بێگومان هەر بابەتەکێ دهێتە بەحس کرن و دکەڤیتە بەر لێکۆلینان مەرەم پێ لادانا هندەک پەردەیان و گەهشتنا هندەک ئەنجام یان هندەک راستییانە. ژوان ژی بەرچاڤکرنا راستیا وى بابەتى ئەوێ دیتن و بەرێخودانێن دویر ژ ژوێ راستیێ بۆ هەین. دیموکراسییەت ژوان بابەتانە یێن بەردەوام دکەڤیتە بەر لیکۆلین و دانوستاندنێ. هەروەسا خاندنێن تێروتەسەلى ل سەر دهێنەکرن بێ گەهشتن ب هیچ ئەنجامەکى. واتە دەسپێکەکا بێ دوماهیک.
دیموکراسییەت د بنیاتدا پەیڤەکا یونانییە ژ دوو پەیڤان پێکدهێت. (demo) ئانکو مللەت (kratis) ئانکو دەستهەلات. ئانکو مللەت ل دویڤ حەزا خۆ دەستهەلاتێ دهەلبژێریت کو ب رێڤە ببەت ب هەمی لایانڤە (سیاسی، رەوشەنبیرى، جڤاکى و کۆمەلایەتى) و ئەڤ بەرفرەهبوونە ببیتە بنگەهەکێ بهێز بۆ هەلبژارتنا باوەرییەکا زێدەتر ب دیموکراسیەتێ کو مەرجێ سەرەکی یێ دیموکراسیێ یە. رێبازا وێژی ئازادیا بیرورایانە. مەبەست پێ ئازادیا تاکە کەسى یە دکارێ خۆدا و د دەربڕینا هزرو بیرێن خۆدا یێ ئازاد و سەربەست بیت. هەروەسا د هەلبژارتنا پارتا وى بڤیت و ب سەربەست کارێ خو دناڤا وێ پارتێ یان بزاڤێ بکەت یا وى بڤێت. دیسان وەکهەڤى دمافاندا و وەکهەڤى بەرامبەر یاسایێ دویر ژ دکتاتۆریێ. سەرەراى ڤێ چەندێ گەلەک بزاڤ، پارت و رەوتێن ئیسلامى یێن هەین ب ناڤێ دیموکراسییەتێ هاتینە ناڤکرن. بەلێ ب تنێ ناڤە، ئەما د جێبەجێکرنێدا گەلەک دویرە. جهێ داخێیە زۆربەى پارت و دەولەتێن ئیسلامى ژبۆ ڤەشارتنا راستییا ڤی بابەتى گازیا دیموکراسیێ بلند کریە وەک دوریشم. بەلێ دبوارێ پراکتیکیدا گەلەک.
ددویرن ژ کاکلکا دیموکراسیێ. زور جاران ئیسلامى ژی پارت و دەولەتێن علمانى ب ڤێ چەندێ تۆمەتبار دکەن ژ وێ دیموکراسیا د رەفتارێن خۆدا دژایەتیا وێ دکەن. زوربەى بەرێخودان بۆ وێ یەکێ دچن ددەمێ گوهشتنا پارت و بزاڤین ئیسلامى ب دەستهەلاتێ نەشێن دەولەتەکا دیموکراسى دروست بکەن. رژێمەکا تاک حزبى دێ سەپینن ل سەر مللەتى و دێ دیموکراسیێ کەنە شێوازەک بۆ بەرفرەهکرنا دەستهەلاتا خۆ. هەتا نوکە رۆژئاڤا ترس ژ وێ یەکێ هەیە، چونکە پارت، بزاڤ و رەوتێن ئیسلامى ب مەترسیدارترین ئالاڤێ هەرفاندنا پروسێسا دیموکراسیێ ددانن. ئەڤ چەندە ژى بوویە سەدەمێ بەرکار (رد فعل) ژ ڤان پارت و بزاڤین ئیسلامى. چونکە رۆژئاڤا تا رادەیەکى خۆ ب دیموکراسی نیشاندایە و بتنێ ئەو رێبازا رزگاریا مللەتانە ژ بن دەستیێ و نەهێلانا سیستەمێ دکتاتۆریێ دناڤ دەولەتاندا. هەروەسا پەیداکرنا خۆشی، ئارامى و بەختەوەریێ دناڤ مللەتاندا و پێدڤیە هەر مللەتەک یان دەولەتەک بزانیت ئەگەر خۆ ژ چارچۆڤێ دیموکراسیى دویر بێخیت دێ تووشى چارەنڤێسەکى رەش بیت.
- فەرمانبەرێ حکوومی
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)