ل دویڤ تێگەهشتنا من، پەیڤا “ژن” ژ “ژیان” هاتییە. رامانا وێ ژی ئەوە کو ژن ژیانە. ئەڤە ژی پەیڤەکا رەسەنا کوردی یە، وەکى هەر پەیڤەکا دى دزمانێ کوردیدا. دیارە ژی کو ئەڤە ژ پەیڤێن کەڤنە دزمانیدا و بەڵگە ژی ل سەر ڤێ ئێکێ گووتنێن پێشینانە کو دگەلەک دەرفەت و بابەتاندا بەحسا ژنێ کرییە. بۆ نموونە “شێر شێرە چ ژنە چ مێرە” و گەلەکێن دى کو پێویست ناکەت ل ڤێرە رێزکەم و ئاماژە پێبدەم. نوکە ژى د د جڤاتێن مەزناندا هەر پەیڤا “ژن” دهێتە بکارئینان بۆ پەسندانا خانمەکێ. بۆ نموونە دێ بێژن “فلان کەس ژنا بەر مالایە”، “اشهدبالله فلان کەس ژنە”، “وەى پا فلان کەس خۆش ژنە گەلەکا باشە” و… هتد.
ل ڤێرە من دڤێت فۆکێسێ بێخمە سەر پەیڤا “ژن” ژبەر دوو هۆکاران. یا ئێکێ ژبەر کو هندەکان پەیڤەکا دى ل جهێ وێ دیتیە ئەو ژى (ئافرەت)ە، کو هەتا نوکە ب دروستی ناهێتە زانین ئەڤ پەیڤە ژ چ و کیڤە هاتیە! هندەک دبێژن ژ (عورة) یا عەرەبی هاتییە و هندەك ژی دبێژن ژ (عفریت) هاتیە. ئانکو ژ دەرڤە گەهشتیە مە. هەردوو پەیڤان ژی ب دیتنا من ژن کێمکریە. باشە مادەم مە پەیڤ و ناڤێ دروست هەیە کو ئەو ژى “ژن”ە، پا بۆچى دێ چین ژ زمانەکێ دى پەیڤەکا چێکرى و بۆ کێمکرنا ژنێ ئینین؟! ب راستی ئەڤە جهێ پرسیارێ یە و نابیت زێدەتر ل سەر بێ دەنگ بین. دڤێت ل سەر راوەستین ب تایبەتی ئەم ژن و ب تایبەتیتر زمانزان. ل بەرامبەردا پەیڤا “ژن” یا کوردی ب تایبەت دناڤ تەخا گەنجاندا (کور و کچان) ئێدی وەکو هێمایەک بۆ کێمی، کرێتی، بێسەروبەری و سڤکاتیێ دهێتە بکارئینان.
یا ژ هەمێ ژی نەخۆشتر ئەوە دەمێ رەگەزێ مێ بخۆ پەیڤا “ژن” بۆ خۆکێمکرنێ بکاردئینیت! بۆ نموونە لاوەک دێ گازندا ژ پێلاڤا خۆ کەت و بێژیت “ژنا پێلاڤانە” یان هێلا ئەنترنیتێ نەیا باش بیت دێ بێژیت “ژنا هێلانە” یان هەکە ئێکی ڤیا زەلامەکى کێم کەت دێ بێژیت “ژنا زەلامانە”! ئەرێ هوین دزانن کو هوین ل دەسپێکێ خۆ و پاشى ژنێن مالبات (خێزان)ا خۆ، دایک، خویشک، هەڤژین و کچێن خوە بێرێز و بێ بها دکەن؟! مانێ دایکێن وە ژی ژنن و هوین ژ وان دایکان بووینە یێن هوین ژ پێلاڤێ کێمتر لێدکەن. ب ڤێ چەندێ هوین خۆ ژی گەلەک کێمتر لێدکەن ژ ئەوا وە کێمکرى. کورتییا ئاخفتنێ ئەوە کو ئەڤێن پەیڤا “ژن” ب کاردئینن بۆ کێمکرنا تشتەکی، ئەو وی تشتی کێم و کرێت ناکەن. بەلکو ژنێ کرێت، کێم، بێ بها و بێرێز دکەن کو ئەو “ژن” ژی یان دایک، یان خویشک، یان مەت، یان کچ یان هەڤژینا وی یە. لەوما هەر کەسێ هزرێ ل ڤێ بکەت باوەرناکەم ڤی کاری بکەت!
- ئەفسەر ل فەرماندەیا دهۆك یا پێشمەرگەی کوردستان.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)