پترى بیست و حەفت سالانە و بەردەوام حرحرا موەلیدان گوهێن مە تژى کرینە و هێشتا مە نە شیایە خوە ژ ڤێ حرحرێ قورتال بکەین. بەلکو رۆژ ب رۆژ ب هەژمارا وان د زێدەبوونێ دایە و بەردەوام تاخ و کولانێن مە هەمبێزا وان دکەن، چونکى ب باوەرا پتریا خەلکێ هەرێمێ ئەڤەژى بازرگانییەکە بەرپرسێن هەرێمێ ب خەلکى دکەن. چەرخێ بیست و ئێکێ یە و دەولە سەرێ حکومەتێ و وەزارەتا کارەبێ هێشتا مالێن مە د تارینە و د پلانێن نوى یێن لژنێن خەبیرێن مە بۆ بەلاڤکرنا خشتێن چەوانیا پێدانا دەمژمێرێن کارەبا موەلیدان دا (10) دەمژمێران کارەب نینە. ئەڤەژى فاشلى، بێ پلانى و گەندەلیا حکومەتێن هەرێمێ یێن ئێک ل دویف یا دى د دەتە خویاکرن. ژبەرکو مە وەزارەتەک هەیە ب ناڤێ (وەزارەتا کارەبێ) و هەر سال بودجەیەکا تایبەت بۆ دهێتە تەرخانکرن، لێ بەرهەمێ ڤێ وەزارەتێ و ئەو برە پارەیێ بۆ هاتیە تەرخانکرن نە دیارە و بۆ رەوشا کارەبێ ژى هەردەم سال بۆ سال خوەزیکێن پار ل سەر زارێ خەلکى یە. ئەڤ رەوشە هەرکو دچت خرابتر لێ دهێت ب تایبەت ل هەردو وەرزێن زڤستان و هاڤینێ. ئەو هەردو وەرزێن پترى یا هەر دەمەکى خەلکى پێدڤى ب هەبوونا کارەبێ هەى و ئەڤەژى باشترین بەلگەیە ل سەر نەسەرکەفتنا ڤێ وەزارەتێ.
سەرەراى هەبوونا وەزارەتا کارەبێ لێ هەردەم مە گوه ل ناڤێ کارەبا موەلیدان، سلکێت و قەرقەشا وان دبت، یێن بۆ مە بووینە کابوسەک و ب شەڤ ژى دهێنە خەونا مە. فرچێ راکرنا سلکێتى ژى د ڤان بیست و حەفت سالان دا یێ بوویە میرات ژ بابێ بۆ کورى و بەردەوامى پێ هاتیە داین هەتا ڤێ دەمژمێرێ. ل دوماهى یا هەمى هەیڤان ژى ئاریشە ژێ پەیدا دبن، سەرەراى هەبوونا لژنەیەکا تایبەت ب موەلیدان ڤە، ژبۆ دیارکرنا بهایێ ئێک ئەمپێرێ کارەبا موەلیدا ژى هەر پارێزگەهەک و خەبیر و وژدانا خوە. ئەو بکەیفا خوەنە کا چەندێ بدانن و ل هەر پارێزگەهەکێ بۆ یا دى جوداهى د بهایێ ئەمپێرى دا هەیە، ب بهانەیا جوداهى یا خشتێ پێدانا دەمژمێرێن کارەبێ. ل پارێزگەها دهۆکێ بۆ نموونە جاران ل مەهەکێ بۆ هەر ئەمپێرەکى برەپارەک هاتیە دیارکرن و ل هەیڤا د دویف دا، بێى زانینا ئەگەران ئەو برە پارە هاتیە زێدەکرن، بێى بلندبوونا بهایێ برمیلا گازێ یان زێدەکرنا پێدانا دەمژمێرێن کارەبێ! هەیڤا دوازدە یا سالا چوویى بهایێ ئێک ئەمپێر ب (8500) دیناران بى. بۆ هەیڤا ئێک یا ئەڤ سالە ژى (9000) دینار هاتن دیارکرن ژلایێ لژنێڤە!؟ خەلک ژى هندى خوە نەرازى دکن و ل تۆڕێن جڤاکى رەخنێ ل ڤێ لژنێ دگرن و ب شریکێن راستەقینە یێن خودانێن موەلیدان دزانن. وەسا ددن خویاکرن کو بهەڤرا دزیا ب رۆژ ژ خەلکى دکن. لێ هەر بۆ حکومەتێ و داواکارێ گشتى خەم نینە و هەتا نوکە ژى ل دویف گازى و گازندێن خەلکى نەهاتینە و ئەو لژنەژى نەهاتینە گوهورین. بەلکو جاران هاتیە راگەهاندن کو حکومەتێ (هزارەک بۆ دوو هزاران) ل شوینا خەلکى بۆ هەر ئەمپێرەکى ئەداکرینە! د سەر هەمیێ را وەزارەتا کارەبێ چو چارە ل ڤێ رەوشێ نەکرینە.
مادەم ئەم نەشێن خوە ژ کارەبا موەلیدان قورتال بکن، دخوازن ل کابینە یا نوى وەزارەتەک تایبەت ب ناڤێ (وەزارەتا کارەبا موەلیدان) بێتە زێدەکرن، ل وەزارەتێن حکومەتا هەرێمێ یان جهێ وەزارەتا کارەبێ بگرت و کارەبا گشتى نەمینت و ئەو پارێن خەلک د دەنە کارەبا گشتى و بێ کارەب بدەن یا موەلیدان. بەلکو ئێدى ئەم ژ وێ قەرقەشێ و سەرئێشى یا بهایێ ئەمپێرى ل دوماهى یا هەیڤێ قورتال بن، خەبیرێن مەژى ئێدى ل هەرسێ پارێزگەهێن هەرێمێ ئێک پلان و خشتە بۆ پێدانا دەمژمێرێن کارەبێ و بهایێ وان بدانن. دیسان دا خەلک ئێدى بەراوردیێ د ناڤبەرا پارێزگەهان دا نەکن.
· مافپەروەر
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)