تەنا بنڤە
ل بەر سنگێ ئادارێ
دناڤ دەستێت رۆژێ دا
دهەمبێزا بیتانۆکێت ل سەرێ رێ دا
ئەى خۆشتڤیا بهارێ
من نە دزانى
دێ خەملا بهارێ رەش کەى
دێ رۆندکێت هەیڤێ زوها کەى
خەونێت دایکا خۆ شیرفەى
کراسێ بیکانیا خۆ د خۆ وەرکەى
ب سورە مەکسیی دێ خۆ کاردکەى
بابێ خۆ ژ دیر ژ دیر بێ هیڤى کەى
و ژ دەف بارکەى
ما ژ خۆ دێ چى؟ و ماچى ناکەى
نێ ئاڤە؟
نێ ئەڤە دوماهیک ماچە تۆ پێشکێش دکەی
ئەو ژى تە پێ هەمبێز بکەت
گەردەنا تە ئازا بکەت
تۆ ریڤینگى دێ چى و
ودێ ژ دەف بارکەى
….
ڤێ ئارۆنکى هەمى رۆندک ل باوەشا تە کۆمڤەکرن
هەمى هزر دیر دیر برن
هەمى زمان سەر ژێ کرن
هەمى خەون هشک کرن
هەمى دلدار ب گریا کەتن
شەڤ و رۆژ ب کیزگیرۆکا ئیخستن
هەڤالێت تەژى ب هزرێت خفتى ڤە رازى دکرن
دایکا تە ژى
ب خەونێت ب بیکانیا تە ڤە د دیتن ب ئارۆنک چوو
بابێ تە ژی
هەر پەیڤەکا ل پەرتووکەکا ژیێ تە دا بفربیتن
دخۆ وەرکرن
یێ دگریتن و بێهن دکەتن
جار جار ب ناڤێ تە گازى دکەتن
جار جار ژى خۆ ل هاتنا بارانێ دگریتن
و پاشی چپک چپک یێ هەمبێزدکەت
و حالێ تە ژێ دپرسیتن
ناڤێ تە یێ زاردەڤێ خۆشتڤیێت تە دەردکەڤیتن
هەڤالێت تە ژى ل وێ بهارا گەف ل وە دکرن روونشتنە خار
هەدار نەما درۆندکێت خۆدا یێ ژبیرڤە دچن
دکەلا خۆدا یێ دسۆژن
ئەو گەرەکا ل مالا وە ژى قوریزینێ یا ڤەگرتى
کەس دکەسێ ناگەهیت
ناڤێ تە یێ زاردەڤێ هەمیا دەردکەڤیت
هەر ئێک ب چاڤێت تژى رۆندک یێ خاترا خۆ ژ تە دخازیت
دلێ من ژى یێ ژ لێدانێت خۆ در
دایکا تە ژى وێنەیێ تە یێ داناى
یا ب تە دبێژیت
جار جار ژى یا هەدارا خۆ پێ دئینیت
هزر دکەت هەر یا دگەل تە دژیت
بهارێ ژێ
تۆ یا ل بەر سنگێ خۆ دانای و یا شدان دى
چونکە نەڤێت
ژناڤ ڤێ خەوێ تۆ هشیاربى
دا جڤاتا ڤریشتەیا تۆ شادبى
یا بەرهەڤ و ئامادەبى
