وەرزێ بوهارێ ل کوردستانێ ژبلی کو ب وەرزێ پڕ گولان، کانی، کەسکاتی و جوانیێ دهێتە نیاسین. دهەمان دەمدا دووبارە چاندنا روح و هیڤییانە بۆ ئەرد و جوتیار و کارکەران. لێ بوهارا ئەڤساڵە هیڤیێن گەلەک ژ جوتیار و خوەدانێن جهێن گەشتیاری یێن کوردستانێ و ب تایبەت ژی یێن دەڤەرێن چیایی مراندن. چونکی بوهارەکە ب تاما زڤستانێ یە. بارینا رێژەیەکا زۆر ژ بەفر و بارانان د زڤستانا بوری دا کو تا نوکە ژی هەر د بەردەوامن و گەلەک جاران بووینە سەدەمێ دروستبوونا لەهیان زیانێن مەزن ل پشت خۆ هێلاینە و دهێلن. ئەگەر باس ل دەڤەرا ئامێدیێ بکەین، کو دەڤەرەکا چیاییە، د ئەڤ ساڵەدا پتر ژ “۱۳۰۰ملیمێن بارانێ” ل سنوورێ ڤێ قەزایێ بارینە. ئەڤ رێژا زۆر بوویە سەدەمێ تێکچوون و خرابکرنا رێکێن گەلەک گوند و ناڤچەیێن سەر ب ڤێ قەزایێ ڤە. ژلایەکێ دیڤە ژی سەرباری وێ ئێکێ کو پترین جهێن گەشتیاری دکەڤنە ڤێ قەزایێ. لێ هەر ب سەدەما لەهیان گەلەک ژ کەپر و جهێن گەشتیاری ژ ناڤچووینە. یانژی رێکێن وان گەلەک بێسەروبەر بووینە. دیسان کارتێکرن ل زەڤی، رەز و باغێن جوتیارانژی کریە، جۆیێن چەمێن گەلەک گوندان ژی ژ کارئێخستینە. ئەو جهێن تووشی زیانێن ل سەری دیارکری بووین د زۆرن. لێ بۆ نموونە، لەهیان کارتێکرن ل کەپرێن سیلاڤێ کریە، پڕانییا کەپر و جهێن گەشتیاری یێن گەلییێ شێرانە ژی ئاڤێ برینە، رێکا گەلیێ سێ پرکان ژی ژ کار کەفتییە. ژبلی گەلیێ باڵندا کو ب سەدەما بوردوومانێن تورکیا ژ جهەکێ گەشتیاری بوویە جهەکێ پڕ زاڵگەهـ و قەدەغەکری!
هەلبەت ژبلی خودێ گازییا ڤی خەلکی ژ حکوومەتا هەرێمێ یە کو ب زویترین دەم رێکە چارەیەکێ ببینن دا کو مەترسییا ل سەر ژیانا خەلکی کێم بکەن و رێکێن هاتن و چوونێ ب شێوەیەکێ باشتر بهێنە سەخبێرکرن. دیسان ژبەرکو کەرتێن گەشتیاری و چاندنێ ژی ژ وان کەرتانە یێن ل ڤان ساڵێن دووماهیێ بووینە ژێدەرێ داهاتی بۆ بەشەک ژ خەلکێ کوردستانێ و ب تایبەت ژی ناڤچەیێن چیایی یێن مینا قەزا ئامێدیێ. حکوومەتا هەرێمێ ب خوە ژی گەلەک جاران ئاماژە ب وێ ئێکێ کریە کو بزاڤێ دکەن کەرتێن گەشتیاری و چاندنێ بکەنە ئەلتەرناتیفەک بۆ نەفتێ. ئەڤجا گرنگە جۆیێن گوندان بهێنە چێکرن و هەڤکارییا خودانێن کەپرێن گەشتیاریژی بهێتەکرن دا بشێن دووبارە خوە ل سەر پێن خوە بگرن. و ئەو ئەلتەرناتیفێ حکوومەت ژێ دبێژیت ژ ناڤ نەچیت.
- نوونەرێ رۆژئارتیکڵ ل ئامێدی
