ل هەر وەلات و مللەتەکی ئارامی بنەوش و بنەمایێ سەرکەڤتن و پارێزیا وی وەلاتی یە. هەر چەند ئەڤ ئارامییە هەبوونا وێ هەبیت، دێ پتر ئەو وەلات پێشکەڤت. هەم ژ ئالیێ سیاسی و هەم ژ ئالیێ ئابووری و جڤاکیڤە. لەوما ئەگەر بەرێخودانەکێ بۆ وارێ خوە بکەین، دێ بینین ئەم یێن د مەترسیەکا مەزن دا، کو چەقێن ڤێ مەترسیێ ب دوو ئاراستا درێژ دبن. مەترسیا ئێکێ نەمانا ئارامیێ یە ل ئامێدیێ ب گشتی، ژبەر بۆردوومانێن بەردەوام یێن فرۆکێن شەڕی یێن تورکیا. ب تایبەت ل جهێن شاخاوی و گوند و نهالێن ڤێ دەڤەرێ، کو زۆربەیا خەلکی نەشێن بچنە ناڤا گوندێن خوە بۆ گەشت و رابواردنێ. ئێدی ترسەک مەزن ل جەم خەلکی پەیدابویە، ژبەرکو د ڤان سالێن داوییێ دا پتر ژ 14 سڤیلێن ڤێ دەڤەرێ شەهید کەتنە. ب تایبەت ئەڤ رودانێن ڤێ داویێ ل دەڤەرێن نێروە و رێکان و دووسکی ژووریا پتر ژ 11 سڤیلێن ناوچەداریا شێلادزێ شەهید بوونە، کو ئێدی جڤاک و حکومەتا ناڤەندی و هەرێمێ ل ڤان جۆرە کارەساتا بێ دەنگی هەلبژارتیە و خۆ ب خودانێ ڤی خەلکێ نەزانییە، کوهاتینە دۆرپێچکرن و کۆنترۆل کرن ژ ئالیێ فرۆکێن تورکیاڤە، و نەشێن ب ئازادانە سەرەدانا وارگەهـ و گوندێن خوە بکەن.
مەترسیا دن ژی مەترسیا ئابووریە کو ئێک ژ فاکتەرێن ئابوور بهێز بکەڤت، هەبوونا ئارامیێ یە ژبەرکو پرانیا کۆمپانی و فاکتۆرێن کەرتێ تایبەت ل جهەک ئارام خوەجهـ دبن داکو قازانج و داهاتێ وانێ مسۆگەر بت و هیچ ئاستەنگەک نەکەڤیت رێکا وان ئەڤە ژ ئالیەکی ڤە. ژ ئالیێ دن ڤە خەلکێ ڤان دەڤەرێن چیایی ژی بارێ داراییێ وان نە گەلەک باشە. لەوما مەجبور دبن بچنە ڤان جهێن نە ئارام بۆ پەیداکرنا بژێوییا خێزانا خوە و سەرەدانا بەروبۆمێن خوە دکەن کو هن ژوان ل گوندێن خوە بەروبوم هەنە. لێ هند جاران دکەڤنە بەر پێلا تۆپبارانێن تورکیا کو شەهیدکەتنا سێ برایێن ئێک خێزان ل دەڤەرا نێروە و رێکان، کو خوەجهێن ناوچەداریا شێلادزێ بوون بەلگەیە سەر وێ. هەروەسا شەهیدکەتنا سێ سڤیلێن دن ژی کو ل ڤێ داوییێ ب مەرەما پاریەکێ ژیانێ چوبون چیایێ مەتینا، ئەوژی ب هەمان ئێش و ئازار ل بەر تۆپبارانا تورکیا کەتن و وانژی بارکر ژڤی واری. ئێدی چ واتایا ئارامیێ ل ڤی واری نەمایه و ئەم د گۆپیتکا راستگوییا خوەدا دبێژین؛ ئەم یێن د مەترسیێ دا و ئێدی چارەکرن و باشکرنا بارەدۆخی ل مە بوویە خەون و خەیال و هزرەت.
دبینم تاکە چارەسەر ئەوە کو ئێدی حکومەتا ناڤەندی وان رێکەفتنێن خوە دگەل تورکیا بهەلوەشینیت کو رێکێ ددەت ب پێشێلکرنا سەروەریا ئاخا عێراقێ و حکومەتا هەرێمێ ب خوەژی هەلویستەکی وەرگریت و ئێدی خەلک و وەلاتێ خوە نەکەتە قوربانیێن چەند بەرژەوەندیەکێن ئابووری. لەوما هەبوونا ڤێ سیاسەتا شێلی و نەروون یا هەردوو ئالیێن هەرێمێ و ناڤەند بوویە ئەگەر خەلکێ سڤیل باجا وێ ب گرانی بدەت و بەردەوامی ببنە ئارمانجێن ڤان ئێریشا. ژ ئالیێ دنڤە ژی هێزێن پارتیا کارکەرێن کوردستانێ (پ. ک. ک) ئارامیا ڤان دەڤەران بەرچاڤ وەرگرن و نەبنە ئەگەرێ دروستکرنا بیانۆ و هیجەتا بۆ دەولەتا تورک. لێ دڤێت وێ ژی بزانین زۆربەیا جارا فرۆکێن تورکیا جهێن دویر ژ بارەگەهێن (پ. ک. ک) ێ بۆردومان دکەت. بتنێ ئارمانج ژێ کوشتن و زەرەرا کوردایە. ئەڤجا سڤیل بت یان ئەو هێزا ئارمانجکری بت، تشتەک نۆرمالە و هەر تورکیا ب خوەژی وان کەسێن سڤیل ب هاریکار و جاسۆس ناڤ دکەت. تنێ بۆ ڤەشارتنا سەرپێچی و نە یاسایی یا خوە ڤێ یەکێ دکە. لەوما چارەسەریا ڤێ پرسگرێکا ئێرشێن تورکیا تا رادەک بوویە خەون و خەیالا ل جەم هەر کوردەکێ باشوور.
· چالاکڤان و بەکالیۆرس ب زانستێن ئابووری
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)