هیچ جارەکێ مە باوەر ژ سازیێن خوە نەکرییە، ئەگەر حکوومەت بێژیت دێ فلان پرۆژەی ل فلان رێککەفتێ دروست کەین هەر زوو دێ کەینە جهێ تڕانا و دێ ب رێکا سۆشیال میدیایێ و گۆتگۆتکێن چایخانەیان و بەر دیواران هەر چ تڕانە و سڤکاتی یە ب وێ بڕیارێ کەین. بۆ ڤێ ژی تا رادەیەکی سووچێن حکوومەتێ نە، چونکی باوەرییا دناڤبەرا خوە و جڤاکیدا لاوازکرییە. لێ وەک مە ئاماژەپێکری بۆ چ تشتان خەلکێ دەڤەرا مە، واتە پارێزگەها دهۆکێ باوەر ژ سازیێن خوە ناکەت. نزانم خێرە ڤێجارێ کو سازیێن ساخلەمی و راگەهاندنا ساخلەمییا دهۆکێ دبێژن: هیچ حالەتەکێ تووشبوون ب ڤایرۆسێ کۆرۆنایێ ل دهۆکێ نەهاتییە تۆماڕکرن. باوەرییا تاکێ دهۆکێ گەلەک خورت بوویە کو چ حالەت نەهاتینە تۆماڕکرن. واتە هێشتا کۆرۆنا نەگەهشتییە دهۆکێ! ڤێ چەندێ دبێژم نەکو دا باوەرییا مە ب راگەهاندنا ساخلەمییا دهۆکێ بشکێت و گۆمان دروست ببن کو حالەت هەنە و راناگەهینن. لێ ما کی نابێژیت حالەت هەبن و نەگەهشتبنە بەر دەستێ سازییێن ساخلەمیێ! کی نابێژیت سوبەهی جوامێرەکێ تووشببووی کو ئەو ژی نزانیت یێ تووشبووی و ل جهەکێ دی سەرەدانا دهۆکێ بکەت و دەهان کەسان تووش بکەت!
هێژایان، برایان بابەت نەترساندنە و نەشکاندنا باوەریێ یە، بابەت ئەوە هەتا نوکە ژی وەکی یا دیار خەلکێ مە ب تایبەت یێ دهۆکێ دمەترسییا ڤی ڤایرۆسی و بەڵاڤبوونا وی نەگەهشتییە. دبینین ل هەر دیوان و جڤاتا باس ل ڤی ڤایرۆسی بهێتەکرن کەسەک دێ بێژیت: خوە نەترسینن یێ رۆژا وی هات دێ هێت و یا خودێ حەزکری دێ ئەو بیت! ئێکێ دی دێ بێژیت، خەلکێ مە خوە بزداند چ چێنەبوویە…هتد. دبێژن جوویەکی کورێ خوە دقوتا “ئەشکەنجەدا”، ئێکی گۆتێ: تو بۆ دقوتی، جووی گۆتێ دێ کەپەنی دئاڤێدا بەردەت! وی جوامێری ژی گۆتێ: ئێ مامۆ نێ هێش کەپەن یێ ل وێرێ و دئاڤێدا بەرنەدایە. جووهی لێ زڤڕی و گۆتێ: ما ئەگەر دئاڤێدا بەردا ژنوی قوتانێ چ فایدێ خوە هەیە! ئەڤجا ئەگەر ڤایرۆس ژی مینا بێی کارەبایی، بێی نەفتی و بێی پارەیی و مل ب ملێ قەیرانێن ئێک ل دووڤ ئێکدا ل ناڤ مە دا بەڵاڤبوو. ل وی دەمی پت پت و گۆتگۆتکێن ل بەر دیواران تێرا رەوەستاندنا ڤی ڤایرۆسی ناکەن. ئەم تڕانەیان ب (مامۆستا، پزیشک، مەڵا، حکوومەت، رەوشەنهزر…هتد)ێن گەلێ خوە دکەین، ئەڤ نەخۆشی و ڤایرۆسێ ڤەگر ژی هات. باوەرناکەم هیچ گەلەکی تەمەت مە کوردان تڕانە پێکر بن. ڤیدیۆیەک بەڵاڤبوویە کو ئەو کەسێن ل ئیرانێ زڤڕینە هەرێما کوردستانێ بۆ ماوەیەکێ دەمکی ل ئۆتێلەکێ هێلاینە بۆ وێ ئێکێ پشتراست ببن کو ل ئیرانێ نەبووینە هەلگرێن ڤایرۆسێ ناڤهاتی. ل شوونا خوە ژ هەڤدوو دووربکەن و زێدەتر ژ پاراستنا چاڤێن خوە خوە ژ هەڤدوو بپارێزن دا کو ئەگەر ئێک ژ وان هەلگر بیت نەبیتە ئەکەرێ وێ ئێکێ ئەو کەسێن ل ئۆتێلێ هەموو تووش ببن، ڤیدیو بەڵاڤبوویە کو ل جهەکێ ئۆتێلێ (دەوات، سەما، هەڵپەرکێ، دیلان، دانس….)دکەن، کا چ زاراڤێ خۆشیێ یە هەموو ل سەر دگونجن چونکی هەموویان پێکڤە ئەنجامددەن! تو بێژی ئێک ژ وان هەلگرێ ڤایرۆسی بیت و یێن دی یێن د ئۆتێلێ ڤە هاتبنە پاراستن؟! ئەڤە نموونەیەکا پڕاکتیکی یە ژ تڕانەپێکرنا مە کوردان ب ڤایرۆسی. د میدیایا جڤاکی یا خەلکێ پارێزگەها دهۆکێ ژیدا جوامێرەک هندەک رێنمایان بەڵاڤبکەت سەدان کەس دێ بێژنێ، تە خوە کرە پزیشک و شروڤەکار. گەهشتییە ئاستەکی گەلەک کەس ژبەر تڕانە و سڤکاتیپێکرنا دەردوورێ شەرم دکەن دەمامکان ژی بکاربینن! دەزگەهێن مە یێن راگەهاندنێ ژی هند مژوولی بەڵاڤکرنا هشیارییا تاکی نینن ل سەرڤی ڤایرۆسی هندی مژوولی بەڵاڤکرنا ئامارێن چینێ و شەڕ وئالۆزیێن جیهانێ، ژبیرکرییە یان ژبیرا خوە دبەن کۆ ئالۆزی و قەیران و خوەلیسەریێن ڤی گەلی ل پێش یێن جیهانێ بئێخن و بکەنە مژارێن گرنگ. لەوما ئەڤە نەئامۆژگاری نە و نەژی شروڤەنە بتنێ مە ئەڤ خالە دانانە سەر پیتان کو هەر چ نەبیت تو یێ خاندەڤانێ ڤێ نڤیسینێ د وێ ئێکێ بگەهی کو ئەڤا رووددەت مەترسییەکا رژدە و جۆداهیێ دناڤبەر چ “کەس، باوەری، ئۆل، باژێڕ و نەتەوە”یان دا ناکەت… و چ جوداهیێ دناڤبەرا چایخانە، قوتابخانە، نەخۆشخانە، مۆڵ، کەنیسە و هەتا مزگەفتان ژیدا ناکەت. مینا ئاگری دەمێ بەردبیتە رێلی ڤێڕا دچیت. نابیت خوە ژێ بترسینی لێ خەمساری د خوەپاراستنێ دا دێ خوە و دەردوورا خوە ئێخییە دمەترسیێ دا و دێ تە کەتە دارەک ژ دارێن ئاگری خۆش دکەن.
- نوونەرێ رۆژئارتیکڵ ل ئامێدی