كەسێ ئاینی نە كەسەكێ قانوونییە و، كەسێ قانوونی نە شیرەتكارێ ئاینییە. ئەو كەسێ دڤێت پیشەیا شیرەتكاریا ئاینی بكەت، وی بوارەكێ بەرفرەھتر ھەیە ل سەر منبەرێن مزگەفتان دجڤاكیدا. لێ ئەو كەسێ بڤێت پیشەكاریا قانوونی بكەت و بگەھیتە پایەیێن سەروەری، دڤێت ئەو ھزرا بەرژەوندیا گشتی بكەت نە بەرژەوندیا خۆ یا تایبەت و، نابیت ئاینی و قانوونێ تێكەلبكەین. چونكو ئەڤ چەندە دێ شەپرزەیەكا توند ل جەم مللەتی پەیدا كەت. پاشی مللەت ب ھزر و بەھایێن ئاینی رازی نابیت. لێ ھەڵگەڕانەوەیەك دێ روودەت ئەگەر دیت كەسێ ئاینی یێ ل بەرژەوندیێن خۆیی دگەڕیت.
ئەڤ چەندە ژی رووددەت ل پەرلەمانێ كوردستانێ كو چەندین كەسێن ئاینی، ئانكو گۆتاربێژ و ب ناڤێ ئاینی خۆ گەھاندینە پەرلەمانی ژبۆ بەرژەوەندیێن خویی. ل دەمێ كەسایەتیێن ئاینی دچنە د پەرلەمانیدا ھیچ پەیوەندیەك وان نینە ب قانوونێ و پەرلەمانیڤە تا وی رادەی پێناسا قانوونێ نزانن. ئەڤ چەندە ھندێ دگەھینیت كو مللەت یێ پاشڤە دزڤڕیت بۆ سەردەمێ جێنشینان (الخلفاء) بەری دانانا قانوونێ. ئانكو ل وی سەردەمی شەریعەتێ ئیسلامی ل سەر مللەتی د ھاتە سەپاندن. ئەڤەژی سەرپێچیا ژیانا ھەڤوەڵاتیێ كورد دكەت ل ھەرێما كوردستانێ كو ئەڤ ھەرێمە دھێتە ھژمارتن پارچەكە ژ عیراقێ و ناھێتە ھژمارتن دەولەتەكا ئیسلامی. بەرۆڤاژیا ئەوا ددەستوورێ نھودا ھاتیە نڤیسین كو عیراق دھێتە ھژمارتن دەولەتەكا ئیسلامییە.
ئەڤا ل ھەرێما كوردستانێ رووددەت سەدەمێ پاشكەفتنا جڤاكی، رەوشەنبیری، شارستانی، رامیاری و ئابوورییە، و ب سەدەمێ ھەژاریا زانستی و بەڵاڤبوونا بێكاریێ ب پەنابرنا پارتان ل ھەرێمێ بۆ ئاینی بۆ دیتنا پشتەڤانیێ بۆ رامیاریا وان كو ژ خودێ ھاتیە وەرگرتن، و دگەھینیت كو مافێ وانە حوكمی بكەن ب رێیا پەرلەمانی. ل وی دەمی مللەت چاڤەرێی وان قانوونانە كو ژیارا وان باشبەكەن ژ ئالیێ ئابووری، زانستی، تەندروستی و رەوشەنبیریڤە. نەك كەسایەتیێن ئاینی كو ھیچ تشتەكی ژ قانوونێ نزانن. زێدەتر ھندەك كەسایەتیێن ئاینی ھەنە قانوونێ حەرامدكەن، چونكو ژ دانانا مرۆڤانە و شەریعەتێ ئیسلامێ حەلالە، چونكو ژ دەف خودێیە و نھو ل پەرلەمانی رینشتینە!
ب دیتنا من، مللەتێ مە پێتڤی قانوونەكێیە كو پەیدابوونا كەسێن ئاینی ل پەرلەمانی رێكبێخیت و تاكو دیاربوونا كەسێن ئاینی د ھۆبێن راگەھاندنێدا. یان كێمكرنا روولێ وان و دوورئێخستنا وان ژ پەرلەمانی و روولێ وان تنێ شەریعەتێ ئیسلامی بیت د مزگەفتانڤە نەك پەرلەمانی.