پۆل برێمەر حاکمێ مەدەنیێ عیراقێ ژ دەسپێکا کەفتنا رژێما دکتاتۆر سەدام حسێنى بیرهاتن و هەمى کار و کریارێن خوە ل پەرتووکەکێ ب ناڤێ (سالا من مە بوراندى ل عیراقێ- عام قضیته في العراق)، دارشتینە و پرسێن جودا جودا و بەحس ژ سەرکردێن عیراقێ دکەت پشتى سەدامى ب سیاسیێن کورد ژى ڤە. لێ یا من دڤێت د ڤێ گووتارێ دا بەحس ژێ بکەم ئەوە کو برێمەر د لاپەرە (330) ل سەر وێ سەرەدانا خوە د گەل چار ژ بەرپرسێن (مجلس الحکم) ئەو ژى عەدنان پاچەچى و ئەحمەد چەلەبى و عادل عەبدولمەهدى و موەفەق روبێعى بوون، بۆ دەف سەرۆکێ رژێما بەرێ ل زیندانەکێ دا کو وەسف دکەت و ئەو وەلاتێ پان و بەرین هەمى ژێ بوویە ئێک ژوورا تەسک و تارى و بێ خودان. بابەت ئەو نینە کو سەدامى و سەرکردێن وەکى وى دەمێ گرنگیا دەسەلاتێ و نیعمەتا خوەشیا نەزانى و دەسەلات ب مولکێ خوە و بنەمالا خوە زانى و هەمى ژێ بوویە نیقمەت و دەردو بەلا. بابەت ئەو پرسیار بوون کو هەر چار عیراقیان ژ سەدامى کرى و هەمى قوربانیێن دەستێ رژێما فاشى و شۆڤینیا سەدامى بوون. بۆچى تە کورد ئەنفال کرن؟ یێ دى دگووت تە بۆچى کیمیا باران باژێرێ هەلەبجە دکر؟ ئەوێ دى ب تورەى ڤە دگووت تە بۆچى ئایەتوالله و زانا و کەساتیێن شیعە کوشتن؟ ئەوێ دی دگووت تە بۆچى هێرشى کوێتێ کر؟ سەرکردێ دى دگووت تە بۆچى ب ڤى شێوازى سەرەدەرى دگەل وەلاتێ خوە کر و…؟ دەهان پرسێن دیتر ژى هەبوون کو ل دکتاتۆرێ عیراقێ بکەن و ئەو بوو ل دادگەهێ هەمى پرسێن ژێ کرن و ل داویێ ل رۆژەکێ دا سێدارەدا کو هەمى بسلمان ل خوەشى و جەژنێ دا بوون.
لێرەدا ئەگەر ب پرسین ئەگەر سەدام و دکتاتۆرێن جیهانێ ب درێژاهیا دیرۆکێ رێک دابا گەلێ خوە و ئەو کەسێن ل دەوروبەر، ئەرێ وەلات دا ب ڤێ رەوشێ گەهن و چارەنڤیسێن وان زیندان و سێدارە بیت؟!! بێگومان چارەنڤیس ئەڤە نابیت و دێ گەل و وەلات ب ئازادى و دیموکراسى و خۆشگۆزەرانیێ گەهن، ئەگەر سەرکردە ب ویژدان کار بکەت و رێکێ ل گووتنا باش نەگریت. پشتى بیست و حەفت سالێن دەسەلاتداریا کوردى فەرە ئەم ژ خوە بپرسین ئەم دێ نها ل سەرکردە و سەرۆک و رایەدار و حکومەت و حزبێن خوە پرسین و رەخنێن ئاڤاکەر و ب بەدیل و جدى و ب ویژدان ژێ گرین؟ یان وى دەمى کو وەلات دبیتە پارچەک ژ وێرانى و گەندەلى و نەدادى و بێ رەحمى و دزى و تالانیى و بندەستى و بێ یاسایى و بێ خودانیێ؟ جیهانا پێشکەفتى ئەوە کو وەلاتى خوەدى بریار بن و حکومەت خزمەتێ بکەت پەیمانەک د ناڤبەرا وان دا هەیە خزمەت ل حکومەتێ و دەنگ و پشتەڤانى ژ خەلکى. د هەرێمێ دا خەلک هێشتا ب وێ پلا رازیبوونێ نەگەهشتیە کو بێژیت من دەنگ و پشتەڤانى هەبووینە و خزمەت ژى گەهشتیە! نەخێر د نها دا نەدادى و گەندەلى و واستە و واستەکارى و دەسەلاتا کورێن جاش و مستەشارا و ئاغا و بەگان ل سەر کورێن فەقیر و ژارو و شەهید و پێشمەرگەیان هەیە. هەروەسا ئاستێ خزمەتگۆزاریانە ب شێوازى یە کو دئێتە گووتن و وەلاتى کەفتینە د ناڤ کۆمەک ژ کێشەیان دا کو ئەگەر نیەتەک سافى و ویژدانا پێشمەرگەیانە هەبیت وى دەمى دێ ب حوکمەکێ رەشید و نەزیه و دادوەرگەهین. دیرۆک بۆ هندێ یە کو پەند و شیرەتان ژێ وەربگرین نەک بۆ هندێ بیت تنێ بخوینین و ژ ل سەر لاپەریان تۆمار بکەین. ئەڤرۆ ئەم پرسێن خوە ل سەرکردێن کوردستانى بکەین و ئەو ژى دیف شیان و ب پلان و ئارمانجەک روون و خزمەتەک بەرفرەه ل ناڤ وەلاتیان دا بن، وى دەمى دێ ب کوردستانەک ئارام و دویر ژ دەستوەردان و هەژاریێ گەهین، کو ب دیتنا من دەرفەت هەیە و خەباتا کوردستانیان هەژى زێدەترێ یە.
(گووتار دەربڕینا بۆچوونا نڤیسکارانە، نەیا سایت و گووتارنامەیا رۆژئارتیکڵ)