گرنگیا کەرتێ تایبەت بۆ نەهێلانا بێکاریێ

نەهێلان و کارکرن ژ بۆ پەیداکرنا دەلیڤێن کارى بۆ بێکارێن کوردستانێ، دڤێت د خالا بنگەهین و سەرەکى یا حکومەتێ دا بیت ل هەرێما کوردستانێ. چمکى دەلیڤێن کارى یێن کێم بووین و سالانە ژى هژمارەکا مەزن ژ کەسێن خودان شیان و دەستێ کارى ل سەر وێ رێژەیا بێکاریێ زێدە دبیت. دگەل کو سالانە هژمارەکا مەزن ژ گەنجان ژى ژ پەیمانگەهـ و زانکۆیان دەردچن و دبنە بارگرانیەکا دیتر ل سەر ملێت حکومەتێ. حکومەت دڤێت یا دویربین و ب پلان بیت. دڤێت هزر د پەیداکرنا دەلیڤێن باش و مەزن و بەردەوام یێن کارکرنێ بۆ خەلکى بکەت. نابیت ب تنێ پشتا وێ ب داهاتێ نەفتێ یێ گەرم بیت و هەر چەند سالان جارەکێ چەند گەنجەکان ل سەر کەرتێ گشتى دامەزرینن. لێ بەروڤاژى دڤێت د نوکە و پاشدا ب رێژەیا 90% کەرتێ گشتى دامەزراندن دناڤدا نەمینیت و وێ رێژەیێ بدەنە کەرتێ تایبەت. دڤێت حکومەتا هەرێمێ ب پلان پالدەر و هاریکار بیت دگەل پرۆژێن بچویک و ل دەستپێکێ وان پرۆژەیان پارەدار بکەت.

پاشان گەشەپێدانێ د هەر دوو کەرتێن چاندن و دیڤ دا پیشەسازیێ دا بکەت. دەستپێکێ دڤێت ژ پیشەسازیا خارنێ دەست پێبکەن و بشێت داهاتێ ناڤخۆ ئەوێ ژ کەرتێ چاندنێ دهێت دابین بکەت و یێ ماى رەوانەى دەرڤەى وەلاتى بکەت. ژ بۆى کو ئەڤ پلانە سەربگریت، دڤێت حکومەت وەکهەڤیێ د مافێ فەرمانبەرێن هەر دوو کەرتان دا پەیدا بکەت. فەرمانبەرێن کەرتێ تایبەت دڤێت یێ ب باوەر بیت ل سەر پاشەرۆژا خۆ و داهاتێ خۆ. خزمەتا کەرتێ تایبەت بۆ بهێتە هژمارکرن و دگەل سالێن کارى و دگەل گەهشتنا ژیێ دیارکرى بهێتە خانەنشینکرن. ژ بۆ کەرتێ گشتى ژى، هەر دەما دەلیڤا کارى د کەرتێ گشتى دا پەیدا دبیت، دڤێت ل گۆرەى هژمارا ئاکنجیێن هەر پارێزگەهەکێ ئەو دەلیڤە بهێنە دابەشکرن. ل سەر ئاستێ پارێزگەهان ژى دەلیڤە بهێنە شۆرکرن بۆ ناڤەندێن قەزا و ناحیەیان و ب چ رەنگەکى دەلیڤا واستەکاریێ و بەرتیلا ب رێکا دادگەهێ نەهێلیت.

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top