مسته‌فا سه‌لیمی یان تارق محەمەد عه‌زاوی؟

بارزانیێ نه‌مر دبێژیت ئه‌گه‌ر كوردایه‌تی گرانه‌ خیانه‌ت نه‌كرن ئه‌رزانه‌. لێ هوسا دبینین د ڤان ساڵێت بووری دا خیانه‌تكرن ئه‌رزانه‌ و كوردایه‌تیكرن هه‌ر گرانه. گه‌له‌ك یا هاتیه‌ گوتن ژلایێ سه‌ركرده‌ و ره‌وشه‌نبیر و شۆرشگێرانڤه‌ كو كورد ژ ده‌ستێ خیانه‌تێ هاتینه‌ شكه‌ستن و بێ ده‌وله‌ت بوون. دیسان ڤان رۆژان بێهنا خیانه‌تێ دفنێت مه‌ تژیكرن ژ مه‌زلومیا مسته‌فا سه‌لیمی زیندانیێ سیاسی ژ زیندانا سه‌قز هاتبوو ره‌ڤین و د مالا برایێن خۆ یێن كورد داهاته‌ ره‌وانه‌كرن بۆ باوه‌شا به‌نكێ سێدارێ ل ده‌وله‌تا فه‌قی یا پێشه‌وا و سه‌دان شۆره‌شگێرێن كورد سێداره‌داینه‌ ب گونه‌ها كوردبوونێ. هه‌تا كه‌نگی رێ ب ڤان كارێن خیانه‌تكاری بهێته‌دان؟ هه‌تا كه‌نگی ده‌نگێ گه‌ل و پارت و ده‌سه‌لاتا كوردی بێ ده‌نگ بمینه‌ به‌رامبه‌ر ڤان خیانه‌تكاریان؟ ره‌وشا هه‌رێما كوردستانێ دیفاكتویه‌كا دوو ئیدارەیی بخۆڤه‌گرتیه‌ وه‌ك مه‌زن دبێژن سه‌رێ دوو به‌رانان د قازانكه‌كێ دا ناكه‌لن. ئه‌رێ هه‌تا كه‌نكی دێ دوو ئاسایش و دوو هێزێن پێشمه‌رگه‌ی و دوو بازرگانی و ده‌سه‌لاتێن جودا به‌رده‌وام بن؟

له‌وما ئه‌ز لومه‌ی پارتی دیموكراتی كوردستان تایبه‌تی و هه‌می هێزێن كوردی ب شێوه‌یه‌كێ گشتی دكه‌م به‌رامبه‌ر ڤان كارێن خیانه‌تكاری یێن هندەك لایەنان. ئه‌رێ ب چ لۆژیك هێزێن كوردی هه‌وڵا خۆشكرنا په‌یوه‌ندیا دگه‌ل ڤان دكه‌ن. دڤێت هه‌می هێزێن كوردی ڤان كه‌سان سزابده‌ن حه‌تا سزایه‌كێ دبلۆماسی بیتن. ئه‌گه‌رنه‌ هه‌می هێز بێ ئێك و دوو به‌شدارن د كارێن ره‌شێن ڤان كه‌سان دا. تارق ئەلعه‌زاوی ئه‌و فرۆكه‌ڤانێ پێنج هزار كورد ل هه‌له‌پجه‌ كێماباران كرین. پشتی كه‌تنا به‌غداد ل ٢٠٠٣ هاتیه‌ ده‌سته‌سه‌ركرن، پاشی وەک هاتی راگەهاندن ل کوردستانێ ل زۆنا کەسك هاتە ئازادکرن و هاته‌ ره‌وانه‌كرن بۆ ئه‌ورۆپا. ل شوینا سزا بده‌ن هاتیه‌ خه‌لاتكرن. دبه‌رامبه‌ر دا مسته‌فا سه‌لیمی ب گونه‌ها كوردبوونێ هاته‌ ره‌وانه‌كرن بۆ به‌نكێ سێداره‌دانێ ل ئیرانا خوینمێژ. ماده‌م ل ڤێ ده‌ڤه‌رێ سیاسه‌ت ب كردار و په‌رچه‌كردار دهێته‌ كرن، دیتنا من باشترین په‌رچه‌كردار پارتی دیموكراتی كوردستان كربا پێتڤی بوو مه‌لا كرێكار زڤراندبا هه‌رێما كوردستانێ. ئه‌گه‌ر ئازاد نه‌كربا ل هه‌رێمێ دادگه‌ها وی هاتباكرن ب سزا یان بێ سزا هه‌رێمێ ژیانا خۆ ده‌ربازكربا. ژبه‌ركو مه‌لا كرێكار كورده‌ و ژ هندەك خیانەتکاران گه‌له‌ك ب وه‌فاتره‌ بۆ دین و ره‌وشت و نه‌ته‌وا كورد. ب ڤان كریاران پێشڤه‌برن و دامه‌زراوه‌كرنا ده‌زگه‌ه و ده‌سه‌لاتا هه‌رێمێ هزار خالێن سه‌رسۆرمانێ ل سه‌ر دهێنه‌ دانان. یان دوو ئیداره‌ی یا راست و درست یان خیانه‌تكرن و پاشڤه‌زڤرینا ده‌ستهه‌ڵاتا كوردی و خه‌ساندنا قه‌زیا ملله‌تێ كورد.

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top