ھندەك نەزان دبێژن، پاشئێخستنا پێكئینانا حكومەتا نوو ل ھەرێما كوردستانێ تشتەكێ ئاسایی و سروشتییە كو باشترە بۆ بەرژەوەندیا كوردستانەكا ب ھێز، لێ ئەڤە ئاخفتنەكا نەیا راستە و گەندەڵە. پاشئێخستنا پێكئینانا ڤێ حكومەتێ د بەرژەوەندیا پارتێن گەندەڵە ئەوێن دڤێن پتر گەندەڵیێ بكەن و ھەژموونا خۆ بێخنە سەر پارتێن ھەڤڕكێن خۆ و پتر خۆ ل سەر مللەتێ ئەو ھەلبژارتین ب سەپینن ب ھێجەتا دابینكرنا ژیانەكا باشتر و جێگیر بۆ ھەڤوەڵاتیان. لێ ھەر ئەو سەروچاڤن و دێ ھەر كارگێریا وان یا گەندەڵ یا بەردەوام بیت. بەرژەوەندیا گەندەڵان ڤان پارتان ل پاشئێخستنا پێكئینانا حكومەتێ دابەشكرنا بیرێن گازێیە دناڤبەرا خۆدا و دابەشكرنا پایەیانە ل سەر كەسێن نە ھەژی بۆ بەرژەوەندیا وان نە بەرژەوەندیا ھەڤوەڵاتی. ل دووڤ بۆچوونا من، ئەو ھەلبژارتنێن ھاتینەكرن كو ل سەر بناغێ وێ دێ حكومەتا نوی ھێتە پێكئینان، ھەلبژارتنێن باتلن. چونكو بنەمایەك د قانوونێدا ھەیە (ئەو تشتێ ل سەر باتلی ھاتبیتە ئاڤاكرن یێ باتلە)، چونكو بەری ھەلبژارتنان نەتەوا كورد دناڤبەرا وان پارت، ھۆز و ئاغاواتاندا ھاتە دابەشكرن و، دڤەرێن بادینی و سۆرانی دیار بوون و ھۆزێن جۆراوجۆر ھاتنە پێش و نەتەوە ھاتە پاشخستن.
ل سەر ڤی بناغەی ھەلبژارتن ھاتنەكرن، نە ل سەر بناغەیێ نەتەوەیی یێ كوردی یێ ئێكگرتی، نە ل پێناڤ كیانەكێ كوردی یێ ئێكگرتی، نە ژبۆ پێكئینانا حكومەتەكا كوردی یا پاقژ یان ل پێناڤ پاشەڕۆژەكا ئێكگرتی كو تێدا خەونێن دەولەتەكا كوردی ل سەر بھێتە ئاڤاكرن بۆ ڤی نەتەوە و مللەتی. چونكو نەیا دروستە پێكئینانا حكومەتێ و كارگێریا ھەرێمێ ل سەر بناغەیێ وان كەسێن خۆ دكەنە دەستھەڵاتدار و درۆشمێن وان یێن درەو ب ناڤێ كوردستانێ ل پێناڤ دزی بھێتەكرن و درەو ل ھەڤوەڵاتیان بھێتەكرن ژبۆ دووبارە ھەلبژارتنا وان دا بەردەوام بن ب تاڵانكرنا ڤی مللەتی.
ئەو كەسێن ھزردكەن فەرمانڕەوایێن كوردانە، دڤێا نێڕیبا سەربوورێن حوكمی ل ئەمریكا و دەولەتێن ئەوروپی كانێ ئەو چەوا ماف، ئەرك، ئێمناھی و ئارامیا وەڵاتیێن خۆ د پارێزێن ل پێناڤ پێكئینانا حكومەتەكا پاقژ و ل پێناڤ ئاڤاكرنا نەوەیەكێ پاقژ ژبۆ كارگێریا ھەرێمێ. لێ وان نێریە دكتاتۆرێن عەربان ئەوێن دزی ژ مللەتێ خۆ كرین و دەستھەڵات بەرنەداین ھەتا وەڵاتێن خۆ خرابكرین وەك یەمەن، سودان، سووریا، عیراق و…ھتد كو ئەوژی دەستھەڵاتێ بەرنادەن و یێ وەك وان دكەن و ئەڤ چەندە د قانوون و قورئانێدا نەھاتیە حوكم ژ بابێ بۆ كوڕی و نەڤیان بیت یان دێ وەڵاتی ل سەر سەرێ ھەڤوەڵاتیان وێرانكەن. ئەو پارتا ل ھەلبژارتنان دەرچووی، ئەنقەست پێكئینانا حكومەتێ پاشتخێست كو ئەڤە حەفت ھەیڤ بسەرڤەچوون، ئەگەر دیموكراتی و ئازادی ھەبا دڤیا حكومەت پشتی ھەلبژارتنان ب چەند رۆژەكێن كێم ھاتبا پێكئینان، پشتی ھەلبژارتنان ژ لایێ پارتا سەركەفتی تنێ. وەكی ئەمریكا نەك ب پشكپشكێنە دناڤبەرا پارتاندا، چونكو پشكپشكێنە روویەكە ژ روویێن گەندەڵیێ كو بەرژەوەندیا پارتان دكەت ژبەر ڤێ چەندێ حكومەتا كوردستانێ پاشكەفت.