پیرۆزیێن وەلاتى بلا ئێدى نەبن پەردە بۆ گەندەلیێ

ل چەرخێن ناڤەراست دا و ب تایبەت ل سەردەمێ خیلافەتا عەباسى، دەولەتدارى پێشکەفت و بریار هاتە دان کو وەزارەت وى دەمى کو ب (دیوان) د هاتنە نیاسین ل بیاڤێن جودا بێنە ئاڤاکرن و کار گەهشتە وى ئاستى گەندەلیێ خوە ل هەمى بابەتا دا و دیوانەک تایبەت هاتە ئاڤاکرن ب ناڤێ (دیوان الازمة) بۆ هندێ چاڤدێریا دیوانێن دیتر بکەن کو چ سەختە و گەندەلى و واستە و واستەکاریا نەکەن و کار و کریارێن دەولەتێ ب عەدالەت و دویر ژ هەمى شاشى و غەشەکێ ب رێڤە ببەن. لێ گەندەلى ئێشە زۆر زووى بلاڤ دبیت و خەلیفە مەهدى کورێ هارون رەشیدێ عەباسى نەچار بوو دیوانەکا دیتر بۆ چاڤدێریکرنا دیوانا الازمە ئاڤا بکەت بناڤێ (زمام الازمة) داکو سنورەکێ بۆ ڤێ گەندەلیێ دانیت کو ئێشا سەرەکیە بۆ ژناڤبرنا ئەزموون و خەبات و دەلەتان و وى دەمى هەتا رادەکێ شیا بازنا چاڤدێریکرنا گەندەلیێ و حاشیا خوە کورت بکەت.

د نها دا هەرێما کوردستانى تووشى ئێشا گەندەلیێ بوویە، چاوا ئیبۆلا ل رۆژئاڤا ئەفریقیا بلاڤ دبوو و ئەنفلوەنزا ل سەرانسەرێ جیهانى و دبوو مەترسى ل سەر مرۆڤاتیێ. ب وى ئاستى گەندەلى کاریگەریەکا خراب ل سەر کوردستانیان و ئەزمووزن و خەبات و قوربانیدانا وان دکەت.

ئەگەر بپرسین چارە چیە؟

پشتى بیست و حەفت سالێن حوکمرانیا کوردى خەلک ب وێ چەندێ نەگەهشتن کو خەبات و بەرخودان بۆ کرى و رۆژ بۆ رۆژ قەیران و ئاریشە دزێدەبوونێ دانە و مەترسى کەفیتە ل سەر پێکهاتێن جڤاکى. هەمى ژ وێ گوشێ دئێن کو دادى د ڤى وەلاتى دا نینە و خەلک هەتا رادەکێ زۆر بێ هیڤیە بوویە و گەندەلکار ژى بێ ئێک و دوو چەپ و راست لێددەت! فەرە سەرۆکێ هەرێما کوردستانێ ل ئەولەویاتێن خوە دانیت دژاتیا گەندەلیێ و کار بکەت ئەوێن کو سامانێن ڤى وەلاتى د خۆن بێ کو هیچ حیسابەکێ بۆ قوربانیدانا ڤى گەلى بکەن بێنە سزادان و رەزیلکرن و زیندانکرن. هەروەسا دێ د جهێ خوەدا بیت سەرۆک و سەرکردێن کوردان ژ خوە و دەوروبەرێ خوە ژى دەست پێ بکەن و گەندەلیێ ئادە و بژارە بکەن و نەهێلن کەس ب ناڤێ وان و هەبوونا پەیوەندى دگەل وان گەندەلیێ بکەن و پیرۆزیێن وەلاتى ئیدى بلا نەبن پەردە بۆ گەندەلا. لەوما قوربان فەرە دەستپێکێ ژ دەوروبەرێ خوە بپرسى و نەهێلە ڤى وەلاتى ب وەلاتى ڤە گەندەل و وێران بکەن. زۆر گرنگە وەکى خەلیفە مەهدى لێژنەک بۆ چاڤدێریا وان بێتە ئاڤاکرن کو ئەوێن چاڤدێریا خەلکى دکەن و نەهێلن دەسەلاتا وان یا رەها ببیتە رێکەک بۆ گەندەلیێ. هەروەسا ئەرکێ راگەهاندنێ و رۆشنبیر و چالاکڤان و نڤیسەر و سیاسى و زانایێن ئاینى و رێکخراوێن جڤاکێ سڤیلە ئەو ژى گەندەلیێ ب هەتکرن و خیانەتا بدەنە نیاسین و وەلاتیان ژ مەترسیى و کاریگەریێن وێن خراب هایدار بکەن و حزبێن سیاسى ژى خەباتا خوە گۆرى گەندەلەکێ نەکەن تنێ ژ بەر وێ چەندێ کو کادرێ وانە.

گەندەلى ب شێوازەک مەزن ل کوردستانێ بلاڤ بوویە و رۆژ بۆ رۆژێ د زێدەبوونێ دایە و شیانێن وەلاتى بێ بەرهەم دکەت و خەلک و حکومەتێ ژێک دوور دکەت و باوەریێ دەف وەلاتیان نا هێلیت و کێمینە دبیتە مفادار و زۆرینە ژبن پێیا دچیت. لەوما زۆر گرنگە دیرۆکێ بکەینە پەند و شیرەت و مفایێ ژێ وەربگرین و نەهێلین کو ئەزموونێ هەرێما کوردستانێ بۆ حەزا چەند گەندەلا بەرەف لاوازیێ بچیت و داویێ ب ئارمانجا سەرەکى نەگەهین کو سەرێ چەندین سالانە خەباتێ بۆ دکەین. ژناڤبرنا گەندەلیێ و ئادەکرنا وێ دەستپێکێ ئەرکێ سەرەکى یێ سەرۆکێ هەرێمێ یە و دیڤدا حکومەت و پەرلەمان و هەمى سازیێن وەلاتى و فەرە ژ سەروکانیێ دەست پێ بێتە کرن و دەست ژ ناڤ دەست بین بۆ ژناڤبرنا ئێشا کوژەک و دژە دەستکەفت و هێزا میللەتان و گەهشتن ب دادگەریێ کو خەونا هەر میللەتەکێ یە. ب هیچ ئاوایەکێ نابیت حاشیە و دەردورێن بەرپرسێن وەلاتى رێگر بن کو دەنگوباس و نەخۆشیێن وەلاتیان بگەهنە جهێن بلند، ئەگەر نە وەکى کوردەوارى دئێتە گوتن تەر و هشک دێ هێنە سوتن و سەرکردەێن پلە ئێک دێ بەرپرس بن ژ ڤێ گەندەلیا بلاڤ بووی ب رەنگەکێ زۆر.

(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)

Leave a Comment

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

Scroll to Top