بەرسڤدانەك ل سەر ئەوا حكومەتا نوو پەسنا وێ كری كو دەسكەفتن دماوەیێ (100) رۆژاندا ژ پێكئینانا وێ، چاككرنا ژیانێ و خزمەتان نە راوەستیانە بەرامبەر كامیرەیێن تێلەفزیۆنێ و گۆتنا پەیڤانە وەك ھۆزانڤانان لێ دەستنیشانكرنا كارانە لپێناڤ بدەستڤەئینا رازەمەندی و باوەریا ھەڤوەڵاتیان ب حكومەتێ. ئەو تشتێ حكوومەتا ھەوە گۆتی ھەر ئەو سۆزن یێن بەری ھەوە گۆتین، ئەڤ حكوومەتە بەحسی ھێز و ئارامیێ ل ھەرێمێ دكەت، ئەو چ ھێز و ئارامیە و توركیا گوندێن كوردان ل پارێزگەھا دھۆكێ بۆردووماندكەن كو ھەڤوەڵاتیێن بێ گونەھ دبنە قوربانی و ھوون دھۆیێن راگەھاندنێدا نابێژن. ھەروەسا ھەرێم یا دئابووریەكێ ھەرفتیدا دژیت، پشتی (28) ساڵان ژ حكومڕانیێ ھوون دبێژن پلانێن پاشەرۆژێ ھەنە بۆ چاككرنا ژیان و خزمەتگۆزاریان. ئەرێ بۆچی پلانا ھەوەیا پاشەرۆژێ نەبوو بەری (28) ساڵان؟ ھوون ب چڤە مژیلبوون دڤان (28) ساڵاندا؟ ئەرێ پلانێن ھەوە یێن پاشەرۆژێ دێ یێن سەركەفتی بن دڤی دەمیدا كو ھەرێم د خرابترین كاودانێن رۆژھەلاتا ناڤیندا دبووریت؟ كانێ ھێزا ھەرێمێ و دەولەتا عیراقێ یا دھەرفیت و ھەرێم پارچەیەكە ژ عیراقێ؟
ئەو باجەیێن حكومەتا ھەوە سەپاندین نەیێن دروستن دگەل بەرژەوەندیا گشتی، چونكو سەپاندنا باجەیان دڤێت ھەردەم دبەرژەوەندیا گشتیدا بیت ب رێیا دەركرنا قانوونان ژ لایێ پەرلەمانیڤە بەرۆڤاژی حكومەتا ھەوە رابووی ب سەپاندنا باجەیێن دووبارە ب رێیا دەستھەڵاتێن بۆ وەزیرێ ناڤخۆیی ھاتینە دان. ئەڤەژی بەرۆڤاژی قانوونێ و دەستوورییە، چونكو باج و رسوم و زیان دڤێت ب رێیا دەستھەڵاتا تەشریعی بن نە دەستھەڵاتا جێبەجێكرنێ بن، حكوومەتا ھەوە نەرابوو ب بنبركرنا گەندەڵیێ و دڤیا راببا ب نەھێلانا گەندەڵیێ ژ سەرێ دەستھەڵاتێ بۆ بنی ئەوێن ماڵێ گشتی دزن، بەڵگەژی ئەوە كو زڵاڵی د ھنارتنا گازێ و داھاتێ دەربازگەھێن نیڤدەولەتیدا نینە و ئەڤەژی گەندەڵییە. بزانن مللەتی باوەری ب حكوومەتا ھەوە نەما كو قەیرانا دارایی ئینابوو ل ساڵا (2014) و ب وێ ھێجەتێ ھەوە (38) مووچە ژ فەرمانبەر و مامۆستایان بڕین و نەدانا (8) مووچەیێن تەمام و نەدانا (12) مووچەیێن خانەنشینان و ھەتا نھۆ (3) مووچەیێن ئەڤ ساڵە نەھاتینە دان و راوەستاندنا پلەیێن بەرزكرنێ و نەپەیداكرنا ھەلێن كاری و ڵاوازبوونا كارەب و ئاڤێ ئەرێ ئەڤە ھەموو دبنە سەركەفتن بۆ حكومەتێ؟ و بۆچی ھەوە ئەو ھەموو نەگۆتن ب ھەلكەفتنا بوورینا (100) رۆژان ل سەر پێكئینانا حكوومەتا نوو؟ دڤیا ھەوە سوپاسیا وی مللەتی كربا كو خۆ ل بەر نەخۆشترین كاودانان گرتی و دڤیا مللەتی كریار دیتبان نە گۆتن و ئەڤ مللەتە ژیابا ژیانا مرۆڤان نە ژیانا بەندەیان (عبد) ل ژێر باجە و رسوم و زیانێن نە قانوونی دگەل بەردەوامیا گەندەڵیێ ل ھەموو كەرتێن حكومەتێ د (100) رۆژاندا ھەروەكی كارێن حكومەتێن بەرێنە و مللەتێ ژ ڤان پەیڤان تێربووی و ئەڤ شێوازەیێ كەڤن بووی و ئاخاكەفتیە سەر.