حكوومەتا ھەرێمێ دبێژیت، نەدانا مووچەیان ژ ئەگەرێ ڤایرۆسێ كۆرۆنا و كێمبوونا نرخێن گازێ. لێ ب دیتنا من نەدانا مووچەیان دزڤریت بۆ نەپێگیریكرنا حكوومەتا ھەرێمێ ب رێككەفتنا گازێ و غازێ و (50%) ژ داھاتێن دەربازگەھێن سنووری دگەل حكوومەتا عیراقێ یا ساڵا (2019)ێ. چونكو ئەگەر حكوومەتا ھەرێمێ پێگیری ب وێ رێككەفتنێ ھەبا حكوومەتا عیراقێ دا ھەموو شایستەیێن ھەرێمێ ھنێریت. لێ حكوومەتا ھەرێمێ گاز و غاز و داھاتێن دەربازگەھێن سنووری ناھنێریتە عیراقێ و شایستەیێن فەرمانبەران ل ھەرێمێ وەك مووچە نادەت. ل ڤێرە دیار دبیت نەدانا مووچەیێن فەرمانبەران پەیوەندی ب كێمبوونا نرخێن گازێ و ڤایرۆسێ كۆرۆناڤە نینە. پەیوەندی ب گەندەڵیێڤە ل ھەرێمێ و نەسەركەفتنا حكوومەتێن بەرێ و ڤێ حكوومەتێ ھەیە ئەوا دروشمێ (لپێناڤ كوردستانەكا بھێزتر) راكری و پشتی (100) رۆژان ژ دامەزراندنا وێ، سەرۆكێ حكوومەتێ ب شانازیڤە دگۆت ( من داھاتێن ناڤخۆیی زێدەكرینە).
لێ نھۆ دیاردبیت حكوومەتەكا لاواز و سەرنەكەفتیە. چونكو ئەگەر حكوومەتا ھەرێمێ داھاتێن دەرەكی و ناڤخۆیی و گاز و غاز ھەبن. چەوا نەشێت مووچەیێن فەرمانبەران بدەت؟ ژلایەكیێ دیتر ڤە، راستە نەشێت مووچەیان بدەت. چونكو ھەموو ئەو داھات یێ دابەشكرییە دناڤبەرا ھەردوو پارتێن دەستھەڵاتدار (پارتی و ئێكەتی). ئەڤ ھەردوو پارتە دێ نەدانا مووچەیان ژلایێ حكوومەتا عیراقێ گرێدەن ب بڕیارەكا سیاسیڤە دژی ئێك ژ وان پارتانڤە كو دا گەندەلیێن خۆ ڤەشێرن. ئەڤجا ئەگەر كەسەك ژ وان ھەردوو پارتان بڤێت چاكسازیا دۆخێ بكەت ل ھەرێمێ، دڤێت دەستبچاكسازیا خۆ و پارتا خۆ بكەت. نەك كێمكرنا مووچەیێن فەرمانبەر و مامۆستایان، ئانكو ھەر (50 یان 60) رۆژان ئێك مووچە بدەن.