سەرکەفتنێن ئێک ل دووڤ ئێکێن هەرێما کوردستانێ ژلایێ ئابوری، سیاسی، دۆپلۆماتی و ئێمناهی وەکریە کو پێگەهێ کوردستانێ ل سەر ئاستێ جیهانێ بلند و ب نرخ بکەڤیت. ڤان دەستەکەفتان وەکریە کو هەردەم چاڤێ دوژمنی ل نەمانا ڤان دەستکەفتان بوویە. وەلاتێن جیران ب گشتی، دوژمنێن ناڤخوە نموونە وەک پەکەکە ب تایبەتی. نزیکی سەد سالا خەباتا کوردێن باشوور بۆ بدەستڤەئینانا سەربەخۆیێ و ئازادیێ ڤەکێشایە و ئەو ئازادیا نها ئەم تێدا ب ساناهی بدەستڤە نەهاتیە، بەلکو بەرهەمێ شۆرەشێن ئیلوون و گولان، کیمیابارانکرنا پێنج هزار حەلەبجەییان، ئەفالکرنا هەشت هزار بارزانیان، وێرانکرنا چار هزار گوندێن باشوور، بنئاخکرنا ب ساخی یا هەڤدە هزار کەسان و بەرزەبوونا هزارەهان وەلاتیان د هەوێن ئەنفالێن رەش دا و تا دوماهیکی. ئەڤە هەمی قوربانیێن گەلێ باشوور بوون تا ئازادی و سەربەخۆیا ئەڤرۆ بدەستڤە هاتی. چ شک تێدا نینە ب درێژاهیا مێژوویێ گەلێ کورد ل هەر چار پارچەیان زۆلم لێ هاتیە کرن و تا نها ب تنێ هەرێما کوردستانێ شیایە خوە ژ وێ زۆلمێ رزگارکەت، ژ بەرکو ئەو خەبات ب سەرکێشیا سەرکردەیەکێ کورد بوو کو د خەما گەلێ خوە بوو، چاڤێ وی ل خوشی و تێکدانا چ وەلات و جیرانان نەبوو.
ل باکوورێ کوردستانێ کو پارچەیا هەری مەزن یا کوردستانێ یە و تا نها ئازاد نەبوویە، سەرەرای هەبوونا هێزەکا چەکدار کو ب ناڤێ خەباتکرن ژ پێخەمەت رزگارکرنا گەلی هاتیە دامەزراندن کو پەکەکە یە. لێ تا نها نەشیایە ئێک بهۆست ژ باکوورێ کوردستانێ رزگاربکەت، بەلکو بەروڤاژی ب تنێ بوویە سەرئێشەک ژ بۆ هەمی گەلێ کوردستانێ و چاڤێ وێ ب تنێ ل نەهێلانا دەستکەفتێن کوردستانا باشوورە. نموونە ژی ب ئاشکرای د دیارن کو سەرێ بیست سالایە ڤێ پارتێ خوە د ناڤا چیایێن سنورێ کوردستانا باشوور دا ئاسێ کری و ب هزاران گوندێن وەلاتیان داگیرکرینە و ناهێلن خەلک بچیتە سەر مال و حالێن خوە. ئەگەر ئەو هێز بۆ رزگارکرنا گەلێ کورد بیت ل باکوور؟ بۆچی ئارامیا باشوور تێککدەت و ب ئاشکرای گەفێن تێکدانا ئارامیا وێ دکەت؟ گەلۆ ئەڤە خەباتا بۆ کورداتیێ؟ یان ژی جێبەجێکرنا پیلانێن تورکانا ژ بۆ نەهێلانا کوردان؟ سەرۆکێ وان ئاپۆ تا نها چارەنڤیسێ وی دیار نینە کا مریە یان ساخە د دەستێن تورکان دایە، لێ وان چ کریە؟ چنە… بۆ؟ ژ بەرکو ئەسلێ ڤێ پارتێ نە کوردیە و خەباتا وان بۆ ئازادیا کوردان نینە، بەلکو ب تنێ بۆ تێکدانێ هاتیە دامەزراندن. داخواز ژ حکومەتا ئیراقێ دکەین ب هەماهەنگی دگەل هەرێمێ و ب گوتوبێژکرن دگەل تورکیا و پەکەکێ هێلەکێ بۆ ڤێ رێکخستنێ بدانن و ئێدی ژ سنورێن هەرێمێ بهێتە دەرخستن داکو زێدەتر ل سەر وەلاتیان نەبیتە گەف و مەیدانا خەباتا خوە ببەتا ناڤا تورکیا.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)
