پشتی گەهشتنا ڤایرۆسێ کۆرۆنا بۆ ئەورۆپا و وەڵاتێن رۆژئاڤایی. حکوومەتێن گەلەك ژ وان وەڵاتان دەوام ل هندەك فەرمانگەهێن خوە کێمکرن. ل هندەکان ژی بۆ چەند رۆژان کار ل ئاستەکی “راگرتن”. لێ پتریا جاران ب شێوەیەکی بوو کو کێمترین رێژەیا کارمەندان نەچنە سەر کاری. یانژی فەرمانبەر ل مال و ب رێکا ئۆنلاین کارێ خوە جێبەجێ بکەن. ژبەرکو راوەستاندنا کاری ل هندەك سازیێن وان وەڵاتان، زیانەکا مەزنا ئابووری دگەهینیتە خەلك، سازی، حکوومەت و دەولەتێ. ل شووینا راگرتنا کاری، رێنمایی دەرێخستن بۆ بکارئینانا ماسك و دەسگۆرکان و کێمکرنا تێکەلیێ و هێلانا بیاڤێ متر و نیڤ تاکو دوو متران دناڤبەرا کەساندا ددەما کۆنتاکێدا.
ل کوردستانێ نێزیکی سێ هەیڤانە حکوومەتێ دەوام و کار ل هندەك سازییان راگرتیە. ژبلی رێڤەبەریێن تەندروستی و پۆلیسان و فەرمانبەرێن وان کو رێژەیا وان ناگەهیتە ٢٠٪، پتریا رێڤەبەرییان و فەرمانبەرێن وان کو هژمارا وان ب سەدان هزارە کار ناکەن. حکوومەت نەیا پەرۆشە بۆ دیتنا رێکان بۆ دەسپێکرنا کاری و ب ئاسایی وەردگریت کو فەرمانگەهێن وێ دگرتینە و هەر درێژ دکەت. ئەڤە دیاردکەت کو حکوومەتێ پلان “A” نەبوویە، لەوما ئۆتۆماتیکی پلان “B” ژی وەکی هەر جار بوویە رەڤین. رەڤین ژ رویبرویبوونا فەرمانبەر، کرێکار، جۆتیار و تەنانەت نڤێژکەران و چارەسەرکرنا رەوشێ. هەروەسا وێ گۆمانێ ژی دروست دکەت کو زۆربەیا فەرمانگەهان دبێ بەرهەم و زێدەنە. سەرکەفتن و دەربازکرنا ڤێ رەوشێ ژی ئەوە حکوومەت پلانەکێ دانیت و روو ب رووبوونێ هەلبژێریت.