ ئۆپۆزسیۆنا سیاسى ل هەر جڤاک و کۆمەلگەهەکێ گرنگیەکا ئێکجار مەزن هەیە کو رادبیت ب کۆمکرنا پێزانینان ل سەر کارێن دەستهەلاتێ و چاڤدێریکرن ل سەر کارێن دەستهەلاتێ و رەخنەگرتن ب شێوەکێ بابەتى. هەروەسان کۆمەکا ئامرازان بکاردئینیت وەک لێپرسین د پەرلەمانى دا ب رێکا نوینەرێن خۆ و رەخنەگرتن ل یاسا و بریارێن دەستهەلاتێ و دیارکرنا فایلێن گەندەلیێ. ئەو ژى ب لڤاندنا رایا گشتى ب ئامرازێن شارستانى و دویر ژ هەلگرتنا چەکى.
یا سەیر ئەوە کو ل کۆمەلگەها کوردى ژ پێخەمەت دەستکەفتێن و پۆستێن زێدەتر، پارتێن سیاسى بەرژەوەندیا خۆ یا تاکە کەسى ئێخستیە بەرى بەرژەوەندیا گشتى و بوینە هۆکارێن بۆشاییا سیاسی ل هەرێما کوردستانێ. ژبەرکو ناخازن و رازى نابن ب ئەرکێ ئۆپۆزسیۆنێ رابن. لەورا یا پێدڤى یە ئەم هەمى هاولاتیێن کوردستانى رێکێ بدەین کو مە ئۆپۆزسیۆنەکا کارا و بهێز هەبیت کو رابیت ب کارێ چاڤدێریکرن ل سەر کار و چالاکیێن حکومەتا نوى. دەرفەتێ بدەین کو مە حکومەتا بهێز هەبیت فاکتەرێن بهێز بین ژ بۆ بنیاتنانا کوردستانەکا ئارام و ئاڤەدانکرى و رێکێ نەدەین چ کەس و گروپ یاریان ب چارەنڤیس و داهاتێ ئەڤى مللەتى بکەن.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)