ل دووڤ دەستوورا عیراقێ مادەیا (30) ئێكەم، دەولەت بۆ تاكی و خێزانێ و ب تایبەت زارۆك و ژنان چاڤدێریا كۆمەلایەتی و تەندروستی و بنەمایێن ژیانەكا سەرفەراز و داھاتەكێ گونجای و ئاكنجیھەكا (سكن) چاك دابیندكەت. ئەڤ دەقێ دەستووری یێ دیار و ئاشكەرایە، جودایێ ناكەت دناڤبەرا عیراقیاندا كورد بن یان عەرەب و ھەموو عیراقیان ڤەدگریت ب نەتەوێن وێڤە. پەرلەمانتارێن ل ئەنجوومەنا نوینەرێن عیراقێ ل ھەموو خولێن پێشتر و تا نھا داخازیا كاراكرنا ڤی دەقی نەكرییە، چونكو مافێ مللەتی بخۆ ڤەدگریت نە مافێ سەرەرێن وان یێن سیاسی. ڤان پەرلەمانتاران داخوازیا ھەر تشتەكێ ب مافێن وان یێن تایبەت كرییە وەك مووچە و مافێن پارتێن وان و مافێ مللەتێ خۆ دەربارێ ژیانەكا سەرفەراز ژ بیركرییە و ئەڤ پەرلەمانتارە مژویلی كارێن بێ ئاست بووینە، وەك بەری چەند رۆژان و پشتی چەندین دانوستاندنان پەرلەمانێ كوردستانێ بناڤێ خزمەتكرنا مللەتی پەیڤا (بەروار) گوھری بۆ پەیڤا (رێكەفت).
پسیارا من بۆ وان پەرلەمانتاران ئەرێ گوھرینا ڤێ پەیڤێ دێ مادەیا (30) ژ دەستوورێ عیراقی ل ھەرێما كوردستان كاردكەت؟ ھەروەسا ھەموو پەرلەمانتار ل پەرلەمانێ بەغدا و ھەولێرێ ھەردەم قانوونان دەردكەن دەربارێ بەخشینا پارچێن ئەردی بۆ كۆمەكا دەستنیشانكری و ئەڤێن ماین ژ مللەتی چاڤەرێدبن تاكو دمرن یان شەھید دبن ل ژێر دروشمێن درەو. بلا ئەڤ پەرلەمانتارە بزانن، ھەڤوەڵاتیێ كورد یان عەرەب جھێ شانازیێیە بۆ ھەموو عیراقیان و بۆ ھەر كوردەكی ل ھەرێما كوردستانێ، چونكو ئەو خۆ گوری وەڵاتێ خۆ دكەت لێ سیاسی وەڵاتی تاڵاندكەن و ئەو تشتێ تاڵاندكەن رەوانەی دەرڤەی وەڵاتی دكەت. چبكەكا خوینا ھەڤوەڵاتیێ شەھید دبیت چ كورد یان عەرەب ب بەرامبەری ژیانا ھەموو سیاسی و تەخا دەستھەڵاتدارە. نە شارەزاییا پەرلەمانتارێن كورد ل پەرلەمانێ عیراقێ و ل پەرلەمانێ كوردستانێ دۆخەك دروستكریە بۆ ھەڤوەڵاتیان كو كەنجێ كورد دەلیڤە نینە بژیت ژیانەكا سەرفەراز نەچاردبن ببنە خزمەتكارێن تەخا دەستھەڵاتدار ل ژێر ناڤێ پۆلیس یان پێشمەرگە. ل دووماھیێ دڤێت ئەنجوومەنا پەرلەمانتارێن عیراقێ و پەرلەمانێ كوردستانێ پێگیریێ ب دەستووری بكەن بۆ برێڤەبرنا ھەرێمێ و عیراقێ و ب تایبەت مادەیێن دەستووری ئەوێن پەیوەندیدار ب ماف و ئێمناھیا وەڵاتیانڤە ئەگەر نە دێ ھەبوون و نەبوونا وان وەكھەڤ بیت.