د جیهانا نویدا پێکۆل دهێنە کرن بۆ راگرتنا ژینگەهەکا پاقژ ب زێدەکرنا رووبەرێ کەسکاتى و چاندنا داروبارى ژبۆ پاقژکرنا باى کو ژ دەرئەنجامێ وان گازێن ژ چالاکیێن ڕۆژانە یێن مرۆڤى پەیدا دبن. د نەخشەیێن نوى یێن ئەندازیارى یێن دابەشکرنا پارچە زەڤیان و ئیتفاکرنا واندا تا رادەکى ل تاخان پارچە زەڤیان ل ژێر ناڤێ (خزمەتگۆزارى، باخچە …) د هێلن. لێ تشتێ هەرى جهێ حێبەتیێ ل پێش چاڤێن باژێرڤانیان، بەلکو ب رازەمەندى و دەستویردانا وان و ژ نەبوونا پلانێن دارشتى یێن باژێرڤانیان، هاولاتى ژى ب بەهانەیا قەیرانا دارایى و نەشیانێن باژێرڤانیان بۆ دروستکرنا وان باخچان، باخچەیێن گشتى دکەنە یێن تایبەت ب تانکرنا وان ب سیمە و بلۆکان. هەر کەسەک بەرامبەرى خانیێ خوە پارچەکێ ل دویڤ حەز، ڤیان و شارەزایى یا خوە ب مولکێ خوە دزانن و رێ نادن کەس بچت دناڤدا. ژبەرکو ل بەردەرێ مالا وانن، بێگومان ئەڤێ ژى زەرەرێن خوە هەنە و ژ وان ژى ئەو باخچێ گشتى دبتە یێ تایبەت و ل شوینا ب ئەندازیاریەکا گونجاى و باش بێن دروستکرن، هەر هاولاتیەک ل دویڤ حەزا خوە نەخشەى بۆ د دارێژت.
زێدەبارى چێکرنا بیستان، چاندنا خیار، باجان و خەزرەواتى. ئەڤێ ژى پێدڤى ب ئاڤ و کارەبەکا ڕۆژانەیە. ئاڤدانا وان ژى ژ بۆریێن ئاڤا ڤەخوارنێ یە کو ئەڤەژى سەرپێچى یە. ژبەرکۆ ئاڤدانا باخچان نابت ب ئاڤا ڤەخوارنێ بت، نەخاسمە ڤان سالێن دوماهیێ کو ئاڤ کێم بوویە. د پاشەڕۆژەک نێزیک دا دێ گەلەک ئاریشان پەیدا کەن و باوەرم 90% ئاڤ و کارەبا وان یا دزیێ یە و باجا وان ناهێت دان. دیسان مال هەنە نافۆرێن ئاڤێ و گەراجێ ترۆمبێلان و ژۆران د ناڤ دا چێدکن و ل پاشەرۆژێ ژێ وەرگرتنا ڤان باخچان و ڤەگەراندنا وان ژ باخچێن تایبەت بۆ یێن گشتى دێ گەلەک بەربەستان بۆ باژێرڤانیان دروست کەن نەخاسمە ژلایێ قەرەبویێ ڤە. لەورا ب بۆچوونا من ل سەر باژێرڤانیان پێدڤى یە ڤێ دیاردێ بنبر بکەن و هەر چو زوى یە رێگریێ ل وان کەسان بگرن یێن مال، ملک، ئاخ و جهێن خزمەتگوزارى و یێن گشتى ل بن کۆنترۆلا خوە داناین. ژ بۆ خزمەتکرنا گشت هاولاتیان ب ڤەگەرینن، دا پتر خەلک ژێ مفادار بن . ژبەرکو ئەو باخچە یێن گشتى نە و مافێ هەر تاکى یە بچت دناڤدا بێهنا خوە ڤەدت و بایێ خوە ب گوهورت. یان هەتا ئەگەر کەس نەچت د ناڤ ژى دا جوانى و رەوشا وان دێ یا شارستانى و پاراستى بت ژ رویێ ئەندازیارى یا باخچان ڤە.
ئەگەر بێژن نەخش ب وى رەنگى یە و مافێ وان هاولاتیانە وان پارچە زەڤیان بکن باخچە پێدڤى یە هەمى تاخێن نوى و ل بەرامبەر مالێن تەڤ هاولاتیان ئەو باخچە هەبن دا تەڤ هاولاتى ب یەکسانى و دادپەروەرى مفاى ژێ ب بینن.
· مافپەروەر
(گووتار دەربڕینا بۆچوونا نڤیسکارانە، نەیا سایت و گووتارنامەی رۆژئارتیکڵ)