پشتی کو ئێکەتی نیشتیمانی کوردستان د یارییا ھەلبژارتنا سەرۆک کۆماریێ دا سەرکەفتن ل سەر پارتی دیموکراتی کوردستان تۆمارکری، وەکی د ھاتە گوتن کو ئێکەتیێ وەک گەلەک جارێن دی فێل د یاریێ دا بکارئینایە ھەتاکو شیاین کاندیدێ خۆ ‘د.بەرھەم سالحی ‘ بکەتە خوەدیێ ڤی پۆستی. ئەڤەژی بوویە ئەگەرێ دلگرانیا لایەنێ پارتی کو وان کار ب وێ رێککەفتنا یاریێ نەکر ئەوا ھەردوو لایەن ل سەر پێکھاتین و ئێکەتی بوو ئەگەر کو ئێکرێزیا کوردان ب کێماتی د چاڤێن عەرەبان دا بھێتە دیتن تایبەت ھندەک کەسایەتیێن شیعە مەزھەب.
لێ لڤێرە سوحبەتەک دی ژی ھەیە، ئەوژی لایەنەکێ ئێکەتیێ دگەل کاندیدکرنا دکتۆری بوون و لایەنەک نە. لایەنەکی خەمگینیا خۆ بۆ پارتی دیاردکر سەبارەت پۆستکرنا دکتۆری و لایەنەکی نە. لێ ئەڤە ب گشتی یا بوویە ئەگەرێ ھندێ کو شێوە تۆڕەبوونەک ل دەف پارتی پەیداببیت.
ئەڤ چەندا ھە ل بەغدا روویدایە، لێ ئەگەر ئەم بەحسا پێکینانا حکومەتا ھەرێمێ بکەین کو ئەڤە چەندەکە ھەلبژارتن ھاتینە کرن و پارتی بوویە خودان پترین ھژمارا کورسیان و دشێت ھەر دەستھەلاتەکێ پێخیت بن دەستێ خۆ، و ھەروەسا دشیانێن وان دایە پتریا بریارێن گرێدای دەستھەلاتا سیاسی، ئابوری و بازرگانی بدەت. زێدەباری ھندێ دشێت کۆنترۆڵا ھەر فێلەک و خەلەتیەکێ بکە،ت چونکو ڤێرە کوردستانە نە پەرلەمانێ عیراقێ یە.
ل ڤێرە پسیار ئەوە ئەرێ پشتی ئەو فێلا ئێکەتیێ کری پارتی وەک خولێن بوری دێ خودان ئالایێ کەسک کەتە ھەڤپشک و ھەڤالا خۆ، یان ژی ئەوان وانەیەک ژ فێلا وان وەرگرتیە و ئێدی باوەری ب سیاسەتا وان نەمایە، یان پۆستێن تایبەت ب وانڤە دێ ھەر بن بەھرا وان یان دێ بنە بەھرا حزبێن دی و ئەرێ کی دێ ڤان پۆستان وەرگریت ئەگەر ئێکەتی نەبیت؟
پسیار ل ڤێرە گەلەکن، لێ ب ھزرا من ئێکەتیێ تا رادەیەکی ھێزا سیاسیا خۆ بەرامبەر حزبێن کوردستانی ژ دەستدایە، و ئەو چەندا وان کری دێ بیتە ئەگەرێ گوھرینا گەلەک ئاراستەیان کو ئەڤە چەندین ساڵە حزبێن ناڤبری وەک تیتال بخۆ بکاردئینا، و ئەگەر ھات و خەلکێ کوردستانێ چ گوھرین د ھەڤکێشەیا نوو یا حکومەتێ دا نەدیتن، ئەو دڤێت بزانین کو پارتی ب ئاوایەکێ نە راستەوخۆ یا سزایێ ئێکەتیێ ددەت، چونکو یان پارتی رویڤی دکوژیت یان دێ ژ دویرڤە پاریێ نانی نیشادەت.
- قوتابیا پەیمانگەها تەکنیکی، بەشێ (ئای. تی).