ئەڤ بەراوردییە دھێتەكرن دەمێ ھەر ئێك ژ وان سەرۆكان گووتارا خۆ ئاراستەی خۆپیشاندەرێن خۆ كری. سەبارەت سەرۆكێ فرەسی (ئيمانۆێل ماكرۆن) پەیڤەك ئاراستەی خۆپیشەندەران كر ئەویێن نەرازی ژ بلندبوونا رێژەیەكا كێم ژ باجێ ل سەر سۆتەمەنیێ و گووت “ئەم پێگڤە ل ژڤانەكێ نوو بۆ بەرژەوەندیا وەڵاتێ خۆ و پاشەڕۆژا خۆ. ئەز باش دزانم ھوون ھەستا ب كەرب و كینی دكەن. كەرب و كینا ھەوە یا رەوایە و مافێ ھەوەیە و ئەڤ كەرب و كینە دەلیڤەیەكە بۆ پاشەڕۆژەكا باشتر..” وەسا دیاركر كو فرەنسی ھەموو پێكڤە بێ جوداھی ئێكگرتینە بۆ ئێك ئارمانج و ئەوژی ئێكە ژ وایە. ھەروەسا سەرۆكێ فرەنسی گووتی “رەنگە من ھندەك ژھەوە برینداركربن د چەند پەیڤاندا”، ھەر وەك یێ لێبورینێ ژ خۆپیشەندەران دخازیت و، گووتی “زێدەكرنەكا دمووچەیاندا ھەی نێزیكی (100 یورۆیان) و زێدەكرنەكا دی د دەخلیدا و عەلاوەك ل دەسپێكا ساڵا نوو. ئەڤ عەلاوە ناكەڤیتە بەر باجێ و ھەر تاكەكێ (2000) یورۆیان وەرگریت دێ ھێتە لێبۆرین ژ باجا كۆمەڵایەتی. سەرۆكێ فرەنسی ئەڤ چەندە ھەموو كر چونكو وی بھایێ مللەتێ خۆ ب بلندی دزانی و پاراست ژ دەردەسەریێ و راگەھاند ل ھەموو جیھانێ.
بەرۆڤاژی گووتار و بڕیارێن سەرۆكێ حكومەتا ھەرێما كوردستانێ، ئەوێ بوویە سەرۆك حكومەت ھەر ژ سەردەمێ سەدام حوسەینی ل سالێن نۆتان و ھەتا نھا. یێ كو فیلمێ قەیرانا دارایی بەڵاڤكری و ب بڕیارێن نەقانوونی مووچەیێن مامۆستا و فەرمانبەران كێمكرینە ب رێژەیا (15% تا 75%). دگەل راوەستاندنا بلندكرنا مووچەیێن وان و راوەستاندنا دامەزراندنێ. قەیرانا گەندەڵیا سیاسی ژی ھات و مووچەیێن مامۆستا و فەرمانبەران ھەر (45 تا 50) رۆژان ھاتنە دان. ھەروەسا باج و رسومات ل سەر خانوبەران (تاپۆ)ھاتنە بلندكرن بۆ سێ جاران ھندی بەرێ، ل فەرمانگەھێن ھاتوچوونێ ژی سەپاندنا سزایێن نەقانوونی ل سەر لەزا ترۆمبێلان و وەرگرتنا باجێ ل سەر جادان و ژینگەھێ ب رێیەكا نەقانوونی. زێدەباری خرابیا كارەبێ بۆ ماوێ (27) ساڵان، بلندبوونا نرخێ سۆتەمەنیێ ترۆمبێلان، دانا كرێیا موەلیدێن كارەبێ كو دەستێن گەندەڵان تێدایە، قەدەغەكرنا بەڵاڤكرنا گازا سپی، دانانا پیڤەران بۆ ئاڤا ماڵان كو دوو جاران ھندی بەرێیە، داكەتنا زانینگەھێن حكومی، داكەتنا كەرتێ ساخلەمی، بەڵاڤبوونا گەندەڵیا كارگیری، نە پەسەندكرنا دەستووری و ژكارئێخستنا پەرلەمانی.
ئەڤەیە سەرەدەریا سەرۆكێ حكومەتا كوردستانێ دگەل خەلكی. ئەڤجا مامۆستایان ب رێیەكا سەردەمی خۆپێشاندان كرن و داخاز كر مووچێ وان دروست بیت و ل دەمێ دروست بھێتە دان. لێ مە ھەمیان دیت ل سەر دەزگایێن راگەھاندنێ قەدەغەكرنا بكارئینانا مۆبایلان و و قەدەغەكرنا وێنەگرتن و راگەھاندنێ د ناڤا خۆپێشاندانێدا و مامۆستایێن خۆپێشەندەر ھاتنە قوتان و ئێشاندن. چونكو داخازا مافێن خۆ یێن رەوا كر. سەرۆكێ حكومەتا ھەرێمێ دگووتارا خۆدا دەربارێ خۆپێشەندەران گووت “خۆپێشەندەران چەك و چەقۆ بەرامبەری پۆلیسان بكارئینان و ئەم ژ دێ بەرەڤانیێ ژ بەرژەوەندیێن خۆ كەین..” لێ باسی بەرژەوەندییێن مامۆستایان نەكر و ھەر دگووت قەیرانا داراییە و ئەو نەشێن چ بكەن.
ل ڤێرە دیار دبیت كو ئەرد و ئاسمان چەند ژ ھەڤدوو جودانە، ھوسا سەرۆكێ فرەنسی و سەرۆكێ ھەرێمێ ژ ھەڤدوو جودانە بەرامبەری بەرژەوەندیێن مللەتێن خۆ. بۆ مە دیار ژی بوو کو سەرۆكێ فرەنسی بەرژەوەندیێن مللەتێ خۆ پاراستن، لێ سەرۆكێ ھەرێمێ بەرژەوەندیێن خۆ پاراستن.
- یاساناس و رێڤەبەرێ نڤیسینا گووتارنامەیا (رۆژئارتیکڵ)
