ڤان رۆژان گەلەک بەحسا خیانەتێ دهێتە کرن، لەوما ئەز ژی دێ ل سەر نڤیسم. ب راستی ئەگەر ئەم بەرێ خوە بدەینە رەوشێ دێ بینین کو مەسەلەیا خیانەتێ ئێدی “نۆرمال” دبیت. هەر پارتییەک پارتییا دی تاوانباردکەت، هەروەها دناڤ یەک پارتیێ دا ژی “خیانەتکرن” هەیە. ئەڤە ژی مەترسییەکا مەزنە ل سەر جڤاکی و رێکێ ڤەدکەت کو خیانەتکرن بکەڤیتە ناڤ هەر تشتەکی و ببیتە کولتور. ل ڤێرە ئەم دێ بوویەر و دیمەنێن بانگەشەیا هەلبژارتنێن پەرلەمانێ کوردستانێ ل دهۆکێ وەکو نموونە بەحس کەین..
دەمژمێر دەوروبەرێن یازدەی شەڤا ٢٦/٢٧ی سێپتەمبەرا ٢٠١٨ێ بوو. ئەم ل نێزیك دەرگەهێ کەمپا دۆمیز یا پەنابەرێن رۆژئاڤا کوردستانێ ل دهۆكێ دروونشتیبوون و مە چا ڤەدخوار. ژنشکاڤە کۆمەکا ئۆتۆمبێلێن نەفەرهەلگرێن سەربازی (کۆستەر) ب رێز چوونە پارکا بەر دەرگەهێ کەمپێ. هەڤالەکی گووت “ئەڤ هاتن ژی!”. من ژێ پرسی “ئەڤە کینە و ژبۆ چ هاتینە؟”، هەڤالێ مە گووت “ئەم هاتنە ئاگەهدارکرن کو سوبە دەمژمێر ١٢:٠٠ی نیڤرۆ ئامادەبن، دێ مە ببن یاریگەها وەرزشی یا دهۆکێ، جەنابێ سەرۆك بارزانی تێ گووتارەکێ پێشکێش دکەت دەربارێ هەلبژارتنان!”
ئەڤە من ب چاڤێن خوە دیت و من ژ ژێدەرەکێ پشتراست ژی زانی کو ل دوورترین و بچووکترین کەمپا ئاوارەیان (کەمپا بێرسڤێ- ٢٠کم رۆژهەلاتێ زاخۆ) پێنج پاس و چەند ئۆتۆمبێلان خەلک گەهاندبوونە یاریگەها دهۆکێ! ل گۆر ئاخفتنێن جاددێ ژی ل (٢٥) کەمپێن پەنابەر و ئاوارەیێن سنوورێ پارێزگەها دهۆکێ، رەوش ب هەمان شێوە بوو. ئانکو پاس و ئۆتۆمبێلێن جودا ب هزاران پەنابەر و ئاوارە دگەهاندنە یاریگەها دهۆکێ! من ب دەهان هەڤالێن ئاوارە و پەنابەر هەنە کو وێ رۆژێ وێنەیێن خوە یێن دناڤ یاریگەها دهۆکێدا ل سەر لاپەرەیێن خوە یێن تۆڕێن جڤاکی بەڵاڤکرینە.
دەمژمێر پێنجی ئێڤاریا رۆژا ٢٧ی سێپتەمبەری (ئەو دەما سەرۆك بارزانی گووتارا خوە پێشکێش دکر) مە ژڤانێ پزیشکی هەبوو. مە هزردکر خەلك هەمی چووینە یاریگەهێ و جاددە و بازار دڤاڵەنە، لەوما ئەم درەنگ ژ مال دەرکەتین. لێ دەما ئەم دەرکەتین مە دیت جاددە، کۆلان و بازارێن دهۆکێ وەکی رۆژێن بەرێ قەرەبالخن. هەر ژبەر هندێ ئەم ١٠ خولەکان گیرو بووین ژی! ئەڤە ددەمەکیدایە کو بەری چەند ساڵان دەما سەرۆک بارزانی سەرەدانا دهۆکێ دکر و جڤینەکا جەماوەری سازدکر، بازار و جادەیێن دهۆکێ “ڤاڵەدبوون” ژ خەلکی و ئۆتۆمبێلان.
هەڵبەت بەرپرسێن دهۆکێ یێن “گەندەڵ” کو تنێ خزمەتا خوە، کەسوکار، خزم و ناسێن خوە دکەن، دزانین کو یاریگەه ب پەنابەر و ئاوارەیان تژی نابیت و، پتریا خەلکێ دهۆکێ ژی گوهدارییا بانگەوازا وان ناکەن و ناچنە یاریگەهێ. ئەڤجا ژبۆ کو دیمەنێ یاریگەهێ وەسا نیشان بدەن کو تژی خەلکە و کورسی و جهێن ڤالە دیارنەبن، ب دەهان هزاران ئالایێن زەر کرنە ددەستێن خەلکیدا ب تایبەتی گەنجان دا گۆرەپان بهێتە نخافتن و ئەو بۆشاتییە دیارنەکەت. زێدەباری ڤێ یەکێ ژی فەرمان دانە دەزگەهێن میدیایی یێن نێزیکی خوە کو بێژن سەد هزار کەس ئامادەی یاریگەهێ بوونە!! بیێ کو هزرا خوە ل وێ یەکێ بکەن کو هەمی کەس دزانن یاریگەها دهۆکێ تنێ تێرا ٢٥ هزار کەسان دکەت!
ب هزرا من چارێکا ئامادەبوویێن یاریگەها دهۆکێ پەنابەر و ئاوارەبوون، چارێکەک ژی خورتێن ژێر تەمەنێ هەژدە ساڵیێ. واتە نیڤا ئامادەبوویان ئەو بوون کو مافێ وانێ دەنگدانێ دهەلبژارتناندا نینە. نیڤا دیژی بەشەك فەرمانبەربوون کو هندەك ژترسا “فەسڵبوونێ” ئامادەببوون، بەشەك ژی کادرێن حزبێ بوون کو کارێ وانە ئامادەببن. بەشەک ژ یێن مایی ژی خۆرتێن خوینگەرم و خەلکێ قوربانیدەر بوون کو ب حەزا خوە و ڤیانا خوە بۆ بارزانی “نە بۆ پارتی” ئامادەببوون!
هەڵبەت بەرپرسێن دهۆکێ ئەڤ هەمی کارە ئەنجامدابوون دا هەڤڕکیێ دگەل دەڤەرێن دی بکەن، ب تایبەتی زاخۆ کو هەردەم خەلکەکێ زێدە ئامادەی دیدارێن بارزانی دبیت. هەروەسا دا عەیبێن خوە ڤەشێرن یێن بووینە سەدەما لاوازکرنا ڤیانا خەلکی یا “خوەزایی” بۆ بارزانی. ئەو کەسێ کو بەری ئەڤ بەرپرسە گەندەڵە هەبن، دەما دهاتە دهۆکێ ب ئۆتۆمبێڵڤە دهاتە راکرن ل سەر ملان. لێ کێمچوونا خەلکێ دهۆکێ بۆ دەنگدانێ “سنوورێ لقا ئێك یا پارتی” ب رێژەیا ٥٥٪ کو نزمترین رێژەیە و د ماوەیێ ٢٧ ساڵێن بووریدا دەوروبەرێن ٨٠٪ بوویە، درەوێن بەرپرسێن دهۆکێ ئاشکراکرن!
ب باوەرییا من ئەڤا هاتییە کرن خیانەتە و پێویستە سەرکردایەتی ل سەر راوەستیت دا ل داهاتوو ژی دووبارە نەبیتەڤە. ژبەرکو “خاپاندنا” سەرۆکی ب رێکا پێشکێشکرنا زانیاری، داتا، وەسف و وێنەیێن نەدروست ل سەر رەوشێ، مەزنترین تاوانە دکارێ سیاسیدا و دبیت بیتە سەدەما کارەساتان! ژبەرکو سەرۆك بۆ هەر کار، پێشهات و پێرابوونەکێ دێ پشتبەستنێ ب ڤان زانیاری، داتا، دیمەن وەسفان کەت بۆ دانانا پلان و بڕیارا خوە! ئەڤجا ئەگەر ئەڤ تشتە ڤاژی راستیێ بن، بێگومان دێ دەرئەنجام ژی خراب دەرکەڤن.
لێ بەرپرسێن پارتی ل دهۆکێ ل شوونا کو ل هۆکارێن ڤێ داکەتنا نەنۆرمال و نەچاڤەڕێکری یا بەشدارییا خەلکی ددەنگدانێدا راوەستن. بەردەوامن ل سەر چەواشەکاریێن خوە و سترانا ئاواز نەشازا کەڤن ڤەدگێرن “مە سەرکەفتنەکا مەزن تۆمارکریە!” و ناخازن بەحس و حسابا وێ یەکێ بهێتەکرن کو ڤێ جارێ بارزانی (مەزنترین کەسایەتی ل دەف دهۆکیان) وی ب خوە سەرپەرشتیا کەمپینێ دکر و داخاز ژ خەلکی دکر بچنە دەنگدانێ! لێ دیسان ژی ٤٥٪ ژ خەلکێ دهۆکێ (کو بێگومان پتریا وان پارتینە) گوهێ خوە نەدانە سەرۆکێ خوە و نەچوونە دەنگدانێ! ئەڤە ددەمەکیدایە کو بەری نوکە دەما دهندەك هەلبژارتناندا سەرۆک دهاتە دهۆکێ داخاز ژ خەلکی نەدکر بچنە دەنگدانێ و دگووت “ئەز بڕیارا وە دزانم”.
ب راستی ئەڤە نەتشتەکێ سڤک و ئاساییە کو بهێتە پشتگوهخستن، وەکی هندەك بەرپرسێن دهۆکێ دکەن. بەلکو نیشانەکا زەق، دیار و رۆنە ل سەر کویراتیا کێشە و ئالۆزیێن ڤێ دەڤەرێ. دهۆکا کو ماوەیێ سەد ساڵانە خەلکێ وێ مریدێن مالباتا بارزانینە! ئەڤرۆ رەوش بگەهیتە وی ئاستی کو بارزانی داخازەکێ ژ دهۆکییان بکەت و ب یا وی نەکەن! ئەڤە وەکی دهۆکی دبێژن “دوماهییا دنیایێ یە!”.
- ئەڤ گووتارە بەری چەند رۆژان ب کوردی (پیتێن لاتینی) هاتبوو بەڵاڤکرن. ل سەر داخازا چەند هەڤالان مە ڤەگوهاستنە سەر پیتین ئارامی و بەڵاڤکر.