عەرەب دبێژن دانپێدان ب شاشیێ فەزیلەیە!! لێ هەروەکی بۆ حکومەتا مە کێماسییە! چونکی هێشتا حکومەتا کوردستانێ دانپێدان ب ئاریشە و لاوازیێن خۆ نەکریە، بەلکی بەروڤاژیا وێ هەیە. نموونەیەکا ڤێ چەندێ ژی دگۆتارا بەڕێز سەرۆکێ حکومەتێدا دیاربوو کو بەری چەند رۆژان ل زانکۆیا ئەمریکی ل دهۆکێ پێشکێش کربوو، دەما گۆتی: “ئەگەر دەرفەتێن کاری نەبن، بۆچی ١٠٠ هزار کرێکارێن بیانی ل کوردستانێ هەنە؟!” ئەڤ پرسیار و بەرسڤە گەلەك دگرنگن و چەندین پرسیاران دگەل خۆ دئینن. بۆ نموونە: ل جهێ پرسیار ژ جەنابێ سەرۆکی بهێتەکرن ئەڤ ١٠٠ هزارە چدکەن و کینە!؟ یان حکومەتێ راپرسیەك کریە بۆچی خەلك دبێژیت دەرفەتێن کاری نینن!؟ بۆ نموونە: ل خارنگەهێن دهۆکێ و هەولێرێ زۆرینەیا رەها یا “گەرسۆنان” خەلکێ بیانی و ژ دەرڤەی هەرێما کوردستانێ نە. من باوەرنامەیا ماستەرێ و دوو بەکالوریۆس هەنە، ئەز یێ ئامادەمە ل وان خارنگەهان وەك گەرسۆن کاربکەم! لێ ژبەر نەهایداربوونا حکومەتێ ژ رەوشا واقعی یا کوردستانێ ئەز نەشێم ل وێرێ کاربکەم. هەرچەندە من منەت پێ نینە و ئەڤە نەگازندەیە ژی ئەز بۆ رەوشا خۆ دکەم، بەلکی بۆچوون و دیتنا منە ل سەر رەوشا گشتی!
هەڵبەت بەڕێز سەرۆکێ حکومەتا کوردستانێ جارەکا دیژی گۆتبوو: “ئەگەر خەلك هند یێ هەژارە، بۆچی زێدەتر ژ دوو ملیۆن ترۆمبێلان ل کوردستانێ هەنە!؟”. ئەڤە جۆرە گۆتنە ژی بەلگەنە ل سەر هەبوونا کێماسییان و عەشوائیەتەکا بەرفرەهـ ژی دناڤ حکومڕانیێ دا نیشان ددەت. چونکی هەبوونا دوو ملیۆن ترۆمبێلان نیشانا زەنگینیا خەلکی نینە. بەلکی کێماسی و بێ ئاگەهیا دەسهەلاتێ یە و نەبوونا پلانەکا ستراتیژییە بۆ ئالاڤێن ڤەگۆهاستنا گشتی کو ل وەلاتەکێ هەژار یێ وەکی بەنگلادش ئەو ئالاڤ هەنە. لێ بۆ حکومەتەکا زەنگین یا کو ١٠٠ هزار کرێکارێن بیانی تێدا کاردکەن، نینن.!