پشتی دەربازبوونا پێنج هەیڤان ل سەر ئەنجامدانا هەلبژارتنێن پەرلەمانێ کوردستانێ، هێشتا دانوستاندنێن لایەنێن سیاسی یێن کوردستانی د بەردەوامن بۆ گەهشتنا رێککەفتنەکێ ل سەر دروستکرن، یانژی دروستترە بێژین “دابەشکرنا” حکوومەتێ ل سەر هەڤدوو. هەر لایەنەک ژ وان داکۆکیێ ل سەر پشکا خوە دکەت ژ پۆست، پلە و داهاتی. بۆ گەهشتنا ڤێ ئارمانجێ ژی درویشمێن جودا و بریقەدار بلند دکەن و بەحسا بەرژەوەندیا گشتی، چاکسازی، چارەسەرکرنا کێشەیێن نەتەوەیی و… دکەن! لێ شێوەیێ برێڤەچوونا دانوستاندنان و ناکۆکیێن دناڤبەرا واندا گۆمانێ دروست دکەن ل سەر راستییا ناڤەرۆکا ڤان درویشمێن وان! یەک ژ بەڵگەیان ژی ئەوە کو یەک ژ مەزنترین و ئاسێترین گرێکێن لهەڤهاتنا وان کەرکووکە. ئانکو کەرکووکا کو هەمی ب “پیرۆز” بناڤ دکەن، ل شوونا کو ببیتە خالا پێکگەهشتنا وان، بوویە خالا جودابوونا وان! پارتی دیموکراتی کوردستان و یەکێتی نیشتیمانی کوردستان هەڤدوو تۆمەتبار دکەن ب فرۆتن، دەستبەردان و پشتگوهخستنا وێ. هەرچەندە هێشتا ئەو پارێزگەهە یا ل بەر دەستێن کوردان و هەردەما ئەڤ هەردوو لایەنە رێککەفتن کەرکووك ژی دێ زڤریتەڤە!
هەڵبەت پتریا جاران رەخنە ل یەکێتی نیشتیمانی کوردستان دهێتە گرتن کو دەستبەرداری کەرکووكێ بوویە. لێ دیارە رێژەیەکا باش یا خەلکێ وێ نە دگەل ڤێ بۆچوونێنە و هەر لایەنگرێن وێ پارتیێنە. ئەڤ چەندە ژی دهەلبژارتنێن عیراقێدا دیاربوو کو یەکێتیێ نیڤا کورسیکێن وێ پارێزگەهێ ب دەستخستن! ئانکو هێشتا سەنگا وێ پارتیێ ل وێ پارێزگەهێ هەیە و خودان جەماوەرە. ئەڤجا ژبەرکو ئەوژی پارتییەکا کوردییە، ئەم دشێین بێژین کو کەرکووك دبن هەژمۆنا کوردان دایە! ئەڤە ژی خالەکا گرنگە کو لایەنێن کوردی سوودێ ژێ وەرگرن و ب کاربینن بۆ ڤەگەراندنا کەرکووکێ. تەنانەت ئەگەر دچارچۆڤێ هەرێمەکا جودا ژی دا بیت کو لایەنەکێ کوردی دروست بکەت و کەرکووكێ پێڤە گرێدەت. ئەڤ چەندە ژی سەرباری هندەک کێماسیی و نەخوەشییان، لێ ب گشتی دێ بیتە دەستکەفت بۆ کوردان. خوەزیا کو پارتیێن کوردی کارەکێ وەسا ل مووسڵ ژی کربان دا ژ دەست کوردان نەچووبایە. لێ مخابن مووسڵ ب بێ دەنگی هاتە بەردان و تشتێ سەیر ژی ئەوە کو کەسێ رەخنە و گازندە ژ کەسێ نەکرن بۆ بەردانا مووسڵ! وەکی کو ئەڤرۆ گازندە و رەخنەیان ل هەڤدوو دگرن و دبێژن کەرکووك هاتییە فرۆتن و بەردان!
یا ئاشکرایە کو ددیرۆکا نێزیکدا، ئانکو بەری کێمتری سەدەیەکێ، باشوورێ کوردستانێ ب ویلایەتا مووسڵ دهاتە بناڤکرن. باژێرێ مووسڵ ژی پایتەختێ وێ ویلایەتێ بوو یا کو زۆربەیا هەرە زۆر یا روونشتڤانێن وێ کورد و خاکا وێ کوردستان. دەڤەرێن (مووسڵ، دهۆك، هەولێر، سلێمانی، کەرکووك، هەڵەبجە و هندەك دەڤەرێن پارێزگەهێن دیالا و سەلاحەدین) ب خوەڤە دگرتن. ئەڤە ژی دیاردکەت کو گرنگیا مووسڵ و رەسەناتیا وێ یا کوردی ژ کەرکووکێ کێمتر نینە. ژ خوە ل گۆر هندەک زانیارییان هژمارا کوردێن کو نوکە ژی ل سنوورێ پارێزگەها مووسڵ دژین پترە ژ یا کوردان ل کەرکووکێ. لێ سیاسیێن کوردان بەردا و رۆژەکێ ژی بەحس ل سەر نەکرن!؟ هەرچەندە پشتی کەتنا رژێما سەدام کوردان کۆنترۆڵا وێ پاریزگەهێ کربوو و رێژەیا دەنگێن کوردان ل مووسڵ ژی وەکی کەرکووکێ گەلەک بوو، تەنانەت پارێزگار ژی کوردان دانا. لێ هێدی هێدی دەست ژێ بەردان و دگەلدا بەردەوام هژمارا دەنگێن کوردان ژی کێم بوو و ل دوماهیێ هەژمۆن ژی لێ نەما. بەرەڤاژی کەرکووکێ کو دەنگ و هەژمۆنا کوردی هەر مایە.
ل ڤێرە ئەز دخازم سەرهاتەکا خوە ڤەگێرم کو بەلکی من جارەکا دیژی ئاماژە پێ دابیت. بەریا چەند ساڵان ئەز چوومە سەنگەرەکێ پێشمەرگەی ل سنوورێ مووسڵ. من دیت سەنگەرێن سووپایێ عیراقێ ل بەرامبەری پێشمەرگە دهێنە دروستکرن و جهێ وان یێ زاڵ بوو ل سەر دەڤەرێ. من گووتە پێشمەرگەیەکی “جهێ سووپایێ عیراقێ باشترە ژ جهێ وە.. مانە هوون بەریا وان ل ڤێرە بوون، وە بۆچی جهێ وان نەدگرت؟!” پێشمەرگە گووتی: “بەلێ راستە جهێ وان یێ باشە و ئەم دەستپێکێ ل وێرێ بوون. لێ ژبەرکو گەلەک مێش، زرکێتک و کێزك لێ هەبوون، مە بەردا و ئەم پاشدا هاتینە ڤێرە.. ڤێرە گەلەک خوەشە!”.
ئەڤجا ئەز نزانم مووسڵ ژی ژبەر مێشان هاتە بەردان و کەرکووك ژبەر هنگڤینێ رەش داخازی ل سەر هەیە، یانژی شیان و زانین ئەڤەنە؟! لێ تشتێ ئەز پشتراست دزانم ئەوە کو ئەگەر مرۆڤی مێش هەبیت دێ هنگڤین ژی مسۆگەر بیت!