د تاریاتیا شەڤەکێ دا
د کویراتیا خەوەکێ دا
دناڤ جڤاتا خەونێت خۆدا یا ب جۆش بووم
یا ب نازو گەف و گوڕبووم
دناڤ کەنى گریکێت خۆدا ژبیرڤە دچووم
پەیڤێت من تێرا هەلگرتنا هەستێت من ناکەن
ب ژانێت چ برینا نە دگریم
و نە ب هزرا خۆ سێدارە ددە م
نە ژى خۆ پۆسیدە دکەم
من نەدزانى!
دگەل شیرڤەبوونا پیرە ژانێت رۆژانێت خۆ
هەڤدیتنەکا ژ نیشکەکێڤە
دێ دگەل رۆندکێت شەڤێ کەم
ژ وێ جیهانێ ددەرکەڤم
نە ل پێشیا خۆ نە ل دوور دەرو و ل رەخێت خۆ
ژبلى دەنگێ گریا شەڤێ
و کوزیرکا وێ
یێ هشیارم و گوه ل چ نینە وچ نابینم
ژنوى من زانى
هەستا غەریبیێ شەڤ ژى یا ڤەگرتى
بەریکێت وێ
ژ یادەوەرى و گرنژینێت تە دتژینە
…
پیرۆزیێت زمانێ
یادەوەرى و هیڤیێت من
رۆندکێت هەمى سەرسالێت من
هەمى عەشق و ڤیانێت من
نێ هەر تۆیى
ژ تەڤ پیرۆزیا پیرۆزترى
د لاڤادا ژ تەڤ کەسان نێزیکترى
ژ هەمى پەیڤا ب بهاترى
گە ر شە ڤ هەست ب غەریبیا تە بکەت
بیر ل جڤاتێت تە بکەت
پەسنا دلۆڤانیا تە بکەت
تە بەرزو بلند بکەت
پەیڤێت د تاڤا هەیڤێدا رێزبکەت
چاوا ئەز!
وێ شەڤێ نە گرم
و هەمبێز نە کەم
و دەستێت وێ یێت پیرۆز
ماچى نەکەم
….
ڤێ بارۆڤێ
ئێخسیرکرم
دویر دویر برم
پاشى ل ئاشەکى هویر کرم
نە هیڤیێت مە ئێتیما دگرنژن
نە ئارمانجێت مە ب جۆشن
نە جەژنێت ب پیرۆزینە..
هەردەم چاڤێت ب گرینە
ب شادبوون ب دیدارا تە د ڤەکرینە
غەریبیا تە ئەم
ژ رۆندکا هشک کرین
هیڤى دکەم
بەس جارەکێ
شەڤا من
ماچى بکە
و دەستێت خۆ یێت پیرۆز
ب سەرێ خەونێت من دا
بینە خار بینە خار
دا ئەژى هەناسا ئەلندەکا نوى ب هەلکێشم
و بشێم بژیم.
• بابەتێ هەلبەستێ: کچە شەهیدەک ل دیدارا بابێ خۆ