دەرهێنەرى ناڤدارێ ئيتالی رۆبرت روسيلينی دبێژيت “من نەڤێت فلمەكێ جوان چێكەم، بەلكو من دڤێت فلمەكێ ب مفا چێكەم”
وەكى يا ديار بۆ ماوێ چەند ساڵانە تا رادەيەكى گرنگى ب سينەما كوردى دهێتەدان. ب هەمى كەموكورتيانڤە جهێ دەستخوشيێ يە كو هێدى هێدى كەسانێن فلمساز چ ب رێژەكا كێم ژى بيت، لێ هەست ب هندێ دكەن كو گرنگيدان ب كارو خەباتا وان دهێتە كرن. لێ کۆمكرنا فلمان و نيشاندانا وان د ماوێ حەفتيەكێ بۆ تەخەكا دياركرى يان جهەكێ دياركرى، گرنگيا فلمى و ئامانجا دەسنيشانكرى بجهناهێت. چونكى پێتڤى يە ئەم بزانين و ديار بكەين كو ئارمانجا فلمە فيستەڤالێ نەتنێ کۆمكرنا فلمايە و نيشاندانا وانە د فلمە فيستەفالان دا یان دياريكرنا يەكەمينايە و دانانا وانە د ژورين تارى و تۆزگرتیدا. لێ ئارمانج ژێ کۆمكرنا فلمايە، هەلبژارتنا باشترينايە، گرێدانا جڤاكی یە ب فلمان و راكێشانا فوكسا جڤاكییە ل سەر فلمێن خوەمالى یێن خوەيی.
وەكى ديار بۆ ماوێ شەش سالانە فلمە فيستەڤال بەردوامە. ٦ جاران ل دهۆك و ٣ جاران ل سلێمانيێ ب بەشداريكرنا پترى ١٢٠ فلمان د هەر وەرزەكێ فلمە فيستەڤالێ، كو دبنە ژمارەكا زۆر يا فلمان. ب باوەريا من ژمارەكا زۆر يا ڤان فلمان ب شێوەكێ باش و چیرۆكەكا جوان هاتينە سيناريۆكرن وێنەكرن. سەرەراى وان كێموكاسیێن ئابوورى و ميكانيكی کو دكەڤنە درێكا فلمسازان. لێ ب راستی كارێ سينەمایێ ب نيشاندانا فلمان د فيستەڤالەكا ساڤا دا، هەكە پاشنەكەڤیت باوەرناكەم پێشبكەڤن. لەورا پێشنياردكەم ب ئەڤا ل خارێ د ڤان خالان دا:
١- تەرخانكرنا بوودجەيەكا پێتڤى بۆ كەسانێن سەركەفتى و رێزگرتنەكا تايبەت و تەرخانكرنا يا پيتڤى بۆ كارێن پرۆفیشنالتر.
٢- ڤەكرنا كەنالەكێ تايبەت ب فلمێن كوردی یێن ل فيلتەرێن كەسانێن پسپۆر دەربازدبن. ئانكو دلیژنا هەلسەنگاندنێ را دەرباز دبن. چونكى كێشانا فوكسا خەلكێ خوە بۆ سينەما كوردى ب فيستەڤالى تێر نابيت.
٣- كڕينا وان فلمان و نيشاندانا وان دكەنالەكێ كوردى يێ سينەمای (Kurd movies). يان ب هەر ناڤەكێ دی بيت و راكێشانا سەرنجا خەلكێ خوە و دويركركەتن ژ سينەما و دراما بيانى. چونكى ل سەر حکومەتێ و جهێن تايبەتمەند پێتڤيە كار بۆ گرێدانا خەلكێ خوە ب سينەما كوردى بكەن. ئەز باوەرم دێ پتر كەسانێن ب دروستكرنا فلمان رادبن، ئەكتەرو هەمى كەسێن فلمساز هەست ب هەبوونا رێزگرتنێ ل بەرهەمێن خوە كەن و دێ هەولدەن پتر خوە ماندیكەن بۆ كارێن پرۆفێشناڵتر.
٤- گرێدانا سينەما كوردى ب سينەما بيانیڤە ژلايێ تەكنيك، رەوشەنبيری و كلتوریڤە ب خولێن تايبەت ژلايێ كەسانێن ئەكاديمى يێن نافخۆیی و بيانى.
هيڤیيا سەركەفتنێ بۆ هەر كەسەكى دخازین کو كار کری بۆ پێشكەفتنا سينەما كوردى و گرێدانا سينەما كوردى ب چاڤێ جڤاكى كوردى.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)