ل کوردستانێ و ل هندەك وەڵاتێن جیهانێ ژی، خەلکی دەم، دەرفەت و هندەکان حەز ژی نەمایە گۆتار، نڤیسین و داڕشتنێن درێژ بخوینن. دبیت هۆکارەکێ ڤێ چەندێ ئەو بیت کو دڤی سەردەمیدا رۆژانە گەلەك بوویەر هەنە کو ب لەز چێدبن و دەلیڤە نینە هەمیان ببینیت و بخوینیت. ئەڤجا ژبۆ باشتر گەهاندنا هزرا خوە، مە بڕیاردا (گۆتارۆکان)، ئانکو کورتە گۆتاران بنڤیسین. ژبەرکو ئارمانجا سەرەکی ژ نڤیسینا هەر هزر و بیرۆکەیەکێ گەهاندنا وێیە بۆ خەلکی. یا گرنگتر ژی ئەوە بگەهیتە مەزنترین ژمارەیا خەلکی. هەڵبەت خاندەڤانێ رۆژنامە، نووچە، راپۆرت، ریپۆرتاژ، گۆتار، هەڤپەیڤین و کارێن رۆژنامەڤانی یێ تایبەتە و ئەگەر بابەت درێژ ژی بن هەوڵددەت بخوینیت. لێ مخابن هژمارا ڤێ تەخا بژارە دجڤاکێ مەدا گەلەکا کێمە.
دڤێ رەوشێدا ژبۆ کو نڤیسین بگەهیتە وێ هژمارا دلخاز یا خاندەڤانان، گرنگە دەربڕینێ ژ رەوشا هەنۆکەیی بکەت و یا کورت و تێر بیت. لەوما ئەم دێ هەوڵدەین هزر، تێبینی، بۆچوون، دیتن و رەخنەیا خوە ل سەر هەر بابەت، مژار، کار و بوویەرەکێ ب کورتی بەحس بکەین. ب مەرجەکی کو بەرسڤا پرسیارێن سەرەکیێن کارێ رۆژنامەڤانی تێدا بیت و خاندەڤان زانیاری و تاما دروست ژێ وەربگریت و ئاگەهداری دەوروبەرێن خوە بیت. هەروەسا هەست ب ئازار، خوەشی و هەبوونا خوە ژی بکەت دناڤ پەیڤێن ڤان نڤیسیناندا. ئەم هیڤیدارین بشێین ب ڤێ رێکێ تشتەکێ باش و ب مفا پێشکێش بکەین، تەنانەت ئەگەر بشێین ژمارەکێ ب تنێ ژی ل سەر لیستەیا خاندەڤانێن رۆژنەماڤانیێ زێدەبکەین.