بەشەکا رۆژنامەڤانان ئەڤرۆ گەلەک بێ پیشەییانە کارکر و خەلەتی و ھەتکبەریا مەزن دکارێ رۆژنامەڤانی و راگەھاندنێدا کر. “چاوانی باشی حالێ تە” ئەڤە سێ پرسیارێن ل سەر ئێک یێن رۆژنامەڤانەکێ بین د ئێک دەمدا ژ ئێک کەسی کرین. ئاخر کورێ بابۆیی بەرسڤا ڤان ھەر سێ پرسیارا ئێکە و تە دڤێت چ بێژی و تە چ ژ وی کەسی دڤێت یێ تە پرسیار ژێکری. دیسان پرسیارەکا رۆژنامەڤانەکێ دی کو ژ ئافرەتەکێ کری: “تە چەند خولەکا مکیاجا خوە دانا؟ چەند مایە ب کار و بارێ خوەڤە؟ تە چ جۆرێ مکیاجێ دانایە؟” فەزاحەتترین پرسیار ئەڤەنە. باشە چ پەیوەندیا تە ب کاروبار و مکیاجا وێ ڤە ھەیە؟ باشە چوویە رۆمالا سەیرانێ بکەی یان ژی چوویە پرسیارا کاروبارێ وێ بکەی؟ پرسیارەکا رۆژنامەڤانەکێ دی کو ئەڤرۆ ھاتیە کرن: “بۆچی جادە بووینە قەرەبالغ؟” وەک ئەم ھەمی دزانن د سەیرانێن نەورۆزێدا ھەمی جادە دبن قەرەبالغ، ژ ئەگەرێ ھندێ کو خەلکەک زۆر سەرەدانا سەیرانێ دکت و جادەیێن مە بەرتەنگن. ژ لایەکێ دیڤە ئەڤ پرسیارە نە یا سەیرانیەکێ یە بکەی، دێ ڤێ پرسیارێ ئاراستەی جھێ پەیوەندیدار کەی کورێ بابۆیی. پرسیارەکا دی کو ھەر ئەڤرۆ ژلایێ رۆژنامەڤانەکێ ڤە ھاتنە کرن: “چەند گرنگە کچ داخازا کێم زێرا بکەت ل دەمێ پێکئینانا ھەڤژینیێ؟” باشە نەورۆز ل کیڤە و پێکئینانا ھەڤژینیێ ل کیڤە؟ عەزیزێ من ب خودێ گەلەک ژ ئێک دویرن!
ب دیتنامن ئەڤە ژ ڤالاتیا رۆژنامەڤانی و نە بەرھەڤکرنا وی دھێت، دیسان خەلەتی بۆ دەزگەھێ وی ژی دھێت زڤراندن. یا فەرە پرودیۆسەرێ بەرنامەی یان ژی بەرپرسێ پەیامنێران و پشکا بەرنامان پێشوەخت بێژنە وی پەیامنێری یان پێشکێشکاری بەرھەڤیا بۆ راپۆرت، ریپۆرتاژ و بەرنامێن خۆ بکن. چونکە ھەر کێماسی و خەلەتیا پەیامنێر و پێشکێشکار بکن ئەو خەلەتی بۆ دەزگەھی ژی دزڤرت.
- رۆژنامەڤان
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
