وەکی ئەم هەمی دبینین و هەست پێ دکەین، دەما هەر ئێک ژ مە دچیتە دوکانەکێ، مارکێتەکێ و بازارەکی دشێین بێژین کو هەمی یانژی پتری ۹٥٪ ئەو تشت و پێتڤیێن ئەم دبینین بەرهەمێ بیانیە و ژ دەرڤەی وەڵاتی داخلی کوردستانێ دبیت! زەنگین و سەرمایەدارێن هەرێما کوردستنانێ، هنگ دشێن گۆڕانکاری و چاکسازیێن باش بکەن ژلایێ ئابوریڤە ب مەرجەکی واز ل چاڤلێکەریێ بینن. چونکی جڤاکەکێ چاڤلێکەرین کەسەک کارەکی بکەت هەمی دێ بەرێ خۆ دەنە وی کاری هەر وەکی چ کارێن دی نه بن ژبلی وی. بۆ نموونە هەر کەسەکێ هندەک پارە کەفتنە دەستی دێ رابیت ب ڤەکرن و دانانا پانزینخانەکێ، ب هزر و بۆچوونا من ڤەکرنا پانزینخانا بەسن و زێدەنە، ئێدی زەنگین و سەرمایەدارێن هەرێمێ پێتڤیە دەست ب ڤەکرن و دانانا کارگەهێن دروستکرن و بەرهەمئینانا وان تشتان بکەن یێن رۆژانە ژ دەرڤەی سنوران داخلی کوردستانێ دبن. چونکی ڤەکرنا کارگەهێن بەرهەمئینانا پێتڤیێن رۆژانە چەندین مفا یێن هەین بۆ جڤاک و گەل و وەڵاتێ مە، وەکی:
١- بەرهەمئینانان و دروستکرنا کەلوپەل و پێتڤیان ژ ناڤخۆ ب دەستێ خۆمالی چ پێنەڤێت دێ باشتر و ساخلەم تربیت ژ دەستێ بیانیان. ٢- ئەو پارێ دچیتە دەرڤە بۆ کڕینا تشتان دێ ل کوردستنێ مینیت ژ ئەنجامێ بەرهەمئینانێ ژناڤخۆ و پێتڤی نەبوون ب بەرهەمێ دەرڤە و بیانی. ٣- کێمبوونا رێژا بێکاریێ و هەژاریێ ل کوردستانێ ژ ئەنجامێ کارکرن ل کارگەهان. ٤- سڤکبوونا بارێ سەر ملێن حکومەتێ ژ دامەزراندنا گەنجان دا. چونکی رێگە خۆشکەرە کو گەنج ل کەرتێ تایبەت کار بکەت و پێتڤی ب حکومەتێ نەبیت. لەوما پێتڤیە حکومەت ژی رێگە خۆشکەربیت بۆ ڤەکرنا کارگەهان. ٥- بڵندبوونا هەستێ نەتەوی و نیشتیمانی ژ ئەنجامێ کارکرنێ و دەستڤەهاتنا داهاتی ل شوینا بێزاربوونا گەنجان ژ ئەنجامێ بێکاریێ و نەبوونا چ ژێدەرێن داهاتی و پارەی. ٦- کێمبوونا رێژا تاوانان یێن پەیدادبن ژ ئەنجامێ هەژاریێ و بێکاریێ و بێ پارەیێ. ٧- بڵندبوونا شیانێت گەنجان بۆ پێکئینانا هەڤژینیێ، و کێمبوونا رێژا بەردان و تەلاقێ. ٨- ئەو تشتێن ژ تورکیا، ئیران و وەڵاتێن دی دکڕین ئەگەر ناڤخۆ بەرهەم بینین دێ ژ دیڤەلانکیێ و منەتا وان رزگار بین و ژ گرتنا سنوران ناترسین. بەڵام ئەگەر مە چ بەرهەم نەبیت یێ خۆمالی، حەفتیەکێ سنور ل سەر مە بێنە گرتن دێ قەیرانێت مەزن پەیدا بن و دوکان و بازارێن مە خالی مینن.
لەوما پێتڤیە ئێدی زەنگین و سەرمایەدار و بازرگان ب هەماهەنگی و هەڤکاری دگەل حکومەتێ کار ژبۆ وێ چەندێ بکەن کو پێتڤیێن رۆژانە ژناڤخۆ بەرهەم بینین و دروست بکەین ل شوینا ژ دەرڤەی کوردستانێ بکڕین و گرنگیێ ب کەرتێن پیشەسازی، گەشتوگۆزار، کشتوکاڵ و ب خودانکرنا ئاژەلی ژی بهێتە دان نەک تنێ بەرهەمئینانا نەفتێ. بلا نەفت بۆ نڤشێن داهاتی یێن مللەتێ مە بمینیت.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)