دهۆك ئەو باژێڕێ بچووك کو بوویە هێمایێ گهوڕینا هەڤکێشەیێن سیاسی ل هەرێمێ، لەوڕا ژی پارتا دەستهەڵاتدار ل دەڤەرێ ژ هەر پێشهات و لڤینەکا ئەڤی باژێڕی دترسیت. ئەگەر لڤین چ باشی بیت یان خرابی، لەورا ب مخابنی ڤە ئازادیخۆاز و رۆژنامەڤانێن ئەڤی باژێری بەردەوام ل ژێر مەترسیا گرتن و دەستێ ڕەشێ تیرۆرێ دانە. لێ ب شانازی ڤە ل سەر ئەڤێ مەترسیا هەیی ژی لێ ب ئیرادەیەکا پۆڵاین بەردەوامن. رۆژا 28/1/2019 ل سەر مەسەلەیەکا گرێدای ئازادیا رادەربرینێ و (ب هێجەتا خرڤەبوون ژبۆ خەلکێ شێلادزێ)، جاردن دەستهەڵاتێ دەست ب هەڵمەتەکێ رەش بەرامبەر رۆژنامەڤان و چاڵاکڤانێن بەهدینان کرن. ئەز ژی وەك ئێك ژ وان دەستەسەرکریان مینا داعشەکێ تۆندڕەو سەرەدەری دگەل مە دهاتە کرن و، رەفتارێن رژێما بەعس بەرامبەر کوردان نەکرین، ب مخابنی ڤە مە ب دەستێن کوردان دیتن بەرامبەر خۆ و هەڤاڵێن خۆ!
پشتی کو ئەم 25 کەس ب فەرمی هاتینە زیندان کرن، ب ئارمانجا بێدەنگکرنا دەنگێن نەڕزای ل بەهدینان و ئەڤ چەندە ژی ل دەڤ مە (خەیالەکا خاڤە)، مە هەڤاڵان دزیندانێ دا مانگرتن ژ خۆارنێ راگەهاند. چۆنکە ب شێوەکێ نە یاسایی هاتبووینە زیندان کرن ل گۆر ماددەیەکێ یاسایا رژێما بەعس، کو ددەمێ خۆ دا چەندین کورد پێ هاتبوونە بێسەروشوینکرن و سێدارەدان! پشتی بوورینا هەفتیەکێ ئەم 7 هەڤاڵ هاتینە ئازادکرن و، 18 هەڤاڵ مانە د زیندانێ دا. ئازادکرنا من و هەڤاڵێن من ژی بێگۆمان ژ وێ فشارێ بوو یا کو ژ دەنگێ نەرازیێ جەستە ئازادکری بلندبووی. د دەما برێڤەبرنا کەیسێ مە دا ب شێوەکێ زۆرێ بەرچاڤ گیرۆکرن هەبوو ل ژێر فشارا دەستێ حزبی، ب شێوەکی کارێ کو دئێك یان دوو رۆژان دا دهاتە کرن، ئەوان بۆ ماوێ 7 رۆژان گیرۆکر! نها ژی دبێژم ئەڤێ گرتنێ و ئەگەر چەندین جارێن دی ژی بهێینە گرتن، دێ زێدەتر بهێتزتر بین و باوەریا مە زێدەتر لێهێت. سۆپاسیێن تایبەت بۆ تۆڕا پارێزەرێن خۆبەخش.
- زیندانیێ سیاسی ل سەر دەستێ دەستهەڵاتا کوردی
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
