کورد، ناڤەکە کو هەلگرێن وى ب سەدان سالانە شەرى دگەل مان و نەمانێ دکەن ژ پێخەمەت ئازادییەکا بەرتەنگ. ئەو تێکۆشینێ دکەن ژ بۆ سەرخستنا ناڤەندەکا بچیک و هەبوونا دەسهەلاتەکا لاواز کو ب تنێ هەبوونا ناڤێ وان دیار ببیت. باشترین میناک ژى میرگەهێن بەرى دوو سەد سالێن بوورى یێن کوردانن. لەورا پشتى هەڵوەشیانا میرگەهان دەستهەلات بچیکتر لێهات و دابەشى سەر دەڤەرێن بچیکتر دبیت و دەستهەلاتا میرى بۆ ئاغا ڤەدگەریت و عەشیرەت دبیتە خالا تێکۆشینى ژ بۆ مانا کەسێ کورد. پتریا عەشیرەتان و سەرانێن وان ل باشوورێ کوردستانێ هەردەم لایەنگرێن دەستهەلاتا ناڤەندى بوون. لێ ئەوا جهێ داخێ و مخابنیێ پشتى سەرهەڵدانا کوردى ل عیراقێ، بها و سەنگ و کەرامەتا عەشیر و ئاغا زێدەتر لێهاتیە و د سەردەمێ نوکە دا ئەون سەرڤەگێرێن هەمى ڕێ و ڕێبازێن ژیانێ.
حزبێن کوردى زێدەتر گرنگى دایە ناڤێ عەشیرەتێ. پەرلەمانێ کوردستانێ وەک ناڤەندا عەشیرەتێن باشوورى لێهاتیە و پتریا وان نوینەرێ خۆ ل ڤێ ناڤەندێ هەیە. هەروەسا دام و دەزگەهێن حکومەتێ ژى ژ کور و کچێن هەلگرێن ناسناڤێ عەشیرەتێ د پڕن. هژمارەکا زێدە ژ ناڤەندێن خاندنا مەزن و پەیداکرنا دەلیڤێن خاندنێ یێن ژ دەرڤەى وەلاتى و نافخۆ ب کەد و ماندیبوونا خۆ بوویە بەهرا کەدکارێن بێ عەشیرەت. ڤان کور و کچان خۆ زێدە ماندیکریە و شیانە ب شیانێن خۆ ڕاستیا هەبوونا خۆ بسەلمینن. لێ تا نوکە ل ڤێ هەرێمێ نەشیانە ببنە خودان جهـ کو د ئاستێ برێڤەبرنێ دا بیت. لەورا دبێژن دڤێت ئەڤ کێمینەیێن کوردى یێن باشوور چ بکەن؟ وەک بەرى نها یا خۆ بژین؟ ببنە فدراسیۆنەکا گوندان و ب ناڤێ عەشیرەتێ کار بکەن؟ یان ژى هەر تشتێ ڤى وەلاتى بۆ عەشیران بجهـ بهێلن و ڕێک و قەدەرەکا نەدیار داننە پێشیا خۆ؟
- (گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)