کوردستان ھەر ژ کەڤندا ھەتا نھا ژی ھینا ئەوی سیستەمی ب کاردئینن ئەڤێن جاران باب و باپیرێن مە بکاردئینا. ھەر عەشیرەتەکێ ھندەک یاسا و رێنما یێن نەرێکوپێک بخۆ دانان و ب ئەوان شانازی پێ دبر و ھەر عەشیرەتەک شیان ھژمارەکا مەزن یا خەلکی ل دور خۆ کۆمبکەن و ھزر و بیرو رایێن وان ب تمامی کرنە دبن کۆنترۆلا ڤان دابونەریت، یاسا و رێنمایان. ئەو کەسێ ڤی بابەتی دخینیت ب ھزرا من دێ تێگەھیت کا من بەحسا چ جۆرە داب و نەریتایە. ئەڤان دابونەریت و یاسایان مالا ھزاران کەسان وێران کریە و ژیانا وان بەرەف ئاقارەکێ نەدیار بریە. ژبلی وێ چەندێ دبیت تنێ ب رێژەکا کێم مفا ژ ڤان دابونەریتا ھاتبیت کرن. خۆشبەختانە دنھادا بەشەک ژ خەلکی ژ وێ ھزرکرنا نەدیارا ڤان عەشیرەتان دوورکەتیە، ب تایبەت دناڤا باژێراندا و ئەو بەشە بۆ نیاسینێ و ھەڤنیاسینێ ناڤێن عەشیرەتان وەک بەربەستەک ب کاردئینن. گەلەک جاران دبێژن دھۆک گەلەکا بچویکە و ھەر کەسەکێ تە نیاسی ئەگەرەکێ مەزن ھەیە ببیتە خزم و دۆستێ تە. ئەڤەژی ژ ئەنجامێ ھندێ یە کو پەیوەندیێن خوە بەرفرەھ کرینە دگەل ھەمی عەشیرەتان.
لێ ب مخابنیڤە ھینا رێژەکا بەرچاڤ ھەیە کو ل دویڤ دابونەریتێن کەڤن دچن و تا رادەیەکی کارتێکرنا خوە یا ھزری و کرداری ژی دناڤ کۆمەلگەھیدا هەیە. ئەڤە ھەموو ل لایەکی ژلایەکێ دی ئەگەر بھێین و بەحس بکەین ئەرێ کی پترین مفای بۆ خوە ژ سیستەمێ عەشیرەتەیی وەردگریت؟ ئێکسەر ئەو سەقایێ دەنگدان و ھەلبژارتنا کاندیدکرنێ دھێن پێش چاڤێن مە. ھەر کەسەکی یێ عەشیرەت و بنەمالا خوە یێ ژێگرتی بێ کو تەماشەی ئاستێ وی یێ خاندن، رەوشەنبیری و رۆناکبیریێ بکەت. دشێم بێژم ھەر ئەڤ خالا بۆ خەلکێ دگرنگ نینن، مادەم نیاس و عەشیرەتا وی یە. حزب و لیستێن مە ژی ئەڤە بۆ خوە بدەرفەت زانییە و د ھەر خولەکا ھەلبژارتناندا وان گەلەک ب ھۆشیارانە کاندید بۆ خوە ژێگرتینە، داکو نوینەراتیا وان بکەن و گەلەک ب ژیرانە ھەموو پلان و شێوازێ وەرگرتن و نیاسینا کاندان ژ بۆ خەلکی کرینە. ب تمامی ئەڤ رێکا ئەو ب کاردێینن بۆ سەرگرتنا حزبا خوە جھێ خوە دگریت و تێدا سەردکەڤن. چونکە دزانن کو خەلکەکی ھێشتا ئەو رێبازا عەشیرەتیێ بەرنەدایە و پشتراستن دێ ئەڤە د بەرژەوەندیا وان دا بیت. ب بۆچوونا من ھەر ژ وی نەوێ بەری مە و یێ نھا ژ چ لایان ڤە نە مفای نەژی قازانجێ ژ ڤی سیستەمێ بێ سەروبەر نابینن. بەلکو بەروڤاژی زەرەرمەند دبن و ب تنێ حزب و لایەنێن سیاسی نەبن.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)