سەقەتی، ئانکو کێماسییەکا ئێکجار زۆر د کەرتێ پەروەردێدا هەیە ل ھەرێما کوردستانێ و نموونە ژی دزۆرن. مینا سەقەتیا وەرگرتنا قوتابیێن پۆلا دوازدێ ئامادەیی. دھەمی جڤاک و وەلاتێن پێشکەفتیدا گرنگییەکا ئێگجار زۆر ب دوو کەرتان ددەن. ژوان ژی کەرتێ پەروەردێ، کەرتێ تەندروستی.
ل ڤێرە کێماسی دھەردوو کەرتاندا ھەیە و دێ سیستەمێ پەروەردێ وەک نموونە وەرگرین. ئەگەر بەرێخوەدانا سیستەمێ پەروەردێ بکەین ل وەلاتێ خوە و بەراورد بکەین دگەل وەلاتەکێ پێشکەفتی، زۆرا جیاوازە. چ ژ روویێ ئاڤاھیانڤە وەک قوتابخانە کو کوالێتی دئاستێ پێدڤیدا نینە، یانژی ژ روویێ گرنگیپێدانێڤە. ئەڤە د دەمەکێدایە کو سیستەمێن وەلاتێن پێشکەفتی ل سەر مە جێبەجێ دکەن!
بێگومان ل وەلاتێ مە گرنگی ب ڤی کەرتی ناھێتە دان و حکومەتێ زۆر پشتگوھ ھاڤێتیە. وەزارەتا مە یا پەروەردێ دێ سیستەمێ سویدی، یانژی ھەر سیستەمەکێ دیی ئینت و ل سەر قوتابیێن مە جێبەجێکەت. بەلێ بەرێخوە نادنێ دوی سیستەمیدا ھاتیە کو دڤێت دھەر پۆلەکێدا نێزیک ١٠ قوتابیان هەبن یان پیچەك زێدەتر. لێ ل قوتابخانەیێن مە کو سیستەم سویدیە، زێدەتری ٣٠ قوتابیان دئێک پۆلڤە ھەنە و رەنگە ھندەک پۆلاندا ژمارە بگەھیتە ٥٠ قوتابیان ژی. ئایا ٥٠ قوتابی دێ شێن مفایی ژ گوھداریکرنا وانێ وەرگرن؟ بێگومان دئاستێ پێدڤیدا وەرناگرن، و دێ گەلەک کێماسی تێدا ھەبن.
کێماسییەکا دیی یا ژ ھەمیان مەزنتر ئەوە کو ١٢ سالان بخوینێ و نمرەیەکا باش بدەست خوڤە بینێ، ل دوماھیێ ل پەیمانگەھەکێ یان کۆلیژەکێ بھێیە وەرگرتن کو ل ئاستێ نمرا تە و ماندیبونا تە نینە. دبیت نمرەیەکا باش بدەستڤە بینێ و ل دوماھیێ نەھێیە وەرگرتن ل ھیچ ناڤەندەکا خاندنێ!
ژ سەقەتیێن وان من ئەڤ نموونە و بەلگە ھەنە؛ قوتابیێ کور ل بەشێ تەندروستی یێ کو ل پشکا ژ دایکبوونێ بھێتە وەرگرتن!! قوتابیێ کۆنمرەیا ویی ٩١٪ ل باخچێ زارۆکان بھێتە وەرگرتن! قوتابیێ بەشێ وێژەیی کۆنمرەیا وی ٩٠٪ ل پەیمانگەھەکێ بھێتە وەرگرتن!! قوتابیێ بەشێ زانستی کۆنمرەیا وی ٨٤٪ ل ھیچ جھەکێ نەھێتە وەرگرتن!! قوتابیێ کۆنمرەیا وی ٥٨٪ ل پەیمانگەھەکێ بھێتە وەرگرتن!! بەھانەیا ژ ھەمیان مەزنتر یا پەروەردێ ئەوە کو قوتابی خەلەت فۆرمان پردکت. ئایا ئەڤێ کۆنمرەیا وی ٩٠٪ بەرئاقلە ل ھیچ جھەکێ نەھێتە وەرگرتن؟ و گەلەک نموونەیێن دی یێن پێشچاڤ ھەنە.
گەلۆ دێ چ گەشبینی و پاشەرۆژا گەش ب ڤی سیستەمی ھەبیت؟ ئەگەر رەوشا ھوسا بیت بەشەکا زۆرا قوتابیان زەوق ل سەر خاندنێ نامینت. ب ڤێ چەندێ ھێدی ھێدی جڤاک دێ بەرەف نەخوێندەواریێ چیت. نەخوێندەواری ژی تاریاتی و ژناڤچوونا مللەتانە.
ئێدی سیستەمێ سوێدی بۆ پێشڤە!
- رۆژنامەڤان