بیرا من دهێت سێ ئەندام پەرلەمان یێن خولا چوارێ، ئانکو یێن بەری ڤێ خولا پەرلەمانی یا کوردستانێ، مێهڤانێن کەناڵەکێ راگەهاندنێ بوون. ئێک یێ پاڕتی دیمۆکراتی کوردستان بوو و دوویێن دی یێن پاڕتێن ب ناڤ بەرهەڵستکار (ئۆپۆزیسیۆن) بوون. ل سەر گەندەڵی، چاکسازی و…هتد دانوستاندن دکرن و بەرسڤێن پرسێن پێشکێشکاری د دان. ل دووماهیا بەرنامەی هەردوو ئەندام پەرلەمانێن ب ناڤ بەرهەڵستکار گەرمبوون، سینگێن خوە ئینان پێش و کاغەزەک ژ ناڤ تشتێن خۆ ئینان دەر و گووتن: “ئەم یێن خەلکی نە و بەرەڤانیێ ژ مافێن خەلکی دکەین و بۆ خەلکی یێن چووینە پەرلەمانی. ئەڤە ژی وەکی سۆزنامەیەکێ یە مە یا واژوو کری کو پارەیێ خانەنیشینیێ وەرنەگرین و بزڤڕینە سەر کارێن خوە.” د. فرسەت سۆفی کو ئەو ئەندام پەڕلەمانێ پاڕتی بوو گووتێ “کا زەحمەت نەبیت وێ سۆزناما خوە بدەنەف من” وی ژی واژوویا خوە ل بنی کر و گووت “ئەز ژی وەکی وە ڤێ سۆزێ د دەم.”. پاش ئەو هەردوو پەرلەمانتارێن خوە ب فریشتە د ئینا دەر! خۆدانێن کاغەزێ، سۆزناما، سۆزێن قەبە، دەرکەفتن مەزنترین درەوین و واژوویێن وان بتنێ بوونە مرەکەبێ سەر کاغەزێ و ل سۆزێن خوە خودان دەرنەکەفتن.
دکتۆر فەرسەتێ پارتا گەندەڵ ژی بۆ خوە دیرۆک تۆمارکر کو چەپ و راست ئەگەر ب ویژدان بن دێ پەسنا وی کەن. نە ژبەر پاڕتا وی یان ئایدۆلۆژیا وی، بەلکو ژ بەر هەلویستێ وی یێ جوامێرانە دەمێ ژ سەرجەمێ ئەندامێن پەرلەمانێ کوردستانێ یێن هەر چار خۆلێن بوری تا نوکە، وەک ئێکەم پەرلەمانتار هاتییە پێش و خانەنیشینیا پەرلەمانتاریێ رەدکری و بڕیار دای بچیتە سەر کارێ خوە یێ بەری پەرلەمانتاریێ کو مامۆستایێ زانینگەهێ یە. کو ب ڤی کاری دبیتە ئێکەم پەرلەمانتار ژ هەموو پەرلەمانتارێن خۆلێن پێشتر کو مووچەیا خانەنیشینیا پەرلەمانتاریێ وەرنەگریت. لێ ل شوونا دەستخۆشیکرنا ڤی پەرلەمانتاری، دبینین (بۆقلێدەر، دەهۆڵقوت، مەلاق، دووری و درەوینێن هەمی پارتان) یێن ڤان بەهانەیێن ل خوارێ رێزدکەن، و دبێژن: “بۆ موزایدە وەکر، خۆشرینکرنە، کەس ژ وی گەندەڵترو رووی لاستیکتر نییە، ما چ کریە نێ چ نەکریە، دێ بلا وەرنەگریت ژی، ما بۆچی یە یێ پارتەکا گەندەڵە و…هتد” وەک هەڤوەڵاتییەکێ ڤی وەڵاتی و نە من دەنگ ب ڤی جوامێری و پاڕتا وی دای و نەژی چ بەرژەوەندیێن (هۆز، خزمانی، نیاسبینی و…هتد) من دگەل ڤی جوامێری هەی، بتنێ ب دیتن و ویژدانا خوە بەرامبەر ڤان پۆختان، درەو، بێ ویژدانیێن ڤان مەلاقان دبێژین ئەگەر موزایدەیە دێ بلا ئەوێ من و یێ تە ژی دەنگ پێ دای، هۆسا یێ جوامێر و مەردبا.. بلا موزایدەبا. ئەگەر خۆشرینکرنە، بلا ئەو دوو روویێ من و یێ تە ژی دەنگ پێ دای هۆسا خوە شرینکربان کو ل ڤێ زڤستانێ مێشان هەدار نەکێشابا و هاتبان بەردابایێ ژبەر خوە شرینکرنا وان.
ئەگەر ب پیڤەرێ وە بیت هەر کەسێ دگەل وە نەبیت، ئەگەر خوە ئاڤ د دەستاندا ب مەهیت هەر گەندەڵە، دزە و ب کێر ناهێت و هوون د سپی و پاقژن! یا چ نەکرنێ ژی، کا ب خێرا خوە ئێک کارو بڕیارا ئەندام پەرلەمانتارێن د ڤان چار.. پێنج ساڵێن بۆری ژ ئەندام پەرلەمانێن تە و یێن من و یێن وی و وان و…هتد بێژن، کو ئەو کار د بەرژەوەندا هەژاراندا بیت. ب قیر قیرێ، خوە گڤاشتن، تێکدان و سووتنێ زیان ب گەندەڵان ناکەڤیت. یێن زەرەرمەند هەر دەستکورت و نەدارن. ئەگەر جوامێرەکی کارەکێ باش کر، خوە ئەگەر د دلدا مەرەم ژی پێ هەبن و بۆ موزایدە ژی بیت، دڤێت ئەم هەموو پشتەڤان بین، دا موزایدەو هەڤڕکیێن د خێرا هەژاراندا ل شوونا ژ بنبرن و خوارنا مافێن وان، ببیتە کولتوور و هەژار ژ وێ کوڕێ بهێتە دەر یا فیرعەون و قاروونێن ڤی چەرخی ئەو ئێخستینێ.
- نوونەرێ رۆژئارتیکڵ ل ئامێدی.